巴膠將公文袋放喺我枱上:「報告係畀世伯伯母嘅。你條友⋯⋯叫咗你咪再亂用能力㗎啦。」

「我身體嘅情況,大致上我都清楚。」

「清你條命呀清!你今次真係好彩先醒得返㗎喳。我唔係同你講笑,喺你昏迷嗰陣我又幫你做咗腦掃描。活躍嘅腦區依家差唔多有六成,但腦腫瘤就加速病變。」

巴膠捉住我隻手,頂住自己額頭,好似祈禱咁:「我真係求下你喇,你下次再用能力真係唔會醒㗎喇⋯⋯應承我唔好再用好無?」

我伸出另一隻手拍拍佢膊頭:「我明㗎喇,我唔會用。但係我想出院,得唔得?」





「你真係唔再用?」

「真。我淨係想出院。我知我嘅情況理論上應該留院觀察先啱,但反正我都無幾多時間,可唔可以由我出去享受下最後嘅日子?」

巴膠眉頭深鎖,諗咗一陣,最後嘆咗口氣,點點頭。

「無錯,理論上你應該係要留院,但既然已經無時間,有得揀的話都一定唔想困喺病房度無意義咁過。我會幫你出去,但你記得你應承咗我,唔可以再用傳心能力,知道未?」

我向巴膠做出軍人禮:「收到!」





過咗一個下午,傍晚老豆阿媽就嚟幫我搞出院手續。
已有 0 人追稿