[深夜重口味] 黑色蒲公英: 點解講對唔住?

話說 Rebecca 十年前一封 e-mail 推動我重新面對 Joyce...

終於返到屋企門口。
依十幾個鐘認真難捱，尤其杜拜等轉機果幾個鐘，坐又唔係，瞓又唔係。
原因係 Joyce 嘅 whatsapp。
臨離開吉達前我對佢講我愛你，佢只讀不回。
好奇怪，平時雖然只係寒暄問暖，佢都會覆我。
點解呢次唔覆? 唔通佢介意?
今時今日佢已經係富婆，但我仍然只係打工仔，邊方面都襯佢唔起。
不過第一日識佢佢已經嚮我之上，點會依家先介意身份高低?


而且當我離開時，佢話會等我。
不過冇諗過要等十年啩? 時間係女人永遠嘅敵人，我憑咩要佢等咁耐?
加上佢身邊唔會冇其他男人出現啫? 畀人乘虛而入，我怪得邊過?
我諗我要做好心理準備，隨時面對我接受唔到嘅現實。
叮噹，叮噹。
心跳得好快，氣喘得好速，血行得好急，我就快被壓死。
不過過咗兩分鐘，冇人應門。
出咗去? 搬咗?
好後悔頭先冇嚮樓下問清楚管理處，個管理員我未見過，不過佢亦冇查問我，由得我跟其他住客入嚟，真係離譜。
叮噹，叮噹。


再等多兩分鐘，都係冇人。
我嘗試拉低門柄... 冇鎖! 度門冇鎖!
心跳得好利害，點解唔鎖門? 如果 Joyce 已經搬走咗，我就係入屋打劫，十年冇返，一返就坐監，值得咩?
唔顧得咁多喇，慢慢推開門，有燈光，入面有人!
但依家已經太遲，唯有繼續打開門。
有人企嚮玄關後面，佢係...
「Joyce!」
佢雙手掩面，嚮度喊緊。
「Joyce，我返嚟喇。」
「對唔住，Alan。」


嗯? 點解講對唔住?
佢著住一套杏色晚裝，上面有黑色喱士，我係咪見過?
「Joyce，你係咪要出去。」
「對唔住。」
「點解講對唔住? 我走咗咁耐，應該我講只啱。」
我行埋去，輕輕扶住佢條腰。
「Joyce，我以後都唔會再走。」
雖然佢雙眼水汪汪，個妝又化化地，不過依然明艷照人，可以話同十年前，唔係，係二十年前一模一樣。
「點解你好似一啲都冇變過?」
佢溫柔地望住我，我想錫落去，但佢避開。
當我望向主人房。
「唔好，唔好入房。」
有人嚮入面?

<< 未完待續 >>