從西鐵醒返之後……: 53
「五分鐘內要殺死對方……？」正當我以為遊戲已經完結時，一道新嘅指令傳嚟。
鬥獸棋只不過係指令1，但規則無講過鬥獸棋完咗之後呢場遊戲就會完。
挪亞……根本就係想趕盡殺絕，殺剩一個人為止！
「挪亞！」我向著漆黑嘅天空大聲咆哮。
「阿逸……已經夠啦。」夏舞垂低頭落嚟，「雖然有一剎那我係感到希望，但係……現實咁樣，我無辦法唔去接受。」
我並無望到夏舞垂頭時嘅表情，佢搓一搓雙眼，抬起頭用通紅嘅眼睛望住我。
「殺死我喇。」
「我絕對唔會殺死你！」我已經做好心理準備，「如果你我之間要有一個人死，咁嗰個人就由我嚟做。」
「唔得！唔可以！」夏舞大叫。
「咁唔通你又會覺得我會殺死你咩？」我大聲反駁轉頭，令夏舞愣呆落嚟，無言而對。
呢條規則最致命嘅地方係指令要求嘅係殺死對方，即係話就算自我了斷都唔得，一定要親手殺死。
廣播講到明未完成指令嘅話兩人都會同時受到懲罰，就算一方死去，如果唔係由另一方親手殺死，都唔算係完成指令。
「阿逸……如果你唔殺死我嘅話，你都會死。」夏舞嘗試勸喻我。
「無論如何我都唔會殺死你，因為我唔想你死。」我緩緩咁講，「所以，要死嘅人應該係我。」
「阿逸，唔得啊！我根本無可能向你落手……」夏舞崩潰咁跪落地下，雙手掩臉痛哭，「我求下你，你殺死我喇……如果唔係我哋兩個都會死，一個人死好過兩個人死啊……」
唔通……呢個真係唯一辦法？
只有咁樣，先係呢場遊戲嘅真正出路？
只要我行過去捏住夏舞條頸，將佢殺死嘅話，我就可以通過呢場篩選。
或者……呢個先係真正嘅方法。
挪亞將我哋迫入比絕望更殘忍嘅絕路，但我已經改變，我明白嘅腳步並唔會停低，我呢刻唔可以死去。
因為，我要為死去嘅人報仇，向挪亞討回一個公道。
「夏舞，我已經諗好。」我行到夏舞面前，然後將佢扶起身，「啱啱係我無顧及你感受，對唔住，不過而家我已經做好覺悟，一切嘅覺悟。」
夏舞愣了愣，然後講：「阿逸……你已經決定咗殺死我？」
我將雙手慢慢放落夏舞嘅頸，夏舞緩緩咁合上雙眼。
「對唔住，原諒我，到最後連你嘅性命都犧牲埋。」
「多謝你，可以死喺你手上已經足夠。」夏舞緊閉雙眼，嘴巴不由然咁顫抖。
放喺夏舞頸上嘅雙手慢慢向上移，然後繞到夏舞頸後。
「啊啊？」夏舞驚覺張開雙眼，「阿逸你——」
我將額頭貼落夏舞嘅額頭上，近距離直視夏舞雙眼。
「我已經決定好，揀咗最自私嘅嗰個選擇……龔夏舞，你願唔願意同我賭一舖？」
「賭、賭一舖？」夏舞好驚訝咁問。
「我哋就由得呢五分鐘過去，大家咩都唔做，就賭挪亞佢唔會夠膽將我哋兩個殺晒。」
「你、你，咁樣同啱啱我哋拗嘅有咩分別，結果都會兩個一齊死！」
「唔同，我唔係要犧牲自己去尋死，我係要兩個人都一齊生存落去！」
「但係規則係絕對，規則講明要我哋互相殘殺，我哋無可能反抗……！」
「無錯，篩選至今為止都未試過出現違犯規則嘅事情，規則好明確咁我哋唔跟指令做嘅話，大家都會死。」
我緩緩吐出一口氣，然後堅定咁向夏舞講：
「既然係咁，我哋就挑戰挪亞一次！挪亞舉行呢場篩選係有目的咁想揀某啲人出嚟，所以我唔信佢夠膽殺晒我哋兩個。」
夏舞愣望住我，大概佢都唔明白我呢句推測嘅根據係咩。
但係，夏舞微微展現笑容。
「阿逸你永遠諗到啲人哋諗唔到嘅嘢。你呢番話，又係有啲咩根據？」
「直覺。」我聳一聳肩，好敷衍咁講。
「咁啊……呢場咁高風險嘅賭局我都無得唔參與，反正除咗條命都無嘢可以輸，所以……」夏舞臉頰變得有啲紅，「就搏一舖。」
之後，夏舞合上雙眼，就咁原地企喺我面前。
我亦合上雙眼，我同佢就維持住呢個姿勢，等待最後五分鐘嘅完結。
個心卟通卟通咁跳。
其實，我並唔係單憑直覺而作出呢個賭局。
關鍵在於莉莉同倪少賢。
莉莉講過作為監察員嘅佢係為咗防止意料之外嘅事發生，包括全滅，而從阿武口中得知，倪少賢曾經向藍組嘅人公開講過最後會剩低兩個生還者名額，再加上倪少賢曾經講過伴侶呢樣嘢，重講過佢唔殺夏舞嘅原因係因為佢可以作為伴侶。
