[HiHi喇] 好地地落街食枝煙, 點知.......: (19)

我呆望著凱琳跑走的方向，耳朵彷彿還能夠聽見她的哭聲。

而家強的口水，則沿著我的鼻子流到了我的下巴。

「抺左佢啦，」翠思彎下身遞給我一張紙巾，「你睇下你依家似咩樣。」

「嗯...」我腦海中空白一片，竟忘了伸手去接。

翠思輕嘆了一聲，便蹲了下來替我抺去臉上的口水。



可是她的眼角，卻不斷有淚水流下。

「Tracy…我...」

「咩都唔好講....」翠思痛苦地閉起雙眼,「我咩都唔想聽。」

「我唔係有心要瞞住妳家.....」縱使氣息不順，但我總算找回了說話的能力。

「你無必要解釋。」翠思極力保持著平靜的語氣。



「有必要,」我誠懇道:「我知我一腳踏兩船係唔岩，但其實我已經決定左放棄Helen家啦。」

「放棄Helen?」

「嗯, 」我點了點頭，「橫掂家強咁鐘意佢，我倒不如退出成全佢地啦。」

「咁點解你頭先要應承Helen，話自己唔會離開佢?」

事到如今，我只好硬著頭皮道:「果時係因為我見佢可憐，所以先講大話呃住佢者.....」



「即係你對Helen唔係真心既？」

「嗯......可以咁講.......」

聽完我的說話，翠思深深地呼吸了一口氣。

當她張開眼晴的時候，我發覺她的眼神變了。

變得更難以捉摸，更難以接近。

只聽她淡淡道:「你講完未?」

「係真家!」我用力地捉著她的手道：「Tracy 妳信我啦!」

「信你?」 翠思掙脫了我的手，緩緩站了起來。



我連忙爬起身來，抱緊她道:「妳原諒我啦，我唔會再呃妳家啦。」

「唔好攬住我，」翠思微微將我推開。「我同你唔係好熟。」

她越裝作陌路人，我便越害怕。

「Tracy 妳唔好咁啦...」我哀求道:「我寧願妳打我鬧我，都好過妳依家咁呀。」

「我依家點呀?」

「好似唔識我咁咯。」

「點會呢，」翠思笑道:「你叫呀輝吖嘛。」



我知道，我快要失去她了。

我馬上從行李袋裏抽出兩根迷幻星，問道：「妳認唔認得呢樣野呀?」

「認得又點，唔認得又點？」

「我特登係安全屋帶返來家，」我故作興奮道:「不如我地返到香港一齊玩啦。」

「香港唔可以放煙花。」翠思無動於衷, 「你仲有無野講?」

沒想到一番心機，竟換來如此冷淡的回應。

「無啦!」我狠狠地將煙花扔到一旁，發脾氣道:「妳就當我自作多情啦!」

翠思怔怔地望著地上的煙花，突然問道:「其實喺你心目中，我同凱琳你鍾意邊個多啲？」



「咁梗係....」

還以為自已可以答得很爽快，但當我想起凱琳溫柔的笑容時，我竟然猶豫了。

「算啦，」翠思憐惜地看著我，「既然你到左呢一刻都做唔到決定，就証明我地兩個都唔係你真心鐘意既女仔....」

「唔係咁家...」 我的喉嚨像被甚麼噎住了。

「同你玩返第一個字既遊戲吖。」 翠思微笑道。

不知道她為何有此提議，但我還是順著她的意願點了點頭。

只聽她幽幽道:「有時候事情就係咁，」



「有」

「明知呢個世界唔會有好男人，」

「明」

「但我都會忍唔住問自己，」

「但」

「我鐘意既人係邊個....」

「我.....」

說到這裏，翠思已泣不成聲。