愛在香港，食在英國: 序章

老實講，喺外國留學嘅人，一到weekdays嘅夜晚，難免覺得寂寞難耐。加上我本性愛靜，主要嘅schedule都係返學、食飯、做占、打LOL同上高登。

我寫序嘅喱一晚，高登首頁全部link都紫晒，LOL升咗金之後無乜意慾去再玩。

我喺Facebook Chat果度係咁搵，睇下香港有邊個朋友未瞓。

用mouse轆轆下，見到一個熟悉嘅名隔黎著住綠燈加埋一個「Web」字。(非崇洋扮ABC，當年英文老師係咁屌我英文考試D成績，我谷鬼氣將手機、電腦介面同Facebook全部轉做英文版黎練英文，用用下就幾年)

「Jenny，咁夜仲未瞓？」我輕輕按上幾個字
「嗯，趕緊project，你呢？咁好死搵我做咩？」Jenny一向係「秒回」嘅人




「喱邊真係好鬼悶，一到夜晚除左bar同club，大部份舖頭都關鬼晒。」
「哦，悶先黎搵我打發時間？」
我send咗個類似sosad嘅icon畀佢︰「梗係唔係，特登搵你談心。」
「算吧啦，你估我唔知你點諗咩LOL。」(佢一向將LOL當表情符號用，我嘗試糾正過佢LOL係解laugh out loud，不過佢一句「你理得我LOL」就秒殺咗我)
Jenny繼續講︰「你有冇睇高登某個故(佢喱個嗜好係被我感染)，寫得幾好。」
我︰「哦出軌果個，追到live，幾好睇」
Jenny答︰「你咁得閒，點解唔寫下故呢？以前你成日都呻悶，我次次都叫你不如寫下野打發日晨。」
「以前我有寫過架，不過寫寫下爛尾，冇恆心。」
「才子，以前作文咁勁就唔好晒嘛，你肯寫，我唔介意做女主角架。」





悶到本身心如止水(死魚)嘅我心頭一震，好懷念「才子」喱個稱呼（當然我並非啲咩才子，濕鳩就有我份）。多年回憶驀然湧上腦海，我望一望釘在hall房牆上嘅班相，就決定動筆（鍵盤）。