從西鐵醒返之後……: 17
夏舞出現喺李sir身後，雙手捉實李sir握住鎅刀嘅手！
「阿逸！快啲走！」
唔可以……危險……快啲走！
「邊個！」李sir另一隻手粗暴咁捏住夏舞條頸，將佢壓落地上。
「啊啊！」夏舞痛苦咁呻吟一聲。
「阻住我嘅人，統統都要死！」
李sir從我身上移開，將目標轉變為夏舞！
佢舉起鎅刀，向夏舞刺落去！
「同我停手！」
我捉住李sir握住鎅刀嘅手，用力將佢撲落地上！
噗哧—！
手心傳來溫暖嘅感覺，衣服傳來濕漉嘅觸感。
我起身一望，發覺手中嘅鎅刀不偏不倚插穿李sir頸部動脈，鮮血頓時噴出，濺落我嘅臉同衣服上……
「李sir……！」
李sir不敢置信望住我，一瞬間地下一片血紅。
隨住微弱嘅抽搐，李sir終於停下動作，再無任何反應。
我……我，竟然親手將李sir殺死……！
「無事㗎，阿逸。」
柔軟嘅觸感靠在我嘅背上，纖柔嘅雙手將我溫柔地抱著。
「阿逸都係為咗保護我，先逼不得已咁做。」夏舞無介意一身血髒嘅我，從後將我緊抱著。
我為咗唔俾大家再因為呢個遊戲而奪去性命，先做出如此舉動，但到頭來我要奪去他人性命，先可以達成目的。
一切……多麼可笑！
「……逸、逸哥！」
我望過去，氣喘如牛嘅駱譯企咗喺通道門口，驚訝得不能再驚訝指住我同李sir嘅屍體。
「發、發生咩事……點解會有人死咗……」
「我……殺咗人。」我如實道出。
「哈哈哈！」挪亞忽然開口大笑，「多謝佟先生俾我見識到如此精彩嘅一幕，不過你都唔使太擔心。反正呢個遊戲，唔係你死就我亡……不過結果你做嘅事都係無意義，你只不過係將殺人方法由懲罰，改變為親手執行。」
呢道笑聲，果然令我十分不爽。
如果要講嘅話……呢一切悲劇，元凶就係我眼前呢個人！
「我唔認為阿逸做嘅事係無意義……」呢個時侯，夏舞出聲反駁，「至少，佢救咗我嘅命，亦保護到其他人嘅性命。」
「其他人嘅性命？哈哈！」挪亞冷笑一聲，「就等我睇下係咪真係做得到！」
我、夏舞、駱譯同挪亞四人喺地下大堂靜待，時間一分一秒過去。
「逸哥，你個傷口……」駱譯擔憂咁望住我頸上嘅傷口。
「無嘢，皮外傷嚟。」我用手撳住傷口，不過鮮血仍然從傷口流出，「點解你同夏舞會落咗嚟……唔係，夏舞點解你會醒咗，你唔係應該……失去咗意識咩？」
「……失去意識？」夏舞好似唔知發生緊咩事，「我好似聽到開門聲，同埋有人入咗嚟我間房，所以就扎醒咗。」
知道實情嘅駱譯解釋：「喺逸哥同阿曉走咗之後無耐，夏舞就醒返出咗嚟，就喺嗰陣屏幕上嘅指令無啦啦由黑底白字轉變為藍底黃字！所以我、夏舞同修洛文就即刻搵你哋。」
李sir曾經講過，佢嘅房間得返佢同佢老婆，如果佢係有達成所有指令，佢老婆應該係處於昏迷狀態，但啱啱我哋去到1409時，佢老婆係有意識！
但係，點解只有夏舞一個醒咗，落嚟搵我哋呢？
「咁修洛文同阿曉佢哋呢？」我繼續問。
「1609個大隻佬堅決想達成指令，所以修洛文留咗喺嗰度阻止佢。」駱譯講，「阿曉佢留咗喺1409度，好似……有啲事要做咁，叫我哋落去先。」
「原來係咁。」
我將目光放回升降機同地下通道，今次嘅指令所有房間目的地都係地下大堂，如果有人選擇背叛，打算達成指令嘅話，佢哋就會出現喺我哋眼前。
不過，我相信大家。
或者，從一開始遊戲給予我哋「合作」呢個選擇，就係想引導緊大家去合作。
指令愈變愈殘酷，係想逼使我哋去思考合作嘅可能性。
血液嗰一個回合，話唔定係故意令我哋無法達成指令……畢竟指令要求嘅係容量唔係數量，對於點先為止137.5ml嘅血液，本身就無辦法完成，因為規則要求嘅係唔多唔少嘅物品。
