【奇幻/神話】我好似唔小心成為神: 第一章 新手上路(一)

  我係一個普通既中學生，應該咁講，我以前係一個普通既中學生。
  唔知你地有冇諗過，神話入面既神係真實存在既呢?唔信係正常，因為世界上有無數咁多既神話，全部都存在，咁咪神多過人?
  我以前都係咁諗。
  但係我錯左。
  「喂!Dickson!醒啦，一間仲要上chem阿。」Jessica拍醒左我。
  「你夜晚又唔洗補習，阿sir講野又唔悶，點解你可以堂堂都訓架。」
  「唔知呢，冇乜野做咪訓囉。」我搵下個櫃桶，拎左本chem書，帶埋筆袋就走左。
  Jessica係我14年既同班同學，唔係因為我萬年留班，只不過係由幼稚園到高中都係同佢同班。Jessica唔高唔矮，但樣貌都算有幾分姿色同仙氣，聽講有大半班人都追緊佢。
  「你又去邊阿，Miss就到課室架啦，一間你又比人罰企架啦。」
  「朗賢仲打緊波，我去叫佢。」我揮一揮手，慢慢咁走落籃球場。




  「喂!Dickson，呢度阿。」朗賢停低運球，同我招手。
 
 「上堂啦，我唔想又比人罰，我唔同你阿，D老師咁愛~惜你。」我拋本書比朗賢。
 「你係咪講呢D阿你，下?你係咪講呢D。」朗賢勒住我條頸。
  朗賢係我從小到大既玩伴，由於兩邊家長係死黨，我地自自然然都係一樣。朗賢份人好陽光，減完肥既佢外型亦改變左好多，打波又勁，讀書又醒，係典型既男神。
  「你真係唔打返波阿?」朗賢既語氣變得好認真，但我條頸仲痛緊，姐係佢未放開我。
  「打唔倒啦，再唔去上堂睇怕我放學仲做緊past paper。」
  我同朗賢有一年去踩單車，佢架單車既剎車突然壞左，落斜既時候剷左過黎我度，我墊左係底，從此右手抬高就冇力。一個靠運動特許入學既人，就咁就要開始讀書。
  「又係你兩個，兩個放學留低，同我做完10年pp同10年a-level先好走。」Miss已經習慣曬咁講，Jessica另曬頭咁嘆氣。
  「我走先啦，一間我阿媽煮完糖水，我拎過黎比你。」朗賢拍下我膊頭，好似幫我打氣咁。




  「阿頂，又唔諗下邊個害我既。」我咁諗。
  「果然做完都天黑，快快手返屋企沖涼打機算。」我伸下懶腰。
  我停低左落黎，因為不遠處有一個人訓左係度。我就走左過去，想了解下情況。而呢個，就係改變我一生既決定。
  「少年......汝的名字是?」呢個人好似受左重傷，但口中念念有詞。咁正常人第一反應就係:
  「唔好講咁多啦，我叫白車黎幫你。」我拎起電話，準備就叫白車。
  「白車黎幫你?名字真奇異，白少年阿，汝有緣碰到生命走到盡頭的吾，吾便將能力賜予汝，望汝能擊退阿薩神族那些混蛋。這是吾......唯一......唯一的希望，望弗蕾亞......與你同在。」呢個人就好似斷左氣咁，跟住就變左光粒咁飛走左。
  呢一刻，我先知道，咩大衛高柏X、咩劉X，咩YIX，都只係三流魔術師。