當我哋準備搵鐵罐時,我發現好似有少少唔對路……

音樂,並無播出。

修洛文同鬼仔都察覺到呢個問題,面面相覷望住大家。

鬼仔率先道出疑問:「開始咗又唔播音樂,係咪發生咗故障?」

「無可能係故障……」我即時否定呢個可能性,既然有咁嘅能力造出超乎現實嘅遊戲,又點會發生咁明顯嘅故障。





「咁我哋而家可以點做?」鬼仔問。

發生預料之外狀況,鬼仔困惑企喺原地,修洛文一言不發望向山邊。

「唔通……」腦海浮現出一個諗法,「既然音樂停止後可以踩罐,咁我可唔可以將而家嘅狀況理解為,由一開始就停止咗音樂?」

「即係……」修洛文瞪大雙眼,佢已經明白我想講嘅嘢。

「而家只要見到鐵罐,就可以即刻踩落去!」我講。





「喔!」鬼仔恍然大悟,「咁嘅話我哋要快啲行!」

「無錯!」

啱啱跑完一大段路,體力仍未完全恢復嘅我哋不得不頂硬上,加速進度去尋找鐵罐。

狀況不容理想,喺咁大座山上面搵出一個細小嘅鐵罐係相當困難,而且消耗精神同體力嘅事。

由我醒返之後,就無見過路上有任何補給包,幸好嘅係修洛文同鬼仔都有拎到補給包,裡面有少量糧食物水,暫時解決到飲食嘅問題。





我哋一直向前行,由原本半山之處行到山頂附近位置,但都係毫無收鑊。

「前面好似有個人。」我指住前方。

修洛文將電筒照過去,發現前方地上有個人瞓咗喺度。

「詩詩!」鬼仔突然大叫,然後衝過去將嗰個人抱起。

「鬼仔……?」俾鬼仔抱起嘅係一個同鬼仔一樣著住校服嘅少女,就連校服上嘅校徽都係一模一樣。

「發生咩事,點解你會瞓咗喺度?」鬼仔問。

「係曉婷……我無耐之前遇到佢,諗住同佢一齊行,點知佢無啦啦拎起石頭扑落我個頭度,重將我身上所有個補給包搶埋……」嗰個俾叫作詩詩嘅女仔氣若如絲咁講。

「可惡……枉我一直同大家係自己人,佢竟然做啲咁嘅事!」鬼仔握起拳頭,忿然咁講:「放心,而家有我喺度,無人會再夠膽搞你!」





鬼仔將詩詩扶起觀察傷勢,詩詩額頭俾石頭扑傷,手腳有少許皮外傷,應該係跌落地下時整親,除此之外並無大礙。

之後,由鬼仔扶住詩詩,四人繼續前行。

咁樣落去,我哋會比其他人慢搵齊鐵罐……我哋四人行同一路線,搜索能力並無增加,但我哋卻要搵齊四個鐵罐。

只不過而家詩詩受咗傷,我又無電筒,鬼仔要照顧詩詩,分開搜索只會更危險。

我哋陷入咗十分不利局面。

「我哋不如沿住落山路去搵,咁樣可以無咁消耗體力。」我建議道。

「但係……」鬼仔心有餘悸回望啱啱跑上嚟嘅山路。





「放心,怪物只係對鐵罐先有反應,我哋身上無鐵罐,怪物唔會出嚟襲擊我哋。」我講,「鐵罐位置係每回合刷新,所以我哋啱啱行上嚟嘅路上會有新嘅鐵罐都唔定。」

「咁……」鬼仔猶豫咗下,似乎對啱啱嘅事仍有餘悸,「唉,行就行啦!」

「鬼仔……」搭住鬼仔膊頭嘅詩詩狀況比啱啱好咗啲,講嘢聲線都無咁細聲。

「做咩詩詩?」鬼仔即刻露出緊張嘅表情。

「我哋繼續向上行……我唔想同唔識嘅人一齊行。」詩詩掃視咗我哋一眼,然後又望到一旁。

「但係以你嘅狀態……」

「總之我要行上去!」詩詩大鬧一聲。

「咁、咁……」鬼仔顯得不知所措。





呢個時侯,修洛文走到鬼仔同詩詩面前,以俯視嘅目光直直盯住詩詩,而詩詩見狀馬上後退兩步,縮到鬼仔身後。

