惘。戀: 阿晴篇：（一）沮喪

一段長久嘅愛情，到底係呢個年代仲有無可能存在？每一個人係開始左戀情之後，都會為你呢段關係設有一個期限，不過謊謬之處在於點解一個影響一生嘅決定，竟然係好似蘋果一樣，永遠都無辦法挨過時間嘅挑戰。咁樣嘅話，青春同埋幸運邊一個比較重要？無論係曖昧太耐，或者長時間都未可以給予對方一個名份嘅話，又有幾多個異性有耐性去等待？恐怕要只有楊過同小龍女一樣咁淒美嘅愛情，即使苦等十六年，但都充滿希冀嘅話，就只有幻想同虛擬嘅世界先有可能存在。
「方正謙，你覺唔覺得自己好無用啊？你比唔到安全感我都算啦，你仲差啲連自己養唔掂啊！你咁嘅人工你叫我點樣等你一年啊？」一個女仔對住我破口大鬧。
「阿睛，我⋯⋯」
我正想開口解釋，就已經比眼前呢個由我女朋友，慢慢演變成一個歧視低下階層，仗勢凌人嘅有錢人一樣，佢唔單止利用說話傷害我嘅自尊，更一巴摑左係我塊面，令我本身緊握係手嘅書，重重咁跌左係地下。
佢一個咁過份嘅舉動，唔單止令我瞬間語塞，仲比佢藉住呢次嘅鬧交，一手剪左中學時期，月老為我地兩個扯上嘅紅線。佢轉身向後，慢慢咁離開我嘅視線範圍內，我先有面目再次執返起地下呢本，我心目中覺得可以帶到將來比佢嘅書。
係嗰一刻，我慢慢感受到人生百味，到低我係咪應該放低作家呢個職業，向現實低頭咁去我毫無興趣嘅工作？已經接近30歲嘅我，居然仲好似個細路一樣，呆左咁痞係地下，受到市民嘅注視。
我頹廢咁緩步返屋企，係呢5分鐘，我腦裏面一片空白，究竟我做錯咩野先要換到今日咁淪落嘅田地？擺低今日先出版嘅新書，同埋一份新嘅合約，我嘆左一口氣。回想返啱先落去接你，途中幻想你雀躍嘅表情同埋我帶比你嘅憧憬，但得來嘅竟然係得到一番咁諷刺說話，如果唔係你我可能真係連自力更生嘅能力都唔夠⋯⋯
但係堅持自己嘅夢想都有錯咩？我心灰意冷咁坐係電腦椅上面，如常咁開著部電腦，㥬惶咁望住自己咁多年黎為呢個夢想而付出嘅努力，總共20篇嘅小說，成幾千萬字先堆砌到今日呢份合約，估唔到到頭來係晴天霹靂咁失去左最重要嘅野。
無助嘅我凝視住電腦嘅桌面，希望搵一個可以令我暫時離開現實世界，比我代入虛擬世界嘅遊戲，享受下成功同埋快樂，化淡自己現實只係失敗者嘅身份。
各個差唔多樣嘅程式同檔案包圍住成個螢幕，令我想搵一個遊戲都異常咁困難。經過左一個鐘，我試玩哂我已經下載左係度好耐嘅幾隻遊戲，唔知係自己心情低落定係遊戲嘅質素變差，我竟然完全無辦法投入到遊戲裏面。


係我心情接近崩潰嘅時候，突然電話發出左「叮」一聲。傳黎嘅信息居然係一隻我接近五年無玩嘅online game 發比我嘅信息，上面寫住，遊戲已重新改革，現在誠邀你回來享受本遊戲。
只係短短嘅一句，好多有笑有淚嘅回憶都一一湧現。我深呼吸左一下，自然咁嘴角上揚，微笑住咁品嚐呢個信息幫我勾起嘅回憶。
「假如唔係呢個遊戲我唔會識到阿睛，唔係呢個遊戲可能我成個中學時期都只係一個邊緣人，唔係呢個遊戲我都未必會踏上做作家呢條路。」我一邊慨嘆，一邊用電腦重新搵返呢個遊戲嘅資料。
經過我一番嘅努力，我終於搵返呢隻差唔多10幾年前嘅遊戲下載嘅方法。由我見到「開始下載」呢四隻字，我低落嘅心情先開始得到調整。