從西鐵醒返之後……: 16
「堅哥，停手！」
出聲嘅上個回合曾經見過嘅衛衣女……我記得好似係叫愛兒。
「愛兒……」被稱為堅哥嘅壯漢聽到聲音，馬上停下手。
愛兒望向我哋，低下頭講：「對唔住！係我無睇實佢哋，令佢哋搞咗咁多嘢出嚟！」
「……咩話？」我問。
愛兒抬起頭回答：「我哋原本有六個人，但已經有兩個人受到懲罰。假如再出局嘅話，我哋每人就會有四分之一機會會死……我哋已經接近窮途末路。」
「唔通你哋死就係人命，我哋死就唔係人命？」阿曉不忿咁講。
「我哋本身無諗過向你哋出手，係有個來自十四樓嘅人搵我哋，要求我哋聯手。」
……十四樓？
我向愛兒問：「你哋上個回合喺走廊度扶嗰兩個係咪你哋同伴？」
「係，不過佢哋……」愛兒支支吾吾咁答，「因為我太驚，所以上個回合寫咗佢哋兩個嘅名……」
原來係咁，真相大白，襲擊我哋嘅人係來自1609，而襲擊古朗嘅人係來自1409……
恐怕，呢場遊戲最後嘅敵人會係1409。
「真係好對唔住！」愛兒再次低下頭道歉，「我承諾唔會再對你哋出手！」
「愛兒！我哋唔需要同佢哋道歉，呢個遊戲就係咁，我哋都無得揀！」堅哥不忿咁講。
「佢哋講得啱……大家都係人命！」
嗰名叫愛兒嘅少女，佢嘅反應係我預料之外，無諗過主動停止紛爭嘅會係對方先。當然，亦有可能係因為佢哋剩返兩個人，知道人數上係劣勢，所以先主動妥協。
不過左思右想後，而家向佢哋報復亦無好處。
「呢件事就算數啦，其實今日嚟唔係搵你哋報仇，係搵你哋合作。」
「合作……？」愛兒疑惑咁問。
我見到佢哋嘅電視係漆黑一片，所以就知佢哋無接受特別挑戰，得到最終指令內容。
「我哋完成咗特別挑戰二，得到最終指令內容。」我將最終指令內容道出，「最終指令，係要寫一個人名落白紙上，而俾人寫咗名嘅人會受到懲罰。」
「……咩話？」愛兒驚訝不已。
「我哋搵你嘅目的，就係要合作突破困境。只要我哋所有人都唔去達成指令，就唔會有人因此而受懲罰，亦都因為所有房無達成指令，而唔會有房間出局。」我將我嘅目的道出。
「所有房間都唔達成指令……就唔會受到懲罰？」愛兒猶豫咁思考著。
「你講就係呀？點知你係咪想報復我哋，特登過嚟陰我哋呀？」堅哥反駁。
「如果你唔信，可以上去我間房睇。」我講。
「咁、咁……」堅哥頓時語塞，「就算係真咁又點，點知你哋會唔會叫我哋唔達成指令，自己就走去達成咗呀？」
「就算係咁，你哋本身都係要死一個人，差在係隨機定指定啫。」古朗嘅同伴運動男講，「定係，你哋心目中已經有人選？」
「梗、梗係無！」堅哥即刻辯解。
「我有一個諗法，一個絕對令人安心，唔會驚人背叛嘅方法。」我向堅哥講。
「係咩？」身旁嘅古朗疑問。
我將簿筆從褲袋拎出嚟，扔喺佢哋面前嘅茶几。
「只要將啲簿啊筆啊所有嘢收集埋一齊，再開窗扔落街，就唔使有任何煩惱喇！」
唔係溝通，唔係信任，唔係監視，唔係屈服，唔係威脅……係最純粹嘅野蠻方法。
我唔似駱譯咁聰明，又熟知囚徒困境，腦入面又多idea，我淨係知大家要合作，就必需要提出合理嘅理由。
其實，我開始對呢個遊戲感到疑惑……
遊戲每一步，唔係製造緊囚徒困境，而係好似誘導緊我哋去破解囚徒困境一樣。