「小姐,你想自己一個人向上行無問題,不過唔好連累到你身邊嗰個人。」修洛文嘅聲線變得比平時嚴厲。

「你……話咩話?」

「並唔係得你一個有權利去發脾氣,大家都承受相同壓力,卻不得不賭上性命去生存。如果你要任性係你嘅事,但千祈唔好去逼身邊嘅人配合你。」

「你話係我逼佢?」詩詩皺緊眉頭講。

「你自己問下佢。」修洛文指住鬼仔。

詩詩望向鬼仔,鬼仔變得不知所措,佢唔夠膽去反駁詩詩,但又無去否定修洛文嘅話,換句話講係默認咗修洛文嘅話。





「你哋跟唔跟上嚟無關係,不過而家唔係玩細佬仔遊戲,咁大個人要為自己嘅行為負責。」修洛文講完之後就轉身向回頭路行。

「等等,我哋會聽你哋講。」鬼仔講完後望向詩詩,以認真嘅眼神望住詩詩,「詩詩,呢度周圍有怪物,你又受咗傷,得我哋兩個繼續向上行可能會更加危險。」

詩詩扁起嘴巴,眉頭皺得更深。

「唉……」詩詩哀嘆一口氣,「你鍾意點就點啦,反正你咁認真嘅時侯都無人阻到你,就好似你喺烹飪室一意孤行跟班唔識嘅人去打面具人一樣,就算我賴死唔郁都阻止唔到你。」

「詩詩……」鬼仔望住詩詩,鬆一口氣咁笑。

之後,我哋行返回頭路,雖然又要行多次亂石堆同滿佈雜草嘅林路,不過總比一直向上行好,而且再高少少嘅位置就係爆炸位置,即使有鐵罐亦無法接近熊熊嘅山火。

「唉,如果我平時行開山,而家就唔會咁辛苦。」鬼仔拍一拍小腿上嘅泥垢。

「個遊戲咁樣玩法,就算我平時行開喜瑪拉雅山都無用。」我小心翼翼向滿佈樹枝嘅林路前進。

雖然落山唔使消耗咁多體力,但要比上山更要打醒十二分精神專注,因為一唔小心差錯腳就會跌親,甚至碌埋落山。

就好似鬼仔咁,佢已經仆咗落地四次,而我自己亦跣親咗一次。

「有鐵罐。」行喺最前方嘅修洛文照向路邊嘅雜草群,裡面有個綠色鐵罐。

修洛文企喺原地,但無打算去踩落鐵罐度……我明白佢嘅心意,同之前一樣,佢係想留畀我哋踩先。

我向鬼仔佢哋講:「你哋踩先啦。」

「咁……」鬼仔望住詩詩,「詩詩,你踩先。」

「吓!」詩詩大嗌一聲,「點解係我?點解唔係你踩?」

「又唔係得返一個鐵罐,邊個踩都無所謂喇!」鬼仔焦急咁講。

鬼仔雖然嘴巴咁樣講,但我明白——呢個係男人嘅心意。

就好似當初我喺西鐵月台嘅時侯,向夏舞講嘅逞強說話一樣。

「你快啲踩,如果唔係會引嚟怪物……我諗你應該知我講緊咩掛。」我向詩詩講。

「唔……!」詩詩嘅反應,的確係明白我講緊嘅怪物係咩。

「快啲,我哋唔係喺度等緊怪物嚟,然後俾你拉埋去一齊陪葬!」我加重語氣講。

詩詩眼泛淚光,然後二話不說衝過去將鐵罐踩扁。

「咁樣得喇掛!」

「嗯。」我點一點頭,「我哋快啲走,怪物可能已經發現我哋。」

雖然重未聽到駭人嘅咬合聲同低鳴聲,但怪物可能已經喺附近埋伏。為咗安全已見,我哋即刻跑離現場。

跑緊嘅時侯,鬼仔跑到我隔籬,講咗一句:

「唔該晒你。」

「唔使,我明白你呢種心情。」

「你都有鍾意嘅人?」

「鍾意……談唔上係鍾意,先識咗唔夠一日。」我苦苦一笑,「但係為咗一個人而講出唔係自己內心真正嘅話,我明呢種感覺。」

「哈哈!咁得閒你一定要指教下我,點樣先係真正對一個女仔好。」鬼仔一邊笑一邊跑。

我哋平安無事跑出密麻嘅叢林,映入眼前嘅再唔係奇形怪狀嘅路線,而係一條擁有明顯路線嘅山路!

