【關乎$1000利是嘅瑞士糖心理戰】
呢一刻,我面臨緊一項重大嘅決擇!
如果揀錯咗,可能會令我有生命危險!
但而家放棄嘅話,就會失去咗一千蚊!
究竟,我應該揀全盒入面邊粒瑞士糖呢?
 
我叫馬梓宇,今日係年初十。
 
「梓宇~起身喇!百得阿姨返咗嚟香港呀,琴日我去咗佢嗰度拜年,佢話好掛住你呀~你今日放假,去探下佢啦~」
 


百得阿姨二十年前就移民咗去美國,記得好細個嗰陣去佢屋企拜年,佢整畀我哋食嘅意粉,每碟都要逐條逐條數住咁夾出嚟,每人十條,冇多冇少,話咁樣最公平喎~其實就係唔想我哋食咁多!
 
我打住喊露回應:「好孤寒嗰個百得阿姨?」
 
「唔准咁無禮貌!阿姨喺史丹福讀心理學㗎,你而家咪喺大學讀緊心理嗰啲嘢嘅?你哋應該好啱傾㗎~」
 
「唔去喇~唔得閒呀~」我打開PS4,唔耐煩咁回應。
 
「又打機呀?日日對住啲恐龍斬斬下有乜好玩啫?百德阿姨封利是,有一千蚊㗎!」
 


「咪玩啦~佢喎,邊有可能呀?」
 
「我同你輸賭喇,如果佢封利是係一千蚊以外嘅港紙,我額外貼一千蚊畀你,唔係嘅話,佢封利是就要畀咗我,制唔制丫?」
 
新年果然係賭博嘅大好日子~
我咁大個仔都未見過一千蚊利是,
更何況嗰個係百得阿姨!
 
咪住先?想陰我?
阿姨喺美國返嚟,封利是入面好可能係美金,


所以阿媽先話「一千蚊以外嘅港紙」!
 
「你畀我睇穿咗喇!你實係知道佢會封美金啦~」
 
阿媽竟然好冷靜咁講:「美金又好港幣又好,總之百得阿姨封利是價值港幣一蚊至九百九十九蚊都當你贏,一千蚊或以上就當你輸,咁得未呀?」
 
「好呀,成交~」我熄返部機都未暖嘅PS4。
 
然後,阿媽竟然攞咗份合約出嚟畀我簽!
 
【馬梓宇和媽媽的契約】
 
1. 若馬梓宇從百得阿姨手上取回來的利是,價值港幣$1-$999,媽媽需要額外給馬梓宇$1000港幣
 
2. 若該利是價值港幣$1000或以上,該利是歸媽媽所有。


 
3. 取回來之利是必需是未開封,並付有百得阿姨親筆簽名,否則作廢。
 
簽完之後,我就出發去百得阿姨屋企。
已有 0 人追稿