弊家伙，閻羅王唔見左!: (十九)

(十九)
九叔豎起大姆指，對白糖糕的判斷力表示讚賞，道:「冇錯!大三元應該喺第一次掃場之後，先有安排內鬼嘅決定，而第二次行動就已經成功按排左，兩次行動之間只係距離兩日，會唔會太快?」

史努比會意道:「你意思係對方能夠係咁短時間搭上人和組嘅人，令佢成為內鬼，本身雙方已經有一定聯繫?」

九叔點頭道:「仲有，對方係招攬內鬼呢件事上係一擊即中，一來我冇收到有手足報告被拉攏，二來亦都冇手足被人滅口，所以呢個內鬼本身同大三元應該有好深厚嘅關係!」

我這時才明白九叔的意思，道:「所以你先覺得我同史努比嫌疑相對細，因為我入呢行冇耐，而史努比就係埃及黎左香港好短時間，同大三元有聯繫嘅機會低。」

九叔嘆一口氣道:「可以咁講，更重要我想借用史努比嘅天秤!」





史努比一改平常的樣子，一臉陰森的道:「你應該知個天秤點用，而且喺呢度我冇權咁做!」

「等等先，咩天秤?究竟咩一回事?」，我問道。

白糖糕再次展示他的知識，道:「相傳阿努比斯係負責審判亡靈，佢會將亡靈嘅心臟扯出黎，放上天秤嘅一邊，而另一邊就放上代表真實嘅瑪特羽毛。如果心臟比羽毛重，就代表亡靈係有罪!」

我嚇得臉色蒼白道:「監生扯個心出黎?咁咪渣都冇得淨?」

史努比用令人心寒的口吻，道:「當然有辦法扯個心出黎，而個人又唔洗死，亡靈亦都唔洗魂飛魄散啦，不過我諗到時你會寧願揀死!」





九叔點點頭:「我明，所以用天秤會係最後一步，如非必要我都唔想用!」

史努比的不滿略為減少，道:「係咁就最好啦!你想點查法?」

九叔聳聳肩表示還沒有具體想法，白糖糕搶著分析道:「其實我都有留意過下，有一點好奇怪，就係佢地撤退嘅時間好趕，明明平時會早喺行動前兩個鐘前Briefing，以佢地走佬嘅時間就只係早行動十至十五分鐘，點解個內鬼咁遲先通知佢?」

我點點頭道:「咁又係喎!雖說拉唔到啲大粒佬，但係啲細嘅都拉唔少，早啲通水其實可以一個人都拉唔到，咁咪損失仲細!」

眾人苦思了一會，仍然不明白箇中原因，九叔道:「算啦，諗番點查好過啦!白糖糕有冇咩計?」，很明顯在出謀獻策方面，九叔比較相信白糖糕。





白糖糕摸著自己的下巴道:「嗯……要明確搵到邊個係內鬼就難啲，不過要縮細範圍都冇問題嘅。嗱，下次行動就分開幾組做Briefing，每組掃嘅場都唔同，邊個場拉唔到人，果組就有內鬼!」

九叔用力拍著白糖糕的肩，道:「啊，死仔包，有啲計喎!」

如是者，九叔按照計劃行事，把整個人和組分為四組同時行動，但四組也無功而還，一切再次回到原點。