「咁就廿六年喇。」再揭一頁,大約係我幾個月大嘅相:「你睇你以前幾得意。」

「係囉唔知點解家下生到咁醜樣。」

「我後生嗰時聽人講過,話生仔其實好似買股票咁,係長線投資嚟。養兒就係防老,就係等我哋老咗嘅時候,你會照顧下我哋。」

「都講得啱嘅。」

「投資講嘅係回報,無回報其實就唔係投資。陀住你嗰陣,我都仲好清醒,諗住你讀好啲書,入到大學,搵份好工,咁我哋就唔使憂。」





生仔嘅意義對個個人嚟講都唔同,做股票經紀喺商場上打滾咁多年,阿媽習慣咗以理性同商業價值去衡量每一件事,所以我其實同一隻股票差唔多。

「奇就奇在,我依家收到內幕消息,話你好快被人釘牌,理論上我應該沽晒你先係。既然養你只係長線投資,依家都知無回報,我明明應該掟你出街先啱。」講到依度,阿媽自嘲咁笑一笑,而老豆部手機繼續傳嚟爆炸聲。

「然後我先知道,生完你之後,我就無再清醒過。」無奈嘅笑容留喺面上,慢慢流露暖意,視線放喺肥嘟嘟嘅我度:「一路等你返嚟,我就一路諗點解。點解生咗你之後,我就變得咁唔理性。」

老豆暫停段片,行咗去廚房食煙。
已有 0 人追稿