跑左九條街之後, 我同采兒最終喺蒙民偉大樓既天台停低左。 

「嗄…嗄…總算賣甩左保安嬸嬸既大追捕喇。」我氣喘連連道。 

「哈哈, 好刺激呀!」采兒跑到成塊面紅卜卜。 

「坐低抖下先啦。」我點煙道。 

「又食煙?」采兒皺眉道。 



「跑到身水身汗, 呼吸下都得掛。」 

「哼!」采兒賭氣擰咩面, 但下一秒就大聲道:「你睇下,好多星星呀!!」 

我望上天, 幾乎成個天空都鋪滿左星星。 

「好靚呀!」采兒索性大字形咁訓左係地上面欣賞。 

我雙手擺頭咁訓左喺佢隔離, 咬住煙頭道:「梗係靚家,中大呢個山卡啦地方附近又無咩燈, 所以我地睇到既星星亦都特別光。」 



采兒望住我道 :「有我陪你己經唔寂寞啦, 做咩仲要食煙?」 

唔知點解,我唔係好敢同佢既視線相對, 於是就望番上個天隨口道「 o靚妹妳仲細, 唔識咁多野家啦。」 

「我又食。」采兒反轉個身, 搶左我枝煙。

「唔好呀!」我未來得切阻止, 佢己經吸左一啖。 


只見采兒既視線即時變得散渙, 四肢亦無力地垂低。 



「嘻嘻…點解我見到好多唔同顏色既波波…係個天上面浮既…」采兒傻笑道。 

「傻妹, 我呢枝大麻來家, 妳煙都未食過就隊草, 見唔到獨角獸咪算妳好彩咯。」 

「嘻嘻, 好開心呀, 但係又好暈呀…」 

就喺我手足無措既時候, 我突然打左個冷震。 

我好清楚,每次Eric用耳機聯絡我都會出現呢個先兆... 

「做得好, 即刻帶條女返來總壇!」Eric 興奮道。 

「大佬!我仲未出Camp家喎!」 

「你將條女帶去火車站, 我地自然會有人去接佢。」 



「咁…咁…」我個腦好亂。 

「唔使講咁多, 隻腳己經出發左啦。係咁。」Eric「 do」一聲就中斷左聯系。 

「喂! 咪住呀! 喂!」 

采兒伸手撫摸住我塊面, 迷糊道:「忽得....其實你係因為無咩朋友先要成日自言自語呀。唔緊要家, 最多以後我陪你多啲吖...」. 

「妳快啲醒返先啦!o靚妹!」 

「嗯…好眼訓…」 

望住采兒純潔無邪既面孔, 我百感交集。 



「屌!」 

咬一咬牙, 我就將佢抱起向山下面走去。