是咁的，我嘅職業係動物傳心師: 144.miki來電

手機響起，我拎出嚟，手指撳落接聽掣，放喺耳邊，但手機仲響緊，於是我集中精神再睇清楚個接聽掣先撳落去，可惜手機仲響，我將拇指再移左少少撳一下，今次先真係撳得中⋯⋯唉，已經連睇嘢都有少少錯位，左右有啲偏差。

「喂？阿金？我係Miki呀！個專訪出咗街喇！超多負皮超多人鬧！」

我係咪連聽覺都有問題？點解聽到佢把聲咁興奮嘅？被人負皮被人鬧唔係應該好頹㗎咩？

「點解你好似⋯⋯咁興奮咁嘅？唔似被人鬧喎。仲有做咩打畀我？」

「就係因為太興奮先打畀你！」





「我未理解到個邏輯喺邊度。」雖然未知咩事，但從Miki輕快嘅語氣聽起嚟，應該係被人鬧完之後發生咗咩好事。

「本身我都唔好意思搵你，事關我去到做專訪嗰陣都係無得睇走廊間房，再加上我同老闆娘一路傾偈，都覺得佢好好人，佢話啲貓都係人哋棄養或者喺街執返嚟咁，所以其實我覺得係你誤會咗佢哋。」

「咁我都係懷疑先搵你幫手睇下啫，我無一口咬定佢哋有問題嘅。好喇，咁篇專訪出街之後點？」

手機對面嘅Miki更加興奮：「因為我以當日聽佢哋講嘅嘢作為素材，所以寫到佢哋好正面啦。點知一出街就被人瘋傳，爆晒佢哋啲衰嘢出嚟，啲料仲多過我去搵呀！」

「佢哋啲衰嘢？」