愛在香港，食在英國: 第一章

從香港飛來英國，國泰直航需時半日；思緒由英國飛回香港，只需半秒。

喱年我中四，開學日最興派下通告，收下啲暑期作業，冇咩特別，唯一令學生哥興奮嘅事一定係編位。

有人話，最理想嘅位前中後必須要有三種人：搞笑嘅朋友坐前面、女神坐隔黎、而成績好嘅同學坐後面。

世事邊有咁理想，不過當時個位都唔錯，我前後隔黎都係死黨，大家玩開，上堂冇咁悶。

每學年嘅九月，學校入面啲XX學會都會吸納下新會員（個人認為最抵屌一定係棋藝學會，個個星期都開間房畀你捉棋，入會費唔記得十蚊定廿蚊，不過入面男女比例一定衰過Engine），唔同社又會派name list去高中啲班度招人去in committee。





喺我班入面有樣野玩咗幾年都唔悶，就係亂喺name list tick朋友啲名，幫佢地join啲九唔搭八嘅野（例如幫啲說話考試次次都仆街嘅朋友join朗誦或者public speaking）。而我，畀隔黎條仆街襯我去廁所果陣tick咗in社嘅committee，我戇居居等到post咗interviewee list先知畀人玩。

我中學用顏色分五個社，每年啲咩陸運會水運會都鬥餐死，而我對於我個社嘅歸屬感係零，最多每年水運會走去幫手游下接力。我去interview果陣真係R爆頭，唔知講乜鳩好。我盡量回憶返Jenny in我果陣嘅對話。吖，唔記得講，Jenny同我同社，中一同班，大家叫做熟。佢好迷參加社果啲活動，畀佢戇戇鳩鳩中三果陣選贏咗下年（即係佢同我中四果年）做副社長。

Jenny：「咦，王儒懿，乜你好玩社嘅活動架咩？」
我答：「Er...中四，乜都試下囉。」（我果陣好想講「屌，你估我想黎？」，但當時個社長都有份in，當然唔會咁講）

之後個社長同Jenny都問咗啲好typical嘅問題，例如啲咩「你認為自己有咩talent」、「你expect你幫到個社啲咩」果類。我一路答，一路望住Jenny條仆街偷笑。

老老實實，我而家諗返起我覺得果陣我係Hea答，點知畀人（我諗係Jenny掛）揀咗去做swimming section嘅committee。所以話，學校真係社會嘅縮影，識人好過識字，好似而家搵intern咁，唔駛張沙紙要好靚，識人就夠。