水戰過後, 我成個人唔知做咩, 硬係覺得好心煩意亂。 

「我要去疴屎。」未等組爸答覆, 我一個人就離群行開左。 

我喺附近搵左一個暗角位踎低。 

確認左身邊無人之後, 我就攞左包煙出來。 

呼…… 



Cher左一大啖煙, 我個心先至舒服返啲。 

究竟係我度煩咩呢? 

未收到o靚? 

未拉到女? 

又好似唔係咁簡單…… 



「哦! 原來你喱埋左係度!」采兒突然喺我身後出現。 

我第一時間想將枝煙彈走, 隨即心諗, 我做咩要介意一個妹妹仔點睇我啊, 於是道:「o靚妹妳唔好行過來呀, 費事啲煙臭親你。」 

「你有心事呀?」采兒企左係我隔離道。 

「痴線, 做咩咁問?」 

「我爹地話男人好多時呼出既唔係煙, 而係寂寞。」 



「叫你呀爸上少啲高登啦。」雖然我都覺得呢句說話好有道理。 

「講個秘密你知吖。」采兒突然道。 

「嗯。」我又吐左口煙。 

「你咁冷淡家, 無興趣知就算。」采兒轉過身就想走。 

真係俾呢條女玩死。 

我扮哂誠懇道:「求下妳講啦, 妳唔講我今晚一定會訓唔著家。」 

「嘩, 咁嚴重?! 睇來你既好奇心好強喎!」采兒好明顯信以為真。

「快啲講啦, 我依家…就覺得好…辛苦……」我捏住自己條頸, 扮呼吸困難道。 




「好喇好喇, 我講喇。」采兒低頭怕羞道:「 其實之前喺辮子路,你抱我上山果陣時,我已經醒返家啦…」 

「點解你要繼續扮暈呢?」 

「我想...俾你抱多陣吖嘛……」 

望住佢紅暈滿面既表情, 我心入面突然泛起一種甜絲絲既異樣感覺。 

「喂, 你地兩個係度做咩呀?!!」一名保安攞住枝電筒行左過來。 

我即時將個煙頭彈出外太空。 

佢一行近,我就認得原來係晏晝帶我去入學講座既保安嬸嬸。 



「又係你個死仔, 咁夠膽喺校園入面食煙?! 你睇唔到後面個標誌寫住啲咩家?!」保安嬸嬸用電筒照住我身後個牌道。 

個牌寫住:Smoke Free Campus 

「喂, 唔好蝦我唔識英文喎, Free 既意思唔係自由咁解咩? Smoke free Campus 咪即係可以好自由咁食煙既校園咯。」我理直氣壯道。 

「你個衰仔仲係度強詞奪理!」保安嬸嬸嬲到震, 喝道:「攞哂你地啲學生証出來!」 

明明唔關采兒事,但係佢都好乖咁伸手去摷自己個袋。 

「喂! 呀嬸妳睇下! 係苗橋偉呀!」我指住遠處嗌道。 

保安嬸嬸一聽即時好興奮咁擰轉頭。 

對於上左年紀既師奶, 三哥果然仲好有吸引力。 



「o靚妹妳仲望?! 我昆佢家喳! 快啲走啦!」我拖起采兒隻手極速逃走。