「諗咗好耐先諗得通,原來答案就喺依度。」阿媽揭到相簿中間,我同餐肉喺屋企影嘅相,我抱住佢,而餐肉都望住鏡頭。

佢話嗰一次,係我三歲以嚟,久違嘅笑容。

「就係因為依個笑容,我就再無諗過咩回報。嗰一刻我心諗,就算日後你唔會養返我哋轉頭、唔會飛黃騰達⋯⋯你依隻股票就算永遠唔升都無所謂⋯⋯」淚珠滴落喺我同餐肉上,綻放成花。

「原來生仔唔係長線投資,而係生命入面一個幸福嘅過程。」

「好少見你咁認真講依啲嘢。」





「因為唔講可能就無機會講。媽咪淨係想你知道,生咗你之後我好幸福;就算明知你好快會消失,呢一刻我都仲係覺得好幸福。」

一個核彈喺我心入面爆發,爆風向上衝,幾乎將淚水逼出嚟。

「你確定⋯⋯你咁講唔係逼不得已之下嘅自我安慰?」
已有 0 人追稿