呢個回台嘅真意，係想我哋明白到合作之後會得出咩嘅結果。
特別挑戰二嘅獎勵，係想將最真實嘅囚徒困境展現畀我哋睇，喺明確知道實際結果得失，我哋會嘗試去合作，定係繼續只顧自己利益。
當然，要得到特別挑戰二嘅獎勵，就必須要有無私嘅心，亦係解決囚徒困境嘅必要條件。
一切嘅佈局，都係考驗緊我哋願唔願意將性命置諸度外而合作。
而我哋選擇咗前者。
地下大堂並聽唔到廣播，而我哋就一直喺度等待。
唔知過咗幾耐，依然無人落嚟大堂。
啪！啪！啪！
挪亞突然拍起手掌，我哋三人愕然咁望住佢。
「的確值得稱讚，到最後都無人落嚟達成指令。你哋嘅遊戲已經完結，不過啊……你哋呢次嘅『合作』，依然付上沉重嘅人命代價。」
「呢個回合……已經完結？」夏舞驚呆咁問。
「無錯，而且唔會再有新嘅指令出現。」挪亞點一點頭，「唔信嘅你哋可以繼續留喺度，我唔阻止。」
挪亞又令我大開眼界，明明我哋都喺度，但係只有佢一個可以無廣播情況下都知道遊戲結果。
「喂，挪亞。」我問。
「喔？」
「我想問呢棟酒店係咪有廣播室？」
「喔？係就係，但實際上係透過我身上呢部對講機進行廣播。」挪亞舉起一部黑色嘅對講機。
「係咪全棟酒店嘅人都會聽到？」
「無錯，只要喺房間入面嘅人都會聽到。」
「可唔可以借畀我？」
挪亞遲疑咗一下，然後答：「喔……當然係唔可以——」
「末日熱線。」我打斷挪亞嘅話，「你講過，只要付出代價嘅話，你就會提供任何服務。」
呢番話，係挪亞喺電話中講過嘅嘢。
「哈哈哈！既然你提出呢點，咁我當然不得不應承。不過，代價將會非常大，你確認要咁做？」
「無錯。」
「咁呀……哈哈！好呀！」挪亞將對講機扔過嚟，「只要撳住最大嗰紅色掣就可以開始廣播……至於代價，你遲啲就會知道。」
我接過對講機，喺挪亞面前拎起。
「等等逸哥，我哋點知佢有無講大話？」駱譯講。
「絕無虛假，反正你哋想講咩都唔會影響到遊戲。」挪亞攤開雙手辯解。
「我相信佢無講大話。」雖然眼前呢個人十分唔可信，但事到如今我哋已經度過最終指令，佢無必要去欺騙我。
「阿逸，你想做咩？」夏舞問。
「我想……話畀大家知，希望依然係存在。」我撳下紅色掣，然後向住對講機講，『Testing、testing，大家好。』
雖然聽唔到其他人嘅回答，但只要聲音可以傳到去大家耳中就夠。
『我叫佟逸霖，係處於某間房裡面其中一個玩家。喺較早之前，我哋嘅房間收到最後指令。只不過，呢個指令嘅內容卻係一件十分殘酷嘅事情，呢個指令——就係要將同房嘅一個人名字寫落白紙，而被寫嘅人會受到懲罰。』
我感受到挪亞意味深長嘅目光，而我將話語接落去：
『我知道有人聽完之後會感到害怕，甚至恐慌，但我希望大家可以先冷靜聽完我之後要講嘅嘢。呢個指令表面聽落就係無論如何都要死一人，一係親手殺死，一係隨機懲罰，係一個點揀都會有人死嘅局面。然而，有一個方法可以既唔使殺人，亦唔會有人受到懲罰，就係全部房間一致唔去達成命令。根據規則，只要無房間達成命令，就唔會人會受到懲罰。不過，呢個方法——真係可行嗎？』
「阿逸……」
『假如有其中一間房嘅人選擇背叛，去達成指令嘅話，無達成指令嘅人就會受到懲罰。只要有人對其他人有咁樣嘅懷疑，即使係絲毫亦好，呢個方法就無可能做到……不過，咁樣就正中挪亞下懷，挪亞想睇到嘅係我哋互相殘殺，將我哋嘅性命視為為娛樂，所以我哋要搞清楚，矛頭要指向嘅人唔係自己房嘅人，唔係其他房嘅人，而係挪亞！挪亞先係呢件事嘅罪魁禍首，我哋唔可以俾佢稱心如意！』
