[傷感愛情] 無語問蒼天: 第十章 - 逝去至親

我不斷地咁努力工作去壓抑住我嘅憤怒, 好快, 已經響度番左一個月工, 呢一日收工前, 靚女秘書倚麗叫左我入房, 「偉倫, 公司方面對你呢個月嘅表現都算幾滿意, 陳生亦叫我通知你, 會響下期薪金開始加多百份之十比你!」

我聽左之後哦左一聲, 倚麗見我咁款就問我, 「近排係咪身邊有啲咩事發生左? 啲同事話我知覺得你好似有啲事咁, 會唔會係響呢度做野覺得工作壓力太大呀?」 我搖住頭, 「無, 無咩事嘅, 只係啱啱同女朋友分手無耐, 不過妳都同我多謝陳生先, 我會繼續比心機響呢度做野架嘞!」

周未下午, 我搞左一啲私事之後, 跟住就去老人院度探我呀媽, 咦, 有架白車停左響門口度嘅, 不過呢啲情況都算係好平常, 咦, 有個女仔喊住咁向住白車方向行去嘅, 果個唔係個八婆詠欣, 死八婆, 累我比公司炒, 抵死啦, 緊係佢身邊唔知邊個有事定嘞。

我望住詠欣上左白車上面, 我懶理佢, 跟住我行入老人院度搵我呀媽, 呀媽睇黎精神都叫做唔錯咁, 我帶左啲野同買左伴新衫黎比呀媽, 「老媽子, 上次見妳果件外套有啲爛, 我頭先買左件新嘅黎比妳, 妳試試睇吓啱唔啱身?」 

呀媽笑住同我講, 「呀仔, 唔使嘥埋呢啲錢啦, 件衫上次隔離讚你叻仔個婆婆個女幫我補左嘞, 你睇, 佢啲手勢幾好, 唔講都唔知件衫係有爛過咁, 不過個婆婆頭先下晝好似有事, 啱啱白車黎到送左佢去醫院, 佢個女頭先都有黎跟埋去架, 睇見佢個女喊到收唔到聲咁, 我個心都有啲唔係咁舒服!」



頭先? 咁唔通老媽子講果個係詠欣? 唓, 幫我呀媽補件衫咁大把之嗎, 諗起個死婆果副串樣同累我無左份工, 我到而家都仲未曾嬲完, 下次如果比我再見倒佢嘅我實會同佢嘈鑊勁呀。

一星期之後, 老人院內嘅柜枱處, 職員正為一個女仔辦理緊按金退還手續, 個女仔正一面落寞咁, 手續辦理完之後, 個女仔正要離開嘅時候, 「咦, 詠欣, 點解妳會響度嘅? 係呢, 妳媽媽佢無咩事吖嗎?」 老媽子剛好撞見詠欣問住, 但詠欣一聽到媽媽兩個字之後, 啲眼淚就已經控制唔住咁就流住出黎。

詠欣同老媽子響老人院外嘅草地傾談住, 「詠欣, 唔好咁啦, 比妳媽媽知道妳係咁樣, 佢就走都走得唔安樂架, 唉, 婆婆成日都同個仔講, 每個人始終都會有百年歸老嘅一日, 但如果有一日我要走嘅時候, 我都會叫個仔一定要笑住咁黎送我走架!」 詠欣已經控制唔倒自己, 「婆婆, 但我真係好掛住媽媽呀!」
 
第十章圖述
 

 


詠欣望住遠方思憶住剛逝去不久的母親