從西鐵醒返之後……: 36
呢個叫曉婷嘅女仔，向我哋提出咗呢個要求……！
「你講咩話……！」鬼仔既震驚又憤怒，「你身上已經有三個補給包，唔通咁都重唔夠？」
「唔夠！袋入面啲水已經全部無晒，我而家好口渴，我要水同嘢食！」曉婷將樹枝輕輕刺入詩詩條頸，流出少量鮮血。
「啊……」詩詩咬緊牙關，緊閉雙眼。
「等等，你唔好傷害詩詩！」鬼仔馬上叫停曉婷。
「識做嘅話就即刻將身上嘅袋掟落地下！」
「得，我做！」鬼仔將身上嘅斜孭袋放落地上。
「重有你，鬍鬚佬！」曉婷指向修洛文。
修洛文瞇起眼睛盯住曉婷，但最終都係跟從指示將斜孭袋掟低。
「好！你哋三個人同我行開，我而家要去踩鐵罐！」曉婷一邊挾持住詩詩，一邊向鐵罐行過去，「你哋夠膽郁我就即刻拮落去！」
我、修洛文同鬼仔三個企埋一邊，眼白白望住本應係我哋嘅鐵罐落入其他人手上。
只不過，我擔心嘅唔係眼前嘅鐵罐，而係另一樣嘢——
另一個更大嘅威脅。
「切……」被挾持嘅詩詩忽然嘖咗聲。
「你切乜嘢？」曉婷不悅咁講。
「我話……原來望真啲，你個樣都幾面目可憎。」
「你話咩話！」曉婷俾詩詩嘅話激怒，「你信唔信我而家就拮落去！」
「唔好呀！」鬼仔大叫。
但詩詩不但無膽怯，反而冷笑一聲。
「你夠膽咪殺咗我，你殺咗我你都唔使指擬踩到個鐵罐。」詩詩側眼盯向曉婷，然後講咗句：「醜婦。」
「你……」曉婷俾詩詩激到滿臉通紅，然後將樹枝拮落詩詩塊臉，「我就劃花你塊臉，睇下邊個係醜婦先！」
「啊啊啊啊啊啊！」
「詩詩！」
詩詩嘅臉上多咗條長達幾厘米嘅傷痕，鮮血不斷流出！
「曉婷，停手！你要袋我哋畀你，要鐵罐我哋畀你，你快啲同我放開詩詩！」鬼仔握緊拳頭大叫。
「我踩完鐵罐之後咪放走佢囉！」
曉婷挾持住詩詩行過去，雙眼卻目不轉睛盯緊我哋三人。
「有無方法可以阻止佢……？」我悄悄問修洛文。
「太過危險，佢有所防範，貿然過去只會出事。」修洛文細細聲講。
我哋只能企喺度望住曉婷一步一步行到鐵罐隔籬。
喀嘞—！
鐵罐被一腳踩扁。
「好喇，咁就任務完成。」
「咁你重唔快啲放開詩詩？」鬼仔心急如焚咁講。
但曉婷無將詩詩放開不特止，重低下頭陰陰嘴咁笑。
陰風陣陣，危險逐漸接近。
「嘿嘿嘿……」曉婷抬起頭獰笑，「我係講過踩咗鐵罐之後放佢走，但我無講過就咁放佢走喎！」
「你咁即係講完唔算數啫！」鬼仔忿然大叫。
「呢條八婆啱啱話我醜婦，我就要俾人知邊個先係醜婦！」曉婷再次喺詩詩臉上劃出一條傷痕，「唔怕話畀你知，我已經將Charlotte同阿欣殺死！」
「你、你……」鬼仔露出不可置信嘅表情，「你竟然將佢哋殺死？」
雖然唔知道曉婷口中講嗰兩個人係邊個，但睇鬼仔反應都大概估到，係佢哋嘅同學。
「明明大家喺烹飪室嘅時侯講過大家一定要平安無事，互相合作度過難關，但點解而家……你可以做啲咁嘅事出嚟？」鬼仔眼泛淚光，「佢哋……係你嘅好姊妹，係同班三年嘅同學嚟㗎！」
「係佢哋逼我㗎，我本來無打算殺死佢哋！」