「逸、逸哥……！」
『要相信毫不相識嘅陌生人係十分困難，但要記住我哋係人，擁有惻隱之心，擁有信任他人嘅能力。如果真係覺得害怕，就將其他房嘅人聚集去自己房度，聚集落地下大堂，將所有紙筆收集起嚟全部銷毀。要搏得他人信任嘅方法有好多，千祈唔好因為驚而去沾污自己嘅手，要記住我哋重有希望，唔可以俾挪亞稱心如意！』
我慢慢放開撳住紅色掣嘅手指，吐出最後一句話：
『我哋嘅遊戲已經完結，而你哋如果未開始最終回合嘅話，就好好諗清楚。我要講嘅係咁多，之後嘅道路就由你哋決定。』
我講完之後，就將對講機扔返畀挪亞。
我哋已經完結咗呢場遊戲，但我哋只係咁多組別之中其中一組，重有其他組別，佢哋可能都已經完結，又或者……即將會面對同樣嘅最終指令。
我想將「希望」傳達畀佢哋。
一旁嘅挪亞見狀，嘖笑一聲，然後講：
「你覺得咁樣就可以說服到其他組別嘅人咩？只要有猜忌，有私心，就無可能將人團結起嚟。」
「我只係做我力所能及嘅事情，說唔說服到……我相信大家都唔係好似你咁人渣嘅人。」
「偽善係救唔到所有人，你呢種只不過係無意義嘅舉動。」
「做唔做到，就由大家去決定。只要有人心，就一定可以……」
一定可以做到……
頭忽然變得沉重，身體變得軟弱無力。
「阿逸！」
眼前映像變得天花亂墜，雙耳響起耳鳴叫，連支撐身體嘅力氣都無，直接倒在地上。
唔通……呢個就係代價？
我隱約聽見模糊嘅叫喊聲，然後——
＊
第二層戰況總結：
【指令1】在60秒內將1件衣服放到指定目的地
出局條件：最慢的房間
達成房間：1009、1409、1809
無達成房間：409、609、809、1209、1609
※無達成房間出局
【指令2】在90秒內將5條頭髮放到目的地
出局條件：頭髮平均長度最短的房間
達成房間：609、1009、1209、1409、1809
無達成房間：409、809、1609
※無達成房間出局
【指令3】在10分鐘內將137.5血液放到目的地
出局條件：最慢的房間
達成房間：沒有
無達成房間：609、1009、1209、1409、1609、1809
※因所有房間無達成指令，沒有房間出局
※上回合409、809因懲罰而團滅
※此指令為不可能達成，因為挪亞能任意決定量度精準度
【指令4】在5分鐘內將1片指甲放到目的地
出局條件：最慢的房間
達成房間：1009、1209、1409、1609、1809
無達成房間：沒有
※因所有房間達成指令，根據出局條件，1209出局
※上回合609因自相殘殺而團滅（上回合609並無出局，因此團滅原因不是懲罰）
【指令5】在10分鐘內將半數房間內的人名字（或者暱稱）寫進一張白紙上，然後放到目的地
※白紙放到目的地後，被寫在紙上的人將會暫時失去意識
出局條件：被寫在紙上的人平均體重最重的房間
達成房間：1009、1209、1409、1609、1809
無達成房間：沒有
※因所有房間達成指令，根據出局條件，1209出局
【最終指令】在20分鐘內將房內一個人的名字寫進一張白紙上，然後放到目的地
※白紙放到目的地後，被寫在紙上的人將會受到懲罰
出局條件：沒有
達成房間：沒有
無達成房間：1009、1409、1609、1809
※因所有房間無達成指令，沒有房間出局
※上回合1209接受【特別挑戰2】的【標價3】，並付上代價，所有人因懲罰而團滅