自掘墳墓: 曙光
「好……痛……好凍……」Ocean半死不活地躺在牆邊。
「Ocean你要頂住呀，一定要呀……」我脫掉上衣，包紮切斷一半的左腳。
「冇用架……」Ocean看著廢掉的一腿。
「好對唔住呀……」我低頭垂下，掩飾雙目的淚水。
「你走啦……就好好生存落去，苟且落去，怕死落去。」他說。
「你仲嬲緊我？」我無奈地說。
「當然冇……怕死好正常，自私先可以生存落去。」Ocean的語氣轉為怨念。
「你……」我愕然，又極度失望：「我唔想理你。」
「哈……」Ocean本想說話，卻被我強行抬起來，背在身上：「你……你做咩？」
Ocean的身軀非常沉重，右腳痛如撕裂，還發不了力，幾乎就要摔倒。
「你傻左呀？想兩個一齊死？」Ocean大惑不解。
「都話唔會理你。」我堅定地說。
「放低我呀……」Ocean左右搖擺，但他剩下太少力氣，掙不開我。
「無論點都好，我都要抬你出去。」
「你……你根本浪費力氣，你隻右腳支撐唔到五分鐘。」
「我冇你咁容易放棄，亦都冇你咁小氣。」
對講機放在身上，鐵鏟依然擔當拐杖的角色。
守墓人的屍體慢慢從視線中遠去，我沿著前方的石路走，每步都用上渾身的力量。
「我地一定要離開呢度。」我心中默念。
-------------------------------------------------------------------------------------------------------------------
周達隆的回憶 （三年前）
夜閑人靜，街上的店鋪都關門了。
街燈的照射下，夏天的蟲子紛紛聚集一起，是有多麼喜歡光芒嗎？
我四處張望，尋找失意的人。
果然，他會在那裡。
一個熟悉的身影坐在便利店外大口喝酒，罐子乾掉，就投進六米外的垃圾桶裡。
對於一個籃球比賽捧杯的人來說，這些動作只是小兒科，根本易如反掌。
半小時前，小儀致電我，說Ocean跟她吵架鬧分手。
「你同佢最熟，你勸下佢啦，唔好俾佢飲太多。」
小儀拋下無奈的說話。
他們的愛情，並不是一帆風順的。
「終於搵到你……」我跑往便利店，邊喘氣邊說。
這次，我要當和事人。
「哦，係你呀？啱啦，過嚟飲啦。」Ocean遞來啤酒。
「你……幾好嗎？」我接過啤酒，冷靜地問。
其實，小儀早就將一切告訴我了。
「好，一直都好好。」男人，都喜歡這樣說。
一個說自己過得很好的男人，絕對過得不好。
尤其是，這麼要面子的Ocean。
「咁你而家有咩打算？」我問。
Ocean沒有立刻回應，先是喝一口啤酒，然後打量我的眼神，彷彿明白了什麼。
「小儀乜都講左？」他反問。
我學他般先是喝一口啤酒，然後淡淡地說：「係。」
「你點覺得？」Ocean問我。
「反正呢個就係你，我認識嘅Ocean，所以我唔會評論對錯。」我再次喝酒。
「哈，好兄弟，果然最明白我。」他向我敬酒。
「不過，就係因為我咁認識你，先會知道你一定唔捨得。」我諷刺地回應。
「嗯？」
「你捨得？」
「唔知道，唔想知。」他選擇不去面對。
「所以，我都會同你講，你放低你嘅固執同尊嚴啦。」我放下啤酒罐，認真地說。
他將手上的啤酒喝光，再純熟地擲到遠處的垃圾桶裡。
「塔隆你幫邊個架？」我這番說話彷彿掃了興。
「當然幫你，你應該知道我係咩人。」我回說。
「哈，但係人人都可能會判斷錯誤，你又肯定你係為我好？」