雖然我唔知道莉莉嘅身份來歷，亦唔知道點解同我多年嘅好朋友倪少賢會做咗呢場篩選嘅監察者，但佢哋嘅話給予咗我呢場賭局嘅信心。
挪亞，係唔夠膽殺晒我哋兩個。
我唔知道點解佢呢個指令會同作為監察員嘅莉莉同倪少賢講嘅嘢有出入，但我決定賭一舖。
假如出到去嘅話，我一定要係搵出真相……
包括挪亞同佟堇新嘅真相。
時間一分一秒過去，終於五分鐘都過去。
突然，頭部一片暈眩。
「嗚啊！」突然一股熾熱嘅液體湧上，我舉起手掩住，但發現手上一片血紅。
唔係，手上嘅鮮血唔係我噴出嚟！我望向夏舞，發現鮮血不停從佢嘅雙眼、鼻孔同嘴巴流出。
「夏舞……咳！」鐵鏽味充斥嘴巴之中，然後我咳出一口鮮血。
我同夏舞……都受到懲罰？
「阿逸……」夏舞無力嘅身軀向我傾去，我用盡力氣將佢扶住，但奈可我嘅手腳不受控制咁抽搐，連企喺度嘅力氣都就嚟無。
「賭局好似失敗咗喇……對唔住，夏舞。」我拼盡最後一口氣道歉，「要你同我一齊死……」
「呢個係我嘅選擇，同阿逸你無關……」夏舞強行抬起頭，「阿逸，我有嘢樣想同你講……」
一陣耳鳴聲傳嚟。
「阿逸，我……」
耳內只剩下耳鳴嘅聲音，除此之外聽唔到其他聲音。
我望住夏舞嘅嘴型，但當佢講到「我」字時，眼前突然一片漆黑。
我只係知自己瞓咗落地下，而夏舞嘅身軀則壓喺我身上。
一片漆黑，只有痛苦。
除此之外咩都感覺唔到。
意識漸漸遠去，今次終於輪到我可以好好咁瞓一覺……唔知其他嘅人，佢哋身處何方？喺天堂定係地獄？
無論喺度都好，一切已經完結。
雖然我無法拯救到任何人嘅性命，但係……希望長存大家嘅心中。大家再唔使因為死亡嘅篩選而變得瘋狂，可以從死亡之中得到救贖，做返本來嘅自己。
＊
一陣白光映入雙眼，我緩緩張開雙眼。
意識再次回來，第一下浮現腦海嘅想法，就係我瞓喺一張類似手術床嘅物體，頭頂照射住刺眼嘅白光，身上著住一件好似病人服嘅衫，而我身邊則有一個著住軍服，戴住口罩嘅人。
「恭喜你，你已經返到嚟現實。」軍人平淡咁向我講。
「你係咩人？」我坐起身環望四周，「呢度……係邊度嚟？」
「呢度係『方舟』，即係呢場篩選嘅機關，而你係呢場篩選嘅通關者。」軍人回答我嘅問題，「你可以叫我做Dylan，我係呢場機關嘅總隊長……即係你認識嘅白嘉莉副隊嘅上司。」
「方舟……」又係一樣同聖經有關嘅事情，「係喇！我係通關者嘅話，咁……夏舞呢？應該重有另外一個女仔先啱！重有呢度究竟係咩地方，點解我哋要被逼參加呢場篩選？」
「你問題太多，等一等。」Dylan好鎮定咁叫停我，「另外嗰位通關者無事，佢喺另一間房。你想知嘅事好快就會知道，你而家起身換一換衫，我會帶你去見一個人。不過……」
Dylan忽然停低落嚟，面無表情咁望住我。
「你即將要面對嘅係比你想像中更殘酷嘅現實，包括外面嘅現實，同埋你嘅現實。」
我唔明Dylan口中所講嘅嘢係咩意思，但我感覺到……會係不得了嘅事。
「而家我帶你去見一個人，嗰個人對你嚟講應該唔陌生……唔係，甚至係好熟悉先啱。」Dylan轉過身一邊行去門口，一邊背住我講。
「係咩人？」
「佟堇新博士……或者對你嚟講，用挪亞呢個名會更加親切。」
＊
最終層遊戲生還者總結：
紅方：
1—泰拳女（被雞冠男殺死）
2—墨曉龍（大小顛倒時，與雞冠男同歸於盡，文中並無提及）
3—詩詩（被阿武殺死）
4—佟逸霖（通關者）
5—神父（Reverse，被倪少賢殺死，文中並無提及）
6—白嘉莉（大小顛倒時，被倪少賢殺死，文中並無提及）
7—Ellie（大小顛倒時，被雞冠男殺死，文中並無提及）
8—剛一（與堅哥同歸於盡）
9—王少計（與陳少傑同歸於盡）
藍方：
1—倪少賢（被佟逸霖殺死）
2—雞冠男（大小顛倒時，與阿曉同歸於盡，文中並無提及）
3—龔夏舞（通關者）
4—駱梓譯（Reverse，大小顛倒時，被佟逸霖殺死）
5—阿武（大小顛倒時，被佟逸霖殺死）
6—Vanessa（被剛一殺死）
7—雷爺（被王少計殺死）
8—堅哥（與剛一同歸於盡）
9—陳少傑（與王少計同歸於盡）