是咁的，我嘅職業係動物傳心師: 161.告一段落

第二日我見精神幾好，就再聯絡mk店長，我哋就上律師樓簽埋正式合約。咁急要求律師樓一日內搞掂係要額外收費，但mk店長都出埋錢，睇嚟真係好想快啲轉讓間舖畀我。

mk店長一路好似有啲痙攣又有啲智障咁，口齒不清，簽完合約就走。佢女朋友無同佢一齊嚟，睇嚟係分咗手。

搞掂手續之後，我就約咗啞仔出嚟，再將我接手咗嘅café同三十隻貓無條件咁轉讓埋畀佢。

當日我去café談判之前打嘅電話，就係打畀啞仔。

佢已經辭咗協會份工，正考慮緊繼唔繼續做獸醫，亦諗緊自己仲有無咩事可以為動物做。於是我就提議將收購嘅café交畀佢打理。





「以後佢哋就交畀你喇。」

啞仔無戴眼鏡，向我微笑︰「放心。」佢終於願意作出改變，而交啲貓畀佢照顧我亦覺得好合適同安心。

終於，真係告一段落。