出到嚟無耐,我哋又發現咗另一個綠色鐵罐,今次我同修洛文讓咗畀鬼仔去踩。

之後,行咗大約二十分鐘,依然唔見任何鐵罐蹤影。

隨住時間過去,搵到鐵罐嘅機會就愈嚟愈低,換言之生存機會亦愈嚟愈小。

當我每踏出一步,我都會擔心一下——

擔心喺下一步,廣播就突然傳出。

我同修洛文都未踩鐵罐,即係話我哋要再搵多兩個鐵罐,先可以確保全員安全。

但係,不安嘅情景不停浮現喺我腦海之中。

離回合開始到而家,恐怕已經唔止半個鐘,體力已被消耗七七八八,而我嘅精神亦開始感到極限。

「停一停。」修洛文忽然講。

「做咩?」我問。

「你哋使唔使食啲嘢或者飲水?」

「食嘢?大叔你鐵罐都未踩到,重咁有心情食嘢?」鬼仔驚訝咁講。

「拖住無力嘅身軀前進於事無補,即使焦急亦無所用,反而會將自己置於危險之中。」修洛文平靜咁講,「休息一下,先繼續前進。」

修洛文……係考慮到大家嘅狀況先咁講。

的確,我哋咁嘅狀態持續前進,只會愈嚟愈不濟,甚至因此而發生意外。

我哋停留原地幾分鐘休息一下,食咗啲朱古力同能量棒補充體力,同埋補充足夠水份後,先繼續前進。

休息過後,狀態果然比剛才好咗啲,亦將精神稍微放鬆落嚟。

如果無修洛文開口嘅話,我哋嘅後果或者不堪設想。

眼前呢條路係一開始我行過嗰條路,算係記憶猶新,而且無啱啱嘅亂石堆同林路咁難行,相當嚟講行到比較輕鬆。

蓬—!

一陣樹葉搖動嘅聲音響起。

「等等。」我停低落嚟。

「做咩?」鬼仔跟住我一齊停低。

我停低落嚟,細心聆聽周圍動靜。

「周圍無嘢呀……你唔好無啦啦嚇我喎。」鬼仔露出膽怯嘅表情講。

四周寂靜無聲,極其量只有微風吹過嘅聲音。

但係,啱啱一瞬間聽到樹葉嘅聲音……

唔通……係我多疑?

「無嘢,繼續行啦。」我講完之後繼續前行。

無幾耐之後,我哋終於發現第三個鐵罐!

而家重有我同修洛文未踩鐵罐。

我望住修洛文,而修洛文亦望住我,我哋大家對望住大家。

「你踩。」修洛文緩緩咁講。

「你啱啱已經讓咗一次畀我,今次到我讓畀你踩先。」我講。

「無必要,你就去踩先。」修洛文反駁我嘅提議,「反正踩咗呢個都重有其他鐵罐,我又唔會因為你踩咗呢個鐵罐而死。」

「你係認真?」我皺起眉頭問。

「認真。」修洛文點一點頭。

「我明白喇。」我用力深呼吸一口氣,然後向鐵罐行過去。

正當我諗住踩落鐵罐時,一把叫聲從後方傳出——

「所有人唔準郁!」

我回頭一望,發現詩詩俾另一個著住相同校服,連校徽都一樣嘅女仔挾持住。

「詩詩!」鬼仔大叫,「你係曉婷!」

曉婷……係詩詩口中提及,用石頭將佢扑暈然後搶走佢所有補給包嘅人。

「你哋敢郁我就拮落去。」曉婷用一條尖銳嘅樹枝指住詩詩條頸,「特別係你啊,鬍鬚佬!」

「你想點,放開詩詩!」鬼仔焦急咁叫道。

「我想要咩好簡單……」



「我要嗰個黑色衫男人腳邊嘅鐵罐,同埋你哋身上所有補給包!」