[絕對無糖分]就係咁，我搬左入一幢充滿一樓一嘅唐樓: ８９　恨與愛

同阿ＫＩＮＧ父母傾完後，我就返屋企，途中都一直諗要點樣先可以安排到阿ＫＩＮＧ同佢父母見面，而且最大問題係，我都唔知阿ＫＩＮＧ對佢果兩位父母仲有幾多怨恨，同埋，阿ＫＩＮＧ究竟想唔想見返佢父母。

如果，佢唔想見的話，我驚弄巧反拙。

而且，我仲未搞清陰陽怪講阿ＫＩＮＧ心入面，究竟有一個同佢一樣嘅野存在，定係咀咒？

一返到去果幢充滿一樓一嘅唐樓，係樓梯間，我隱若感受到一股殺氣……同心寒唔同，我今次係感覺到，背後好似有好多把刀飛緊過黎咁，我一轉頭一望，係用怒目望住我嘅小雨。

我從來都無見到小雨個樣係咁，佢慢慢行近我，然後話：「你跟我入黎。」



我聽得出佢呢句唔係哀求，而係一個命令，最緊要係，我好乖咁聽從左佢呢句命令，行入左佢個架步。

佢翻牌後關門，然後同我講：「坐低，我有野問你。」

語氣仲係唔多好，而我都戰戰競競咁坐係床邊，佢亦都同頭先一樣，怒目望住我問：「你做咩咁樣抵毀ＶＩＶＩ？」

我聽到後，先係一個疑問：「我、我抵毀佢？我無ＷＯ。」

小雨就話：「我果日經過龍威哥間房，聽到你問ＶＩＶＩ係未學邪術，點解你要咁樣問。」



喔……原來佢問呢樣野。

「我無啊，我只係好奇問左，我唔覺得佢都……」我野都未講完，小雨就好激動咁衝左去我面前，用手按低左我話：「我同你講，你唔好再抵毀ＶＩＶＩ，佢係一個點嘅人，我比起呢度所有人都更清楚，我會保護佢，唔會比其他人係佢背後亂講佢Ｄ野。」

佢語氣雖然平淡，但卻透露出一絲絲嘅殺氣……

「……我……我知道。」我點一點頭後，佢先放開手，我坐返直個人，望一望仍然怒目望住我嘅小雨，我明白佢咁緊張ＶＩＶＩ係因為佢地嘅關係係情侶，亦都係我最想知嘅其中一樣野之一，但呢個，已經係另一個故事。

我離開左小雨架步後，繼續返上樓，而岩岩比小雨咁嚇一嚇，我突然諗到，其實，只要仲在意一個人，心中總會存有感覺，無論係恨也好愛也好，都只係一線之差，只要我搵到阿ＫＩＮＧ有無想見返佢阿爸阿媽嘅感覺果陣，未知道下一步點行囉！？