「我有Fake過你咩？」
「今次唔同，你唔明架啦。」
要明白的，是他。
「小儀好愛你，你自己都唔係唔知。」我調高語調。
「但係我唔容許。」
「你以為小儀真係有介意過？你以為佢會介意無聊嘅閒言閒語？」我質問。
「唔係佢介唔介意嘅問題，係我介唔介意嘅問題呀？你明白？」他反駁：「我接受唔到，所有人都話我益左，話我冇出色，話我第時只可以依賴佢！我唔可以咁自私，令小儀受到呢種連累！」
接著，他踢倒幾罐地上的啤酒。
「你以為離開係偉大，為佢好，其實單純為左自己所謂嘅尊嚴。你根本唔敢面對，唔好以為自己係Asso仔就唔值得擁有小儀。小儀鍾意嘅，係你嘅性格，同埋你對佢嘅付出，而唔係無聊嘅資歷呀！」
七月十三日。
今天，就是放榜的日子。
別人說，放榜這回事，有人歡喜有人愁。
本以為，收到滿是星星的成績單，會是興奮得彈起來，然後狂歡起舞，慶祝三年的努力。然而，事實是，你只會簡單地鬆一口氣，其後目睹身邊的戰友，一個一個地飲泣、嘆氣。
或者，是我們學校的表現，整體來說只是一般吧。不過，放榜對很多人來說，都是惡夢。
Ocean接到成績單後，神情空洞地呆在座位上，雙手不自覺地用力，將成績單弄成爛紙。那個畫面，我依然牢在心中。
臉上沒有一滴眼淚，但，很多悲傷。
男孩報讀副學士學位，女孩讀上港大醫學院。
何等諷刺。
可歌可泣的愛情，不介意身份地位的愛情，又有多少人能夠得到？
一方自卑，一方想要更好。很多時候，這種愛情不會有好結果。
但我相信，世界不是這樣的殘酷。
「你唔明，你完全唔明，男人唔可以容許呢D嘢。」Ocean憤怒地站起來。
「你幾時變到咁自卑，你追人地嗰陣又唔咁講？」我幾乎同時站起。
「因為我成熟左。」
「你而家先叫做幼稚。」
「隨便你點講，反正每個人嘅定義唔同。」
「我解釋俾我聽，有咩令你一定要介意？令你放棄經營咁耐嘅關係。」
Ocean繃緊的神情減緩下來，雙腳失去力量，坐在地上，然後再開一罐啤酒。
「我最介意嘅，係小儀話唔介意嘅眼神。」
「嗯？」
「呢個，係我自卑嘅真正原因。」
「即係？」
「你仲唔明？每當小儀話佢唔介意，我個心就好似刺左一刀咁，好痛苦，好大壓力。我忍受唔到，嗰種眼神，你冇試過咩？朋友、老師、父母講嘅『唔需要介意擔心』、『唔好咁大壓力』、『要堅強』、『要加油』，呢類所謂安慰同鼓勵嘅說話，其實先係真正嘅壓力，真正嘅壓迫。」
「……」
我一時之間，不知該如何回應。
一個失意的人，到底需要什麼？
不用三十秒的時間，Ocean已經喝完手上的一罐啤酒，向空中一投。
這次，他投歪了。
「但係，你仲未答我，你捨得咩？」我問了同樣的問題。
「捨得。」
「講大話。」
「你唔信我，我都冇辦法。」
「等我話俾你聽，真正嘅自私，係任由一個心愛你嘅女仔自己一個喊，為你而喊。你可能覺得離開係為佢好，但佢根本唔想，你帶俾小儀嘅，就只有傷心同失望。」
「係咩？」
啤酒灌到喉嚨裡去。
兩人沉默。
恰巧，天下雨了。
別人說，下雨為大地帶來真正的寧靜。
滴滴水聲，取代了無聊的雜音，耳根剩下最自然的聲音。
寧靜，悠然。
隨著雨點灑落大地，我們兩個人都觀看著外面的景色。
「記得，我表白嗰日，咁啱都係落雨。」Ocean突然開口。
「係咩？咁咪更加浪漫？」
「哈？更浪漫？都算係嘅，不過你嘅伎倆根本唔好洗，最多逗到小儀笑下。」
