從西鐵醒返之後……: 52
明明應該所有人已經死晒，但點解呢刻竟然會傳出其他人嘅呼吸聲？
聲音嘅來源係來自倪少賢……唔係，係倪少賢身後嘅天台邊緣。
一隻纖幼嘅手搭喺石壆上，之後一道熟悉嘅身影映入眼前！
「夏、夏……夏舞！」我驚愕咁望住夏舞。
夏舞爬上邊緣嘅石壆上，緩緩落返嚟平地，然後活生生咁企到嚟我眼前。
雖然手腳有擦損嘅痕跡，但除此之外並無大礙。
「點……點解？」我無法相信自己眼前所見到嘅事實。
「呢度下面，其實重有一層。」夏舞講。
「重有一層……？」
我行去天台邊緣向下望，發現下方兩層位置原來重有一層平台喺度！
夏舞繼續解釋：「多得呢度重有個平台先無事，不過兩層高跌落去都好痛下，暈咗成分鐘之後先起得返身。」
夏舞……夏舞佢無死……！
我重以為佢真係就咁跌咗落樓，死喺我眼前！
雖然唔知道點解倪少賢無真係殺死佢，但總言之無事……實在太好！
我雖然救唔到駱譯，救唔到鬼仔同詩詩，救唔到阿曉同Ellie……但至少呢刻，夏舞依然活生生企喺我眼前！
「夏舞……」我輕喚著夏舞嘅名字，大概係我無諗過夏舞可以再次企喺我面前。
「阿逸，你成身污糟，又損手爛腳，你一定係盡咗力去拯救其他人。」
「我……到最後都係救唔到任何一個人，親眼望住佢哋死喺我眼前。」講到呢度，我不禁望向瞓喺我腳邊嘅駱譯。
「唔緊要，我知道阿逸已經盡咗力，所以已經足夠。」夏舞展現出融化嘅笑容，「同埋，呢一切都會完結。」
一切都會完結……
「係喇！而家只要等到時間完，呢場遊戲就會完結！」
無錯，而家得返我同夏舞兩個，紅方同藍方都係各剩一人，照呢個局面繼續落去，最後就會變為打和嘅局面。
只要時間一完，遊戲亦會完結，我同夏舞斬可以一齊生存落去。
我慢慢記起我同夏舞之間嘅記憶，雖然片段非常零星，但至少有樣嘢可以肯定——
我同夏舞早就喺篩選之前就認識。
「夏舞，你記唔記得——」
正當我想問夏舞記唔記得我哋曾經見過面嘅事情時，夏舞卻先行開口打斷咗我嘅話。
「阿逸，直到而家我都未知道你嘅全名。」夏舞握起雙手，表情忽然變得靦腆，「你可唔可以話畀我知你嘅全名係咩？」
全名？諗諗下，我從來無同人講過我嘅全名，即使其他人知道大概都係從倪少賢口中得知。
話說回來，夏舞曾經講過一次佢嘅全名。
「我叫佟逸霖，人字邊嘅佟，兔仔划艇嘅逸，雨字頭嘅霖，佟逸霖。」我將我嘅名字講出，「記住喇，龔夏舞。」
「你竟然重記得我個名……」夏舞露出驚訝嘅神情，「佟逸霖……係個好好聽嘅名字。佟逸霖，我會好好記住你個名，所以你都要好好記住我個名，永遠唔可以忘記喔！」
夏舞瞇起雙眼，露出十分動人嘅笑眼。
係十分似曾相識，令人心動嘅笑眼。
「係呢，雖然遊戲已經就嚟完，但你介唔介意話畀我知你揀咗咩數字？」
「係4號，不過係抽返嚟，並唔係自己揀。」我好自然就講咗出嚟。
「你咁好彩抽到呢個數字都有嘅……哈哈！」夏舞聽完之後，竟然笑咗出聲。
我望住夏舞嘅反應，就感到愈嚟愈奇怪，究竟呢個數字有咩咁好笑？
唔係……點解夏舞無啦啦會問我呢條問題？
因為我打從心底裡信任夏舞，所以我不加思索就回答咗佢嘅問題。
我心頭一緊，然後問：「你做咩無啦啦問呢啲嘢？」
「阿逸，我……」
我回想起一啲事。
傑少係9號，倪少賢係1號。
堅哥、雷爺同Vanessa三個都係毫不猶豫向我哋發動攻擊，所以佢哋一定係相當大嘅數字，譬如係6號、7號同8號。
阿武曾經確認過我嘅數字係咪5以下，所以佢極有可能係5號。