「哈哈哈哈！」古朗聽完之後大笑起來，「呢個方法真係有創意！阿逸，我欣賞你！」
「只要手上無達成指令嘅物品，就唔使驚會有人背叛。」我講。
「好彩我都有帶住本簿同支筆。」古朗將佢哋嘅簿筆扔出嚟，「點呀，大舊衰？定係你真係無膽到連咁樣都會驚呀？」
「咁、咁……」堅哥滿臉通紅，一句話都講唔出。
「我哋會合作。」愛兒講。
「愛兒！」堅哥大叫。
「堅哥，我哋——」
就喺愛兒講緊嘢時，佢哋嘅電視突然亮起。
唔係掛……偏偏喺正呢個時機！
藍底黃字嘅最終指令顯示喺屏幕上，而且內容同預告係一模一樣！
「阿逸！」古朗大叫。
「我知道！呢度交畀你處理，我一定會阻止到1409嘅人達成指令！」
我二話不說，向房門跑去，經後樓梯跑落十四樓，而阿曉亦緊隨其後。
後樓梯沿住走廊有道長長血跡，我哋加緊腳步跑去，卻發現血跡延伸到1409門前。
唔通……！
房門並無關上，我將房門打開。
滴答滴答聲不斷響起，房內燈光昏暗，梳化上有個女人癱軟咁瞓喺度，而且手腕有道深可見肉嘅傷口，不停咁流緊血！
「佢生命跡象好薄弱，失血太多。」阿曉走上去睇。
雖然唔知道呢度發生過咩事，但對方好可能已經離開咗房間，去緊達成指令！
唔通……嗰道血跡就係對方留低！
此時，眼前個女人發出微弱嘅呻吟聲……或者重有得救！
我同阿曉講：「你睇住個女人，我去追！」
講完之後，我跑出房間，沿住血跡跑到後樓梯，跑落去過程中血跡一直延伸落去！
對方應該啱啱離開無耐，應該重趕得切！
果然，從轉角位望落去，隱約見到有抹黑影喺離我不遠處嘅下方跑動。
如果無記錯，指令預告中寫嘅唔係「1809目的地」而係「所有房間目的地」，換言之所有房間嘅目的地都係一樣，對方嘅目的地都係地下大堂！
我馬上加快腳步，但對方似乎亦發現咗我，開始加快速度！
「停低！」我大叫一聲，但對方無反應，繼續向下跑。
對方跑速並不如我，我同佢嘅距離開始愈拉愈近。
差唔多落到地下時，我終於見到佢嘅身影，係一個著住深藍色西裝，戴住無框眼鏡嘅人……
「李sir？」望見眼前嘅人，我不禁驚訝地叫咗出聲。
對方聽到之後頓了頓，然後停低轉身望過嚟。
「佟、佟逸霖同學？」對方亦露出十分驚訝嘅眼神，「哈哈！你都倦入咗呢場遊戲啊……？」
估唔到竟然會見到認識嘅人……李sir，係中學時期嘅班主任！
眼前嘅佢同我所認識嘅李sir判若兩人，記憶中嘅佢係一個著重外表，待人親切，善於同學生相處嘅好老師。
而家嘅佢頭髮凌亂，臉容憔悴，神情落魄，雙眼不時透出令人懼怕嘅視線。
「老師我啊……真係奮鬥得好辛苦，不過終於終於……」李sir拎出一張皺晒嘅紙，「只要我完成埋呢次指令，就可以終結呢場遊戲！」
「等等！唔可以放！」我諗起1409房內場景，不禁皺起眉頭，「你……究竟對你嘅同伴做過啲乜？」
「你話我老婆？」李sir歪頭問。
「你老婆……？」我十分驚愕。
「佢啊……多得我，佢上個遊戲先無死咋！你知唔知上個遊戲死剩我哋兩個人，唔係有我諗計慫容其他房嘅人，佢點有可能自己一個同其他人鬥呀！我幫咗佢咁多，佢梗係要為我犧牲喇！」
李sir舉起手上張紙，猙獰咁望住我。
「反正佢都半死不活，都唔知醒唔醒得返，不如就死咗去，畀條命我去過關！」
