【奇幻/神話】我好似唔小心成為神: 第一章 來自太陽既刺殺(一)

  「我係度諗緊，係唔係應該幫你招攬下兵馬呢?」安潔拉無啦啦講。
  「點解阿?點解你要咁諗阿?唔好啦你，我想踢波阿。」我完全唔想理呢個人。
  對上一次無啦啦比佢拉入去同神打交，好似同親佢一齊都冇好野咁。
  「我見你D朋友好似都有D素質咁阿，例如朗賢阿，佢一定會成為你重要既兵力。」安潔拉既神情表現佢係講緊真話，真係有呢個打算。
  「兵力?你意思係叫佢地加入我?同神戰鬥?唔好傻啦，我唔會比佢地冒險。」我決斷咁講。
  「Dickson阿，雖然你貴為魔王，但冇人可以保證倒你百分百可以打贏所有神架，多一分兵力就係多一分保障，必要時我地都可以成為你既盾。」安潔拉不斷想說服我。
  「盾?姐係幫我擋致命既招?唔好講笑啦，我係有血肉既人，唔係果D對破壞毫不在意既神。好啦，講到呢度好啦，我唔想再講。」
  學校鐘聲響起，我同安潔拉都不歡而散。
  「喂，Dickson，一齊去食野啦，聽講學校附近開左間糖水鋪，好似好食架喎。」朗賢同Jessica問咁岩撞倒既我。
  「咁早就食糖水?」我稍稍吐槽一下，然後就跟住佢地去。




  朗賢既身體實在係好到難以置信。唔單單係講作為校隊既身體素質，更強既係佢有女人夢寐以求既能力，食極都唔肥。好多時作為經常運動既人都要戒口，尤其是朗賢呢種中學MVP級既球員，不過佢好似完全冇呢種原因，教練都對佢隻眼開隻眼閉。
  「點阿，諗住幾時入返校隊?」正當我羨慕妒忌朗賢既身體既時候，佢突然咁問我。
  「校隊?冇乜打算喎，我印象中學校既籃球隊唔係都幾勁架咩?我幾年冇打，入唔返啦。」
  我並唔係自謙，朗賢係隊中雖然係主力，不過係我眼中佢已經係學生入面既怪物級球員，而其他既人都唔差。
  「冇問題啦，你傳波我覺得都係數一數二好既，點阿?一係我同教練講聲，叫佢比你試試手?」朗賢睇黎好致力叫我入校隊。
  「遲D再講啦，依家Miss Chan D功課同小測都未溫好，仲入咩校隊阿。」我拍一拍脹到過份既書包。
  「乜你會做功課架咩?點解我唔知既?」Jessica飲住可樂咁諷刺我。
  「雖然我係唔識做阿，但唔代表我唔識抄既。」我毫無廉恥咁講。
  正當我地3個係呢D野係度互相吐槽既時候，有一個女性入左黎。
  「唔該，我想要一杯奶茶。」黑髮既女性講。




  呢個女仔睇落應該都係一個美人，長而瘦既美腰，雖然衣服同褸既問題睇唔太清楚，但都大概估得出一定係身材均勻既人。
  Jessica雖然係一個高中學生妹，但係身材都係明星級既人，加上性格都尚算討好，所以鍾意佢既人好多。而眼前呢個女仔，同Jessica走完全唔同既美，如果Jessica係比較溫和保守既美，呢個女仔就係冷酷難以接近既美。
  「點阿，你望夠未阿?」呢個女仔走過黎同我講。
  聽到佢咁直白咁講，我連可樂都噴埋出黎，而朗賢就一早已經掩手忍笑，Jessica照常投黎殺意既目光。
  「唔緊要啦，我相信我地好快會再見，拜拜。」呢個女仔揮一揮手示意再見，手戴住一個印住太陽小書本既手飾。