阿曉、Ellie同雞冠男喺我唔知嘅情況下互相殘殺，但喺大小顛倒情況下三人都受到懲罰嘅話只有一個可能性——雞冠男先殺Ellie再同阿曉同歸於盡。換言之，雞冠男同阿曉一樣同為2號。
最後剩低3號同4號，啱啱夏舞講咗句，話我咁好彩抽到呢個數字……
唔通……
「我……好多謝你兩次冒住生命危險救我，好多謝你對我無微不至嘅照顧。」夏舞將雙手放下，直視我雙眼，「我有件事想同你講，其實……我……我……」
夏舞瞇起雙眼，露出淡淡憂愁嘅臉容。
「其實我對你——」
「龔夏舞！」
我非常大聲咁大吼一聲，大聲到拼盡力氣，嚇得夏舞都愕然後退兩步。
「阿……阿逸？」夏舞驚愕咁望住我。
「你嘅數字係3號係咪？你，係咪想自殺，然後等我一個人贏出呢場篩選？」我握緊拳頭忿然咁講。
「我、我……」夏舞先係不知所措，然後又轉變為平淡，「佟逸霖，我唔想你有事。」
「……咩話？」
「萬一兩邊打和，結果係兩邊受到懲罰點算？」夏舞雙手放喺胸口，十分擔憂咁講，「又或者有下個指令出現要我哋互相殘殺嘅話咁點算……我知道㗎，我知道萬一有呢個情況，你一定會犧牲自己條命嚟救我……」
夏舞向我行過嚟，將手緩緩向我伸去。
「既然係咁，不如殺死我，至少你可以好好咁生存落去。」
「我唔會應承呢件事！」我退後數步，確保同夏舞之間保持距離，「一個二個都係咁……我已經親眼望住好多人死去，直到而家得返我同你兩個。所以，我點都唔會放棄你，要生一齊生，要死一齊死！」
「阿逸……！」夏舞雙手掩臉，眼睛泛起淚水。
「我會生存落去，我無論如何點都唔會死。」我堅決咁望住夏舞雙眼，「如果你自殺嘅話，衝過嚟掂我又好，從呢度跳落樓又好，我都會跟埋你一齊去死！」
唔知曾幾何時，我好似講過相同嘅說話。
「阿逸，你記唔記得……」夏舞無奈苦笑咗一聲，然後抹一抹眼角，「我曾經同你講過，我唔希望你冒住性命嚟救我。但係，你每一次都係咁做，無論我點樣都說服唔到你。」
「係，我就係一個咁無理取鬧嘅人。」
可能真係如同倪少賢咁講，我想救人只不過係為咗滿足自己嘅虛榮感。
所以，就等我滿足埋最後一次。
「既然係咁……」夏舞笑住咁望向我，「我就唯有捨命陪君子啦。」
我同夏舞互相對視，並無作聲，等待一分一秒過去。
寂靜一片。
我嘗試去拯救每一個人，但最後就如倪少賢所講咁無辦法令所有人生存，而且好諷刺地我自己一個卻苟活落嚟。
但即使如此，夏舞仍然喺我眼前，所以我會以我性命為代價，拯救最後一個，亦係唯一一個人。
「阿逸……！」夏舞指住我嘅手腕。
我望向手腕，發現手帶亮著嘅紅光忽然漸漸熄滅。
唔通……係受到懲罰？
但係我嘅身體無發生任何變化。
而且我望向夏舞嘅手腕，同樣地佢嘅手帶亦漸漸變得黯淡。
不過，我哋依然存活。
夏舞舉起佢戴住手帶嘅手腕，訝異咁問：「咁樣……係咪即係已經完結喇？」
「我諗應該係。」我同樣舉起自己手腕，細心觀察住條手帶。
無錯……無論係我定係夏舞，都無受到懲罰！
或者，一切真係已經完結。
『時間完結，紅方：1人，藍方：1人，雙方打和，指令1完結。』
廣播四方八面傳出，肯定咗呢個事實。
「夏舞……」我望住仍然企喺我眼前嘅夏舞，差啲就有衝動想衝過去，不過我擔心遊戲規則依然生效。
「阿逸，我想同你講埋啱啱我未講完嘅話。佟逸霖，其實我——」
廣播再次播出，將夏舞嘅話打斷。
聽到廣播之後，我先發現自己原來重忽漏咗一件事情。
係從遊戲開始就應該估到嘅事情。
『指令2：剩下的兩人請在時限內殺死對方，最後剩下的人將會贏出篩選。遊戲時限為5分鐘，時間完結後未能完成指令的話，兩人會同時受到懲罰。』