「你知唔知只要所有房都唔達成指令，就唔會有人需要受到懲罰！」我仍然嘗試說服李sir，「而家差你一個，只要你停手，包括你同你老婆在內所有人都可以平安無事度過呢場遊戲！」
「喔？咁又點？」李sir歪頭問我，「其他人關我咩事？」
「咩話……」
望住眼前嘅李sir，我明白咗一件事——
呢個遊戲中，會有同自己理念相同嘅人，會有為求自保不擇手段嘅人，會有一時驚恐而做出傻事嘅人……
而眼前呢個人，係已經被迫到黐咗線，有理說不通嘅人。
「總之我唔會俾你達成指令！」
我向李sir衝過去，而李sir轉身拔腿就跑，我哋沿住地下通道追逐，終於追到去地下大堂。
「哈哈哈！終於有第一批玩家到達……唔係，係兩批添！」有個戴住白色無口面具，身穿燕尾服嘅人企喺地下大堂。
而佢身後，大堂嘅正中央，有一個十分巨大嘅倒五芒星血陣。
「你係咩人？」李sir停下腳步。
雖然我唔知呢個面具人係咩人，但直覺已經將答案話畀我知——
「我係呢個遊戲嘅創辦人，名字先前已經同大家介紹過。」
「你……就係挪亞嘛？」李sir右手摸向褲袋。
「喔？都講咗喇，重要問！」挪亞唔耐煩咁答。
「來得正好……只要殺咗你，就可以從呢個遊戲解放！」
李sir從褲袋拎咗把鎅刀出嚟，向挪亞衝過去！
嗰把鎅刀，係血液嗰一個回合得到嘅物品。
挪亞雙手負後，從容不迫咁企喺原地，就喺李sir將要插中挪亞嘅時侯，忽然跪落地上，神情痛苦咁大叫。
「啊啊啊啊啊啊！」
「唔得喔！唔可以做出犯規嘅行為。」挪亞搖頭咁講，「原本犯規嘅人應該會受到懲罰……不過念在你係嚟達成指令，我暫且可以放過你。」
慘叫聲停止咗落嚟，李sir雙手撳地大啖大啖咁喘氣。
「你……係嚟做咩？」我警戒咁問。
「喔！我只係想觀望下人類為咗生存，可以做出嚟嘅事情。」挪亞答完我問題後，又望向李sir，「放心，我並無干預遊戲之意，只要將所需物品放落我身後嘅血陣，就可以暫時得到解放。」
李sir聽到挪亞嘅話，緩緩企返起身，將視線投落血陣上。
我察覺到李sir意圖，馬上大叫：「同我停手！」
但李sir無理會，拎住張紙直接向血陣跑過去！
我即刻從後將李sir牢牢抱住，將佢一同推倒地上。
「佢係你老婆嚟，你點解可以做得出咁嘅事！」
「你白痴㗎！唔係你死就我亡㗎喇！」李sir瘋狂地咆哮，「屌你老母！阻我者死！」
李sir用手肘撞落我個頭，我一時鬆開咗手，佢馬上騎落我身上，舉起鎅刀瞄準住我條頸！
千均一發之際，我捉住李sir握住鎅刀嘅手，刀尖就喺我頸上，甚至已經劃破咗我嘅皮膚。
李sir雙眼通紅，猙獰咁用力刺過嚟，而我用盡全力抵抗著李sir！
「我要殺死你！我要殺死你！」
李sir已經失去咗作為人嘅理性……但係呢刻我唔可以死喺度！
「啊啊啊！」李sir嘅手肘壓落我胸口上，痛到我差啲唞唔到氣！
胸口感到一片錐痛，進入肺部嘅空氣漸漸稀薄，意識亦開始模糊起嚟。
上面有好多人相信住我，等待住我，我必須要阻止李sir……
所以……我唔可以……唔可以……
「阿逸！」
喺我將近失去意識時，我聽到一聲吶喊——
呢道叫聲，就同我喺第一場遊戲，將要登上車門時所聽到嘅叫聲一樣！
「……夏舞！」
點解……點解夏舞會出現喺度……！