Miki娓娓道來,話本天貓café嘅前身叫男嚼貓舍,係一間專賣名種貓嘅繁殖場,但唔少客人都話買咗病貓返屋企,甚至買咗幾日隻貓就會死,劣評連連之後就執咗笠。

我心諗,其實想養寵物嘅人肯去領養的話,真係少好多畀畀無良寵物店茁壯成長嘅土壤。

男嚼貓舍執咗之後,店主借女朋友名義重新開貓café,再大肆宣傳啲貓係領養返嚟,希望借café推廣愛貓意識,畀個地方貓奴分享同交流愛貓心得乜乜乜,講就好好聽,但實際上只係將未賣出而未死嘅貓「循環再用」。

「網上仲有一個匿名留言嘅讀者,話喺嗰度做咗幾日,爆咗好多內幕料畀我知。睇佢講得咁詳細都唔似係老作,所以下一篇放蛇報導會加埋佢嘅證詞入去。」

嗰位爆料人士話店主擅長「說漂亮的話,幹骯髒的事」,對外宣稱自己愛貓,所有店入面嘅貓都係領養,實際上全部都係貓舍遺留落嚟,只係換個方法等賣唔出嘅貓都可以轉變為繼續生財嘅工具。





本天貓café入面其實一共有三十幾隻貓,但每日只會派出最健康精靈嗰十幾隻去店面,其餘就會逼晒喺狹窄、衛生環境差嘅「工作人員房」入面,被強逼交配再生貓仔,而收舖之後,樓面嗰十隻都會加入繁殖行列,務求做到利潤最大化,等店主可以繼續私下賣貓賺錢。
已有 0 人追稿