幾日之後, 我又正在工作住之際, 內線電話響起, 係倚麗通知我陳生話有事要搵我, 佢叫我而家就即刻要過去公司個 conference room 度, 行到過去, 我咯咯咯叩過門後, 跟住我就開門入左 conference room 裡面, 一張好巨大嘅會議枱, 枱嘅兩邊就正坐滿哂人響度, 我見一班似係客戶同公司高層之類嘅人正同一時間咁望住我, 而響枱頭正中嘅朗奴就正揚手示意我行埋去佢度。 

正在唔知頭唔知路咁之際, 朗奴已經開口同我講, 「偉倫你唔使咁緊張, 而家projector 上面正放影緊一段推廣項目嘅廣告片段, 但我地就想要聽吓啲一般消費者角度嘅意見, 嗱, 你睇一睇上面啲內容先, 跟住你就再講吓響你心目中嘅感覺同意見出黎, 而成件事就只係咁簡單嘅啫!」

哦….., 原來係咁, 咁我就開始望吓呢條廣告片先, 咦, 似係一啲健身中心計劃咁款, 見張海報例牌又係有條鬼佬哨住棚牙咁舉住啞鈴, 而隔離又有個鬼妹跪住響地紇高屎忽咁攬住個健身球, 片段跟住就影住一連串健身中心入面啲器材, 片段播完之後, 朗奴跟住就問我話如果我係消費者, 咁呢段廣告片究竟可唔可以吸引倒我會去呢間健身中心度消費咁呢。 

我直講我嘅感受出黎, 「而家咩鬼都興搵啲代言人, 咁不如就試吓搵個全香港都識嘅時下偶像黎做呢間健身中心嘅代言人啦, 至於以消費者角度黎睇, 其實除左環境同設備之外, 最重要嘅其實都係關於價錢嘅問題, 但頭先成段片我都見唔倒有提過究竟要收幾多錢, 但見啲地方又好似咁高級咁, 所以我估啲價錢都應該會係好貴同我就唔敢行入去度問囉, 所以, 其實應該係要響廣告上主動提供番個收費比啲顧客知道, 等人地覺得認為係抵嘅, 咁啲人自然就會自動比錢去玩架啦!」

我繼續一輪咀咁講我嘅感受, 全場嘅人亦真係好留心咁聽我繼續講, 講完一大餐意見之後, 「都差唔多嘞, 大致上都係咁上下, 總知如果可以咁做嘅話, 咁我估都應該可以吸引倒啲人去會主動幫襯嘅!」 一個似係成功人仕兼老細款嘅人正坐響度比左個手指公我, 然後見佢就響度拍住手掌, 其他嘅人見倒咁亦開始跟住附和住黎拍掌, 搞咩呀? 成班人咁開心咁嘅? 而朗奴亦笑住同我講叫我可以先番出去做野先。





兩日之後, 推廣部同事話我知公司決定採用我上次整果張樓盤廣告圖, 跟住無幾耐, 內線電話響起, 哦, 係老細朗奴打黎搵我, 佢話叫我今晚收工之後就同佢去出去食飯, 佢仲話會有啲事想同我傾吓咁講, 話咁快就到左收工嘅時候, 我同朗奴一齊搭住 lift 落去樓下大廈停車場度, 跟住老細就揸住佢部靚車黎同我去左一間高級食肆度食飯。

食飯期間, 朗奴同我講, 「偉倫, 先講件事比你知, 上次你果幅樓盤設計圖, 公司已經決定採用黎做呢個項目嘅推廣之用!」 哦, 係咁咋, 呢個我響下晝就已經收到風啦, 但朗奴就再繼續講, 「仲有另一件事, 就係你上次入黎房度提出果啲健身中心嘅建議, 客人對你嘅意見覺得非常之咁欣賞, 就係咁, 我地公司而家又再多左一個新客戶嘞!」 朗奴伸左隻手出黎同我作握手狀, 而我亦即時恭喜住老細咁同佢握番住隻手。

朗奴問我, 「係呢偉倫, 唔知你有無興趣轉去公司嘅設計推廣部度做野咁呢? 經過呢兩次嘅事件之後, 我覺得你響呢方面會係比較有天份, 但如果再經過適當嘅培訓之後, 假以時日, 我估將來你必定會係有一番成就嘅!」
 
吓, 轉 department? 我真係發夢都無諗過呢樣野過喎, 但突然比老細咁睇得起我, 我個心而家又開始有啲好緊張嘅感覺, 「陳…生, 我果啲只係隨口 up 嘅野, 你唔好咁認真先啦, 而果張圖我又只係屎忽痕咁做出黎, 但突然要我轉 department 咁大件事, 我驚到時如果搞唔掂嘅話咁咪就死火!」

老細笑住同我再講, 「嗱偉倫, 如果你真係覺得自己唔掂嘅話, 咁你就一定會係好唔掂, 但如果你覺得自己掂嘅話, 咁就算而家暫時能力未達嘅, 咁響將來都仲有機會可能會係好掂, 咁而家你可唔可以再話我知, 你到底掂唔掂先?」 我諗左一陣, 跟住再呼左一口大氣出黎之後, 然後再好肯定咁去答住朗奴, 「好, 我掂!」





就係咁, 我就由會計部一轉, 就轉到去公司嘅設計推廣部度開始工作, 而響夜校方面, 我亦剛剛完成左呢一季嘅會計課程, 緊接落黎公司就再安排我去修讀有關設計推廣嘅課程, 而我同思穎亦將要結束我地夜校同學嘅關係嘞。
 
第十七章圖述
 

 
偉倫正作著事業上啲另一決擇