更離譜嘅係,店主唔會幫啲貓沖涼,話淨係用爽身粉就算,雖然爆料員工已經同佢講咗好多次一定要幫貓沖涼同除蚤,但對方鬧返佢轉頭話:「你知唔知幫佢哋沖涼要停業一日,幫三十幾隻貓沖涼要幾錢呀?」

「佢最後仲同我講,有一晚佢倒垃圾,見到有隻貓bb屍體同啲飯盒嘢食一齊隨隨便便咁丟咗喺後巷,曱甴老鼠已經開始啃食緊條屍。佢叫我一定要報晒出嚟,我話,『傻嘅!梗係講啦!』所以你放心交晒畀我啦,依單嘢我會繼續跟,佢轉名幾多次我都會狙擊到佢哋無生意做!」

Miki咁做的確係大快人心,但咁搞法,長遠嚟講受害嘅都係啲貓。

「好呀,咁我就交畀你喇。唔該晒你。」

「客咩氣吖!咁我做嘢先!有咩新消息再通知你!」





我嘴上雖然多謝Miki,但我已經幾乎可以預想到最後事態會發展成點,而且無論咩方向發展到頭來受苦嘅都係啲貓。

我上網搵返間café嘅聯絡電話,打過去確認佢哋準備緊開舖之後,做咗少少準備功夫,打咗個電話問一個人,睇下佢對依個計劃有無興趣。大約一個鐘之後,我就起行過去café。

要根治今次依個問題,需要向店長落手。
已有 0 人追稿