是咁的，我係A0死毒撚: 一. 頹生活

  呢個係我死柒頭俊仔，中四，係FF方面簡直係到左爐火純青既境界。
今日一如既往咁返學，又係頹廢既一日，我間小學到中學都係男校，人人夢寐以求既名校，我成績唔係好好，一直都係中游位置既長期卡關者。
由細到大都係垃圾既代名詞，去過足球學校學踢波？學到而家都係好廢，去學長笛？又半途而廢，你話係咪廢？
我真係好想大巴大巴車落自己塊面度，點解我咁廢。
有人話，可能係佢未搵到自己有興趣既野啫，我都希望係咁。 
  頹過左一堂又一堂，終於到左lunch，我一如既往咁同一班老死去食lunch。
佢地係阿峰同啊熙，佢地同我同form又住我果區，所以咪熟囉。
阿峰係超勁既學霸，讀書永遠最後一日先讀，但係就永遠都係全級頭10，身型健壯，運動勁。
但係佢有一個致命既缺點，就係矮，所以我仲相信呢個世界係公平既。
阿熙就頹得多，讀書勁我少少，體育都唔勁，身型高瘦，但係好多friend。




佢地都可以話係我除左屋企人之外最親既人，係我迷失方向做我指路明燈，係我下沉既時候做我救生衣。
每次唔開心我都係同佢地傾計，我係一個好負面既人，所以多得佢地我先無跳樓自殺。
今日我地都係係canteen食頹飯，我係咖哩牛腩飯，阿峰食咕嚕肉配飯，阿熙食肉醬意粉。
我一如既往咁食住飯訴苦，仆街死毒撚阿峰就掛住打機，完全無聽過我講野，阿熙就一路食一路聽，我地既每一日都係咁過，直到有一日...