[HiHi喇] 大佬叫我入大學收兵......: (28)

「咩話, 你係黑社會卧底?!」飛機驚訝道。 

「無錯。」我緩緩點左口煙，繼續道：「大佬派我混入校園，叫我用盡一切辦法同你地班大學生喺O Camp入面混熟。」 

成班影團同飛機一面不信咁望住我。 

我唔敢同佢地既目光對視，於是擰轉左個頭自顧自食煙。 

飛機率先反應過來，問道：「咁我地依家熟左喇，你想點呀？」 





「跟據原本既計劃，下一步我就要收你地做o靚，然後帶哂你地番去總壇見我大佬坤哥。」我吐左口煙道。 

「我地呢班仔你都仲可以話收番去劈友收數者，點解你又要親近采兒呢?」飛機仍然未能信服。 

我坦白道：「正確啲來講，我收到既order其實係, 男既收番來做靚，女既拉下海做雞。」 

聽到呢度, 一直踎喺地下休息既采兒此時好傷心咁喊起上來。 

飛機搖頭道：「咁又難怪佢既，自已條仔最終既目的竟然係為左昆自已去做雞，換轉係我都唔知點做人。」 





「我喊唔係因為呢樣野啊！」采兒突然企起身嗌道：「我喊係因為我聽爹地講過，如果忽得喺聽日出camp之前都招攬唔到一班新人既話，佢大佬就會派人追殺佢家喇！」 

我連忙道：「呢層唔關你地事，我自有分數。」 

「但係.....」 

采兒未講完句說話，就有一架警車駛左埋來。

只見有兩名警員極速咁跳左落車。 





其中一個剪陸軍裝既呀sir道：「嘩，果邊間OK玩爆炸，呢邊就玩劈友?! 做咩呀？你地班死o靚仔想喺末日之前搞幾單大野出來啊？」 

采兒心急道:「警察哥哥，唔係咁家...」 

個呀sir一睇清楚采兒個樣，即時問：「咩唔係啊？妳叫咩名啊？有無Facebook啊？三圍幾多呀？」 

點知采兒真係好老實咁答：「34....」 

我插嘴道：「呀sir，唔關佢事家...」 

個呀sir又問：「咩唔關佢事呀？你邊位呀？身份證呢？，有無案底呀？」 

屌，問我啲問題又正路咁多。 

正當我想將所有野和盤托出既時候，飛機截住左我，搶先道：「其實我地係中大既學生來家，呢個只不過係迎新營其中一個環節來既者。」 





呀sir不屑道：「你以為我第一日當差啊？玩O Camp會玩到成身血既咩？！」 

飛機鳩嗡道:「哈哈，你有所不知喇，呢隻game叫做「血滴子」。」 

「血滴字？！」呀sir一面錯愕。 

「係呀。」飛機轉一轉眼球，繼續亂吹道：「其實個game全名係「揮灑鮮血的青年學子」，即係類似人地立投名狀咁，都係啲滴血為盟既儀式來既者。」 

「我係咪suppose要信你呀？」呀sir撓起雙手道。 

「係真家！我地真係大學生來家。唔信你問下佢吖？」飛機指住其中一個戴眼鏡既影道：「呢位仁兄仲要係高考尖子來家。」 

叫尖子既影即時和應道：「係呀，我有帶A Level張cert出來添呀，唔信你睇下喇。」 





尖子一講完真係係喺個褲袋度拎左張高考成績表出來。 

呀sir一睇，讚嘆道：「勁喎，真係攞足六條A喎，但係點解你隨身攜帶住張cert咁戇鳩既？」 

「咩戇鳩呀，攞來溝女好好使家，雖然一次都無成功過....」尖子失落道。 

個呀sir既partner此時道：「咪同呢班傻仔搞咁耐啦，果邊單爆炸大鑊好多，我地都係過番去睇下咩環境啦。」 

「哂我時間，浪費哂納稅人啲錢。」 

個呀sir屌左一聲，就連同佢既partner跳番上車走左。

我將口煙踏熄, 問道「做咩要維護我？」 

飛機答道：「忽得你明知會俾人追殺都講個真相俾我地聽，我地無理由唔撐你既。」 





我冷笑左一聲，問：「撐？點撐啊？」 

飛機好古惑咁笑左一笑，道：「我地一於來個反間計!」 

「反間計？!」 

「無錯！」飛機吞一吞口水，興奮道：「我地呢班人一於扮住係你條o靚先，然後跟你返總壇，之後再好似尋晚玩水戰咁乘機發難，到果時你就搵機會隊冧你大佬。」 

尖子失笑道：「哈，你真係睇寒戰睇上腦，就憑我地幾條手無膊雞之力既蛋散就想暗殺人地黑幫既大佬?! 諗撚多左啦大組長。」 

飛機見我唔出聲，於是問：「忽得，你點睇啊？」 

我好平靜咁答佢： 「如果可以搵到一個人，我覺得你條橋未必行唔通。」 





飛機見我竟然會支持佢呢個天馬行空既計劃，即時好high咁問道：「咁我地究竟要搵邊個呀？」 

我捏一捏拳頭, 大聲道:「就係要搵出警方派入校園既臥底!」 

見佢地聽到一舊雲，我接住解釋道：「我有可靠既消息，啲差佬都派左個卧底入來中大扮學生，目的就係想打擊校園三合會活動。如果我地可以搵佢出來, 同佢聯手合作，飛機個plan或者真係行得通。」 

尖子嘆氣道：「話到明係臥底，邊有咁易俾我地搵到吖。」 

我笑左笑，高深莫測道： 

「我好可能已經知道左個臥底既身份。」