曉婷變得激動起嚟，樹枝輕輕拮落詩詩塊臉，詩詩只能緊閉雙眼，任由白滑臉頰俾曉婷糟蹋。
「我哋有三個人，但眼前得兩個鐵罐，咁有咩辦法喎！」曉婷雙眼滿紅大叫，「大家都想爭個鐵罐，於是我就聯同Charlotte將阿欣殺死。之後個回合我哋搵到只有一個鐵罐，所以我用同樣方法將Charlotte殺死。」
「你……」鬼仔差少少爆發，但又欲言又止。
喺鬼仔同曉婷爭執嘅時侯，我問修洛文：「你感唔感覺到……」
「嗯。」修洛文點頭。
鬼仔深呼吸一口氣，收起憤怒嘅表情講：「咁而家你已經踩咗鐵罐，已經無必要再做呢啲事。」
「唔得！」曉婷此刻面目猙獰，「呢條八婆話我醜婦，我就要劃花佢塊臉，慢慢折磨佢！」
危機接近！
「小心！」我大叫一聲，向曉婷同詩詩衝過去。
「無嘢可以阻止到我！」曉婷高舉樹枝，向詩詩臉頰無受傷嘅一邊插落去！
蓬—！蓬—！
「啊啊啊啊！」
噗哧—！
溫熱嘅液體灑落我嘅臉上，呢刻我望見嘅情景——
係一條滿佈腐肉嘅修長手臂，從後將曉婷嘅胸膛貫穿。
曉婷仍然保持猙獰嘅臉容，然後吐出一口鮮血。
「發、發生咩——」
嚓嘞—！
曉婷說話未完，身體就被上下撕成兩半。
滴滴滴啪嘞啪嘞啪嘞滴答滴答滴答滴——
鮮血灑到一地，內臟從斷軀中跌下。
失去上半身嘅下軀漸漸倒下，而吊住曉婷上半身嘅——
係長滿腐肉嘅怪物。
而且，眼前有三隻怪物！
詩詩呆若木雞望住眼前情景，身體不斷顫抖。
「係咪要走……？」詩詩呆滯咁講，「但係，我郁唔到……唔知點解……」
眼前情景非常駭人血腥，即使見盡死亡嘅我亦係第一次近距離下望到咁血腥嘅情景……
手腳不聽大腦使喚，身體不停抖震。
「快走呀！」身後傳來鬼仔嘅叫聲。
多得鬼仔，我終於回過神嚟，但同樣地怪物通紅嘅雙眼已經盯上我哋。
鬼仔同修洛文已經拎返起補給包逃走，但詩詩仍然驚魂未定，於是我一手將詩詩抱起，毫不猶豫向後跑！
但係抱住詩詩嘅我跑得比平時慢，怪物同我哋嘅距離愈嚟愈短。
「振作啲呀！」我向詩詩大叫。
「啊……」詩詩終於將驚魂中回過神來，「我……無死？」
「怪物而家追緊我哋，我放你落地，你自己出盡全力跑呀！」
「喔、喔！」
我將詩詩放低，然後拼盡全力向前跑，但怪物已經就追上我哋。
「吼吼吼吼吼吼吼吼！」
怪物嘅咆哮聲從身後傳出，鬼仔回頭見到我哋，突然間停低落嚟。
「小心呀！」
鬼仔反方向朝我哋跑過嚟，然後一嘢推開詩詩。
「吼吼吼吼吼吼吼吼吼吼吼！」
怪物舉起銳利嘅魔爪，向鬼仔身處嘅位置揮去！
「唔好呀！」詩詩焦急大叫。
千均一發之際，鬼仔向山邊撲去，及時避過致命嘅一爪。
喀啦——
鬼仔一時企唔穩，失去平衡向後跌咗落山！
「鬼仔！」
「你哋快啲走……」鬼仔嘅聲音漸漸消失於懸崖之下。
「鬼仔！」詩詩拼命尖叫，叫得聲音都變沙啞。
「走呀！」我拖起詩詩嘅手，拉住佢繼續向前跑。
詩詩係鬼仔拼上性命都要守護嘅人，所以我唔可以俾詩詩有事！
如果唔係，我就對唔住鬼仔。
我哋一路狂奔，大概唔知跑咗幾耐，轉咗幾多個彎，甚至連筋疲力盡嘅感覺都麻木埋，先終於擺脫怪物嘅追捕。
