自掘墳墓: 外傳：小儀

11月29日        17：25
 

班房剩下Ocean一人，正收拾桌上的圍棋。

「咩……『你雙眼好靚，不過我對眼更加靚，因為我嘅眼神裡面全部都係你』得唔得架？」Ocean心想：「仲有嗰句『我真係花心，因為你每一個表情我都喜歡』聽落去勁肉麻，點講出口呀？塔隆係咪玩我架？唔得嘅話一定要打死條友。」

要Ocean說這些話，簡直是一大挑戰。即使不是渾身是膽，都得有很大的膽量。

這時，小儀進入班房。





「個樣咁愁嘅？諗緊功課嘅嘢？」

「唔係……其他更重要嘅嘢。」

「哦。」

Ocean和小儀，都是棋藝學會的幹事。

不過，Ocean自薦擔任幹事的角色，單是為了增加與小儀接觸的機會。





「今次聚會用左好多棋呀，我幫你手收棋啦。」

接著，小儀收拾另一張桌子上的象棋。

花上二十分鐘的時間，兩人才收拾好班房。

Ocean不時偷看小儀。

可愛的馬尾、清麗的面容、晶瑩的雙目。





讀書卓越、彬彬有禮、熱心助人、溫文爾雅。

一個完美的人。

就在身邊。

然而，Ocean不是在想，如何擁有這麼吸引的她。

而是想著，如何哄她笑。

如何好好地照料花朵，讓她永遠絢麗。

守護、寵愛。





「話說，你鍾唔鍾意捉棋？」Ocean問她。

「鍾意呀。」小儀微笑回說。

小小的微笑，溫暖著他的手掌心，再延伸到內心深處。

是緊張？

談上幾句話，為何就會緊張？

「我都鍾意，哈哈。」

一時之間，Ocean不知如何答話。

小儀微笑的樣子，永遠刻在心中，魂魄裡。





「梗係啦，大家都係棋藝學會嘅幹事呀嘛。」小儀說。

「但係，你點解會鍾意？」

「鍾意有得解嘅咩？」小儀回答。

對，喜歡沒有原因。

也不用原因。

「我都覺得鍾意係冇原因嘅。」

這一句，他的眼睛是對著小儀清純的樣子。





明眸的雙目，像是黑洞一樣，將Ocean的內心牢牢吸過去。

明眸的深處，又是怎麼樣的想法呢？

他決定，親自試探。

「話說，小儀？」Ocean鼓起勇氣，按著後腦：「你12月31號得閒嗎？不如一齊出去倒數睇煙花？」

說完，跳動的內心掩蓋所有聲音。

時間彷彿靜止。

這次，溫暖由心而發，延伸到手掌心。

一句否定的說話，就會粉碎所有美夢、所有盼望。





埋藏心意，或許就能長久活於甜蜜的夢境中。

可是，他決定相信。

曖昧，已經好一會兒了。

該像個男子漢般，大膽面對。

「吓？唔……一月要考試呀。」

小儀的臉色，夾著一份錯愕，卻又有說不出的喜悅。

害羞的女孩子。

害羞的男孩子。

青春的愛情，大概就是這樣。

害羞而天真的美好、浪漫。

「吓？」Ocean呆在原地：「溫書……遲少少先都唔怕啦，年尾點都要休息下。」

一刻，他真的以為小儀拒絕了他。

小儀面紅耳熱，低聲細語：「唔……一晚應該可以嘅……」

「真係？」

「唔……」

「我聽唔到呀。」

「我，應該……」

「應該，點？」

「好呀……」

小儀微微點頭。

「哈，多謝你呀……」Ocean幾乎就要興奮得跳起來，但也識趣地忍住了。

「點解多謝？」

「幫我收拾好班房。」

「哦。」

「咁一齊行？話說學校前面間雪糕車好似未走。」

「好呀，而家都未到補習時間。」

他們一起，離開班房。

「你雙眼好靚，不過我對眼更加靚，因為我嘅眼神裡面全部都係你。」

「嗯？你講咩話？」

「冇嘢，留翻遲下先講啦。」

「懶神秘。」

實在是可愛的一對。