惘。戀: 阿睛篇：（二）回味

係下載遊戲嘅同時，我閉目回想翻自己同呢隻遊戲嘅記憶。內心平靜嘅感覺，令我係漆黑中可以捕捉到回憶嘅片段，並慢慢咁變得鮮明，生動。明明依啲記憶一早已經被庸庸碌碌嘅生活通通消磨，但係今日佢地偏偏全部被依隻遊戲重新喚醒，及時咁係我最傷痛嘅一刻，為我打一支止痛針。
朋友間例行嘅寒暄，彼此無所不談，上至對住未來嘅憧憬，下至互相奚落，令到遊戲同埋朋友，可以融合成為呢一段段屬於我而且獨一無二嘅回憶。
「你覺得將來我地幾個入面，邊個會係最成功嗰個啊？」文杰突然招積咁講出左呢問題，好似覺得答案就一定係佢本人咁，充滿信心。
我未開口之前，肥駿已經搶先我一步，嘲諷佢過嘅自信，充滿急材嘅佢，只係一句已經激發到我地嘅笑聲同令到文杰啞口無言。
「咁就要睇你成功嘅定義係咩啦，如果係脫離單身嘅話，照咁睇你將會係最失敗嗰個。」肥駿望住文杰部電話講。
場面變到一片歡樂嘅同時，被人恥笑嗰個亦唔會因此動怒，除左因為現實中佢屋企嘅財富之外仲有輕易可得嘅成就感，的確係可以造就到佢有好似名校學生一樣嘅自信之外。
不過，每一個圈子都係物以類聚，我同肥駿只係一個平平無奇嘅學生，缺乏異性相近都係人之常情，至於文杰點解優秀咁會同我地一樣？正正都係因為呢一隻遊戲，令我地幾個都可以認定對方就係青春歲月入面嘅「最佳損友」。
懷緬緊呢段記憶嘅時候，突然腦海不自覺咁浮現出一句嘅歌詞。
從前共你促膝把酒傾通宵都不夠⋯⋯



過多幾日正正就係約定就嘅朋友聚會，繼畢業之後相隔多年之後，先難得再有機會可以聚首一堂。可能正正就係上天安排機會，比我地知道十年前嘅問題，係今日會有咩答案。
十年前聚首一堂嘅係學校附近嘅網吧，話題都係圍繞頭先嘅副本，所得嘅虛擬物品，更甚係識到唔同嘅女性玩家，即使最終一無所獲，但都樂在其中。
唔知道係十年後，同一個班人會長大到咩程度？假如今時今日叫佢地重拾青春，再次陶醉於遊戲之中，又或者用時間做一個賭注，再品嚐下網戀嘅滋味，將對象嘅一切處於幻想之中。一個個看似幼稚嘅行為，叫佢地再次做出嘅話仲有無可能？