【內心獨白散文】《陋室手記》: 〈關於負面標籤這回事〉

〈關於負面標籤這回事〉
 
我只係一個普通人。但總係唔為人所理解。
 
社會對我呢班人有咩評價呢？我之前上網睇見唔少年輕人同成年人嘅論戰。而家嘅年輕人被批評得一無是處。不切實際、不思進取、自我中心、反叛、反社會、衝動魯莽、任性、不顧他人……
 
自從退學開始，我都被寫上標籤。就好似街市雞檔入面，腳上被縛上紅牌仔，等候俾人宰殺嘅雞。經過三個月嘅閉關，我身上嘅負面標籤就更多。呀爸話我係廢青隱青，呀媽話我唔正常。
 
確實，淨係睇到我退學同閉關呢一方面，我實在係不折不扣嘅垃圾。但係有幾多人睇到我內心嘅掙扎？又有幾多人睇到我為咗梳理同撫平自己嘅情緒、迷惘同壓力，到底付出咗幾多心機？
 




冇。一個都冇。社會上嘅人都習慣睇表面，以表面嘅行為同處境去了解一個人。結果呢？佢哋根本咩都睇唔到，但又認為自己睇得一清二楚。佢哋認知嘅我並唔係真實嘅我，而係佢哋想想像中嘅我。就好似望見鏡入面嘅自己，就認為鏡中人就係自己嘅全部。
 
膚淺。幾咁膚淺。但係人就係習慣了解表面，眼見為真。無他嘅！理解一個人嘅內心係件複雜同花心機嘅事。邊有人會咁得閑，花時間理解其他人嘅情緒同諗法呢？
 
不過唔緊要，冇人明白都唔緊要。最少唔好當我係怪人，唔好將社會嘅負面標籤恣無忌憚噉縛係我身上，就已經係萬幸。呢個世界上係冇任何一個人係需要被標籤。
 
點解唔可以嘗試理解一下呢？
 
每個人都係獨立嘅個體。為咗方便而將人輕率噉歸類，對任何人都係唔公平嘅事。而更重要嘅係，社會好多人會以一個人嘅過去判斷一個人嘅現在。被標上嘅負面標籤，係極難撕走嘅。
 




一旦對某個人貼上負面標籤或者印象，就自然以然噉對佢有先入為主嘅偏見，亦都對有關徵兆過分敏感。無論被標籤嘅人點樣不斷嘗試釐清，或者改變，都只會被認為係矯飾。
 
唉！年輕人需要時間沉澱內心，有錯咩？年輕人摸索自我，有錯咩？年輕人任性狂莽，有錯咩？
 
我諗社會上唔同年齡層嘅爭拗，總唔會有完結嘅一日。大家係唔同社會背景長大，自然會有唔同嘅價值觀同信念。但格硬要將自己所信奉嘅一套加諸喺其他人身上，實在係無恥事。
 
喺呢個急忙嘅商業社會，我實在睇唔到未來有咩希望。既然係咁，不如做下自己鍾意做嘅嘢，得閑隱蔽下，梳理下思緒，鬱下，放下負。我諗年輕人搵到自己生活嘅方向，總比盲目噉過人生更為重要。