「呼——」雙腳疲軟嘅我停落嚟之後，差啲就直接跪咗落地。
修洛文依然平靜咁企喺度，至於詩詩就雙手掩面，早已哭不成聲。
「呢個結果……就係你所講負責任嘅結果啊？」詩詩喊住咁質問修洛文。
「詩詩……」我講。
「唔好叫我個名，我同你哋一啲都唔識！」
「我……」我窒咗窒，「我想講，無人知個結果會變成咁，無論係我、修洛文定係鬼仔。」
「如果我哋無跟住你哋落嚟，就唔會發生啲咁嘅事……」詩詩坐落地下，崩潰咁大喊。
但呢個時侯，修洛文並無理會詩詩，而係望向路邊其中一棵樹底下。
「嗰度……」我對眼前嘅事物感到十分驚訝，「竟然有個鐵罐！」
喺樹底下嘅正正係一個綠色鐵罐！
我哋明明經過呢條路，但竟然無發現到呢個鐵罐！
而家身處嘅位置係林路入口附近，或者係因為我哋從林路出嚟時無留意周圍，所以無發現呢個遺漏咗嘅鐵罐！
「呢個鐵罐係你。」修洛文緩緩咁講。
「我嗰個啱啱俾人踩咗，所以……」呢個罐本應係修洛文，所以我想讓畀佢踩。
「嗰個唔計。」
「……吓？」
「你快啲去踩，你需要呢個鐵罐。」修洛文笑咗笑，「放心，你踩完之後我就會去搵下一個。」
修洛文鮮有地露出笑容望向前方，但係……我感覺到而家嘅佢同之前有所不同——
而家佢望住嘅唔係前方嘅鐵罐，而係……彷彿似係道路嘅盡頭。
「你唔驚死咩？你唔驚呢個係最後一個罐咩？」我無法接受修洛文嘅決定，「點解你每次都要讓畀我先？」
修洛文閉上眼睛搖一搖頭，然後講：「我唔怕死……我怕無法保持自我而死。」
「自我又算得啲咩？」我理解唔到修洛文嘅諗法，「你無法否定同你擁有相同諗法嘅人，所以你甚至將其他人嘅性命放喺自己之上，呢個係咩嘢道理嚟？」
「你，有想去守護嘅人，係咪？」
修洛文嘅話令我腦海中浮現出一個人嘅臉容。
原本低頭喊緊嘅詩詩，都抬起頭望住修洛文。
「但係，我無。」修洛文第一次向我展現真正嘅笑容，「所以，我想望住你哋去完成我完成唔到嘅事情，就算係將我嘅性命交付畀你。」
完成唔到嘅事情……係佢同佢兄弟之間發生過嘅事。
「我無法再見我老婆，無法再見我兄弟，但係你仍然可以去選擇。」修洛文講，「呢個世界太多悲劇，所以我想成就其他人幸福嘅結局。」
「點解……點解……」
我忍唔住雙眼嘅熾熱感，眼淚不禁流下。
「去踩啦，俾我睇下幸福嘅結局。」
喺我眼前嘅修洛文融化咗，佢再唔係兇神惡煞嘅陌生男人，而係……
一個貫徹自己信念嘅男人。
我用衣袖抹去眼淚，然後向修洛文講：「我會去踩鐵罐，然後再同你一齊搵出最後一個鐵罐出嚟。」
「好。」修洛文微笑點頭。
我小心翼翼一步一步行去鐵罐隔籬，確保安全之後就準備踩落去。
一定、一定唔可以係最後一個！
喀嘞—！
我將鐵罐踩扁之後，依然一片寂靜。
無事……無事！
我開心轉身望向修洛文，然後——
『回合結束，判定時間到，合格人數：十三，不合格人數：六。鐵罐位置將會刷新，數目九個，注意當玩家人數剩餘九個時遊戲會即時完結，音樂即將播出。』