[深夜重口味] 黑色蒲公英: 係咪好寂寞?

話說經過十年，我再一次企嚮到 Joyce 面前，但佢反應有啲異常...

房入面有男人?
可能早有心理準備，我壓制到自己唔衝動，心入面冇忿怒，只有難過。
機會係自己放棄，我點可以怪 Joyce?
不過望住心中最愛，冇辦法灑脫地放手。
我將佢整個人攬住，感受身體嘅渴望與無奈。
「對唔住，Joyce，我返得嚟太遲，不過有好多野想同你講，如果依家唔方便，可唔可以遲啲再見你?」
其實我都唔知自已去得邊?
突然佢緊張地攬實我...


「Alan，唔好走。」
吓?
「陪我跳舞。」
佢拖我去客廳，開著音樂。
「我十年冇跳過喇。」
「我都係。」
老實講我已經完全忘記點跳，但神奇地身體好似自己識思想，拍子早寫入神經網絡，肌肉自然識作出反應，完美地帶住 Joyce 起舞。
但我嘅焦點無可避免集中嚮主人房門口，房入面係邊個?
點解唔光明正大企出嚟? 夠膽搶我嘅女人唔敢面對我?
本來消失嘅怒氣漸漸聚集。


突然 Joyce 嘅俏臉被眼淚劃過。
「Alan，對唔住。」
我停低，再一次攬住佢，怒氣全消。
「你冇對我唔住，係我難為咗你。」
「Alan，呢十年嚟我每一刻都諗住你。」
「我都係。」
「每次收到你嘅 whatsapp，我都睇完又睇，不過唔敢同你講太多，怕忍唔住會求你返嚟。」
「你係咪好寂寞?」
所以果個男人先得手?
「不過，Alan，我已經好幸福，至少我聯絡到你，知道你嚮邊，知道你發生咩事。」


嗯?
「但係之前果十年，我音訊全無，你當時一定好痛苦，等待一個唔知幾時返，甚至未必會返嚟嘅人，如果唔係親身體會過，冇辦法明白過中感受，對唔住，對唔住...」
我好混亂，唔係話有第二個男人所以向我道歉咩?
我憐惜地掃佢背脊，安撫佢嘅情緒。
「Joyce，依幾年我學識只記住開心嘅野，忘記唔開心嘅事，如果唔係，一早被沙地班懶鬼同事激死咗喇。」
佢笑一笑，我靠埋去啜去眼角嘅淚水，佢冇抗拒。
「你嘅味道依然冇變。」
佢面紅起嚟，我趁機扶住，嘴對嘴，錫落去。
得喇! 錫到喇，房入面嘅男人，你睇到未?
淺吻之後，我要再下一城，同 Joyce 入房。

<< 未完待續 >>