是咁的，我係A0死毒撚: 三. 改變

 每次一合上眼，就會再想起佢，雖然連名都唔知，但係有一種好想保護佢既感覺，佢無女神既身材，我睇得出只係普通，但見到佢滑嫩既肌膚，雖然唔算白滑，但卻靜靜咁引誘我去觸摸佢，好想一野拖落佢隻手仔度，同佢講:「我愛你。」但我知道佢未必鐘意我呢個死毒撚，所以要改變自己。  我一路都唔係既care自己既造型，但係為左要襯得起佢，我  決定要改變自己，我相信自己只要肯打扮，應該可以變成男神。所以第一步，我要改變自己既髮型，由平時去既頹廢60蚊髮型屋，變成左佢150蚊既貴價髮型屋。  一踏入髮型屋，就見到每個髮型師都威風凜凜，至少唔會係頹廢髮型屋既肥毒柒阿叔先，今次係我第一次去髮型屋有人幫我洗頭，平時頹廢髮型屋都無得係，幫我洗頭既係一個身材苗條既姐姐，幾靚女，手勢好好，好舒服，同頹廢髮型屋係完全唔同既服務。終於可以剪髮。幫我剪髮既係啊John，佢一個轉身，好型咁行過黎，見到佢呢一身既造型，一件純黑色既hoodie，著住一對ultra boost， 一睇就知係潮流教主。熟練咁拎起鉸剪，就開始舞龍咁款咁剪，一剪，轉眼就好似變成另外一個人， 我係鏡前以為自己發緊夢，一睇個髮型，兩邊既鏟青乾淨俐落有線條感，頭頂層次分明，比人既感覺好似日久失修既花園得到優秀園丁打理一樣。