「仲記得你當初點解追人地？」
「記得！初戀嘅嘢，一定記得。」
「所以，邊一樣重要D，你嘅感受，小儀嘅感受？」
「小儀開心，我就已經感恩。」
「咁你有答案未？」
喝個爛醉的Ocean模糊不清，左右搖晃，昏昏欲睡。
「我想俾個天決定。如果罐啤酒拋得入垃圾桶，我就聽你講，如果我拋唔中，就放棄呢段戀情。」
這樣很兒戲，對吧？
將兩個人的戀情交給上天決定。
一點都不兒戲。
「好。」我答。
Ocean隨便一投，罐子完美地飛到垃圾桶裡去。
「決定左就冇得抵賴。」我說。
「記住，唔係你說服我，係個天唔想拆散我地。」Ocean笑著回答。
「隨便你點講啦，兄弟。同埋唔好飲啦。」
我扶著爛醉的Ocean，將他送到家裡去。
「死都要面。」我心中默念。
---------------------------------------------------------------------------------------------------------------------
「你放低我啦，你之後一定跛硬，亦都唔會救到我，我流血太多。」Ocean依然固執。
「你慳啖氣啦。我決定左嘅嘢好難改變。」我說。
「愚蠢，我唔會多謝你。」
「我唔需要你嘅報答。」
到現在，我已經弄不清，Ocean是真心討厭我，還是為了我的安危，才決意要我放棄他。
然而，我決定了，要走就一起走。
也許，Ocean依然當我是小儀的殺人兇手，但我不會介意。
又是可惡的上斜。
每一步，都是撕裂的痛苦。
從骨折的右腳，到身體，再到意識。
畫面切成三、四分，一時重疊，一時分離。
模糊不清，視線以致內心，究竟我這麼努力地爬行，是為了什麼？接受命運，不就輕鬆多了？
腦海的聲音告訴我，我熬不住了。
可是，觸電的痛感讓我精神抖擻。
痛醒，大概就是這種意義吧。
我幾次頭腦昏闕，雙腳無力，半跪在地上。
身體僅餘的意志，加上Ocean的叫聲，支撐我繼續行走。
感到絕望的時候，希望就會出現。
感到希望的時候，絕望就會出現。
希望和絕望，是天堂和地獄的無限輪迴。
悲哀、可笑吧。
即使如此，我都要堅持下去。
不是為了自己，而是為了其他人。
我重視的人。
驀然，光芒刺痛雙目。
出口？
一線光，半點隙縫。
日出？
瞥見手錶的數字，六時半。
看來猜對了。
地面。
「居然見到太陽……」Ocean虛弱地說。
我已經沒力氣回應。
沒有一點興奮的感覺，只有痛苦，煎熬。
行百里者半於九十。
剩下的數步，才是最艱鉅的。
「一步就好。」
每一步，我都跟自己說。
這一刻，已經感受不到右腳的痛楚了。
身體變得輕飄，全身肌肉都放鬆下來。
我隨隨倒下。
「頂住呀！！！！周達隆！！！！」Ocean用盡餘下的氣力，高呼我的名字。
我看了他一眼，只見淚流滿面，還有……
切斷一半的左腳，搖搖欲墜。
恐怖、血腥，又很淒慘。
我重新站立，背起他。
終於，來到隙縫面前了。
鐵鏟，要發揮最後的功效。
我掘掉一片泥土，更刺眼的白光透入石洞裡。
掘出一條路，從古墓裡爬出來。
掘出一條路，從墳墓裡爬出來。
一個大洞出現眼前，地面的空氣撲面而來，非常舒暢。
體力宣告透支，我倒在混雜的樹葉堆上，一動不動。
「嘟……」
「咳咳……喂，呢度……要救援……」Ocean的聲音。
我合上眼睛，等待。
白光湧入視角，然後，取而代之，黑暗。