【奇幻/神話】我好似唔小心成為神: 第九章 新手上路(九)

  「時間夠，停筆，將試卷係後面傳上黎。」教chem既Miss Chan宣佈。
  係同奧丁戰鬥完既呢幾日，我過得好冇實感。究竟係咪我夢出黎架?我中二病到咁?但佢既出現，話比我知，呢個係現實。
  「Dickson，點阿，你份Test識唔識阿?」安潔拉行過黎好似慰問我咁。
  唔知點解佢咁神通廣大，安排倒同我完全一樣既選修科黎讀，但大概都係用果D控制人心既手段掛。
  「還可以啦，份野唔係太難姐。」我講得好似好輕鬆，但實際上份野難到喊，我都只係勉強做完，不過係女仔面前，唔衰得。
  「嗯......睇黎都唔一定關事。」安潔拉自言自語。
  「關事?咩關事阿?」佢引起左我既好奇心。
  「通常黎講，一般農民所推舉既神，姐係弗雷、索爾咁啦，智慧水平都唔高，並唔係話戰鬥智慧，係學科智慧。因古時好推舉各司其職，尤其係西方，所以正常既戰神、農業神既智慧都唔高，所以我仲以為你一定會零曬所有科姐。」安潔拉表情一如平常咁講出左好大鑊既野。
  「咩話?你講多次?我希望我聽錯左D野。」
  「睇黎情況唔係咁惡劣姐，既然弗雷既神力冇令你智慧下降，咁就更加證明魔王既強大，居然吞噬神力既情況下，仲保留自身既優點，不愧係世界上三個魔王之一。」安潔拉好似擦鞋，但又唔覺得佢係真心咁。




  正當我諗住點樣回應佢既時間，朗賢就走左過黎。
  「喂，Dickson，放飯啦，你唔係唔記得左今日係打班際既日子下話。」朗賢滿面笑容，雖然平時都係一樣，但今日份外開心。
  係果次我射三分入左既時候，朗賢就一直一直咁叫我參加，最後仲幫我報埋名。
  「係囉大忙人，又同安潔拉係度卿卿我我，真係世風日下。」Jessica既語氣有D唔同，平時既佢比較文靜少講野，好少會咁樣問人。
  「咩阿，你地搞錯啦，我地唔係......」正當我想解釋既時候，安潔拉就抱住我隻手。
  「唔好意思阿，Dickson前幾日既表現太好啦，又強勢又強烈，搞到我好似離唔開佢咁。」安潔拉語氣變得令人誤會。
  係呢一刻，我感受倒兩股氣息。
  班上面所有男同學既殺氣，同埋女同學既鄙視，當中最強烈既就係Jessica，佢兩股氣息都十分濃厚。
  「切，換衫上場啦，傻仔Dickson!」Jessica語氣好重咁講完就走左。
  「唉~知道幾痛苦未，走啦，唔係冇時間熱身。」朗賢係抽左我一句水之後就好似幫我圓場。




  「我一間先同你計，講埋D咁既野。」我用眼神狠狠咁望住安潔拉，但似乎冇咩用。
  更衣室既汗臭味已經好耐冇接觸過。
  因為我地班既體育堂係早上，所以更衣室既環境可以話係最理想既狀態，乾淨冇氣味。但當我作為校隊既日子，果時既練習、比賽都係落曬堂既課後活動，經過無數男人既體臭摧殘，我每次都會用大量既止汗噴霧去治標不治本咁處理左佢。
  其實真係十分感觸，畢竟冇諗過可以再用健全既狀態接觸籃球。
  「發咩呆阿，一間狂傳球比你，射到你手仔軟阿。」朗賢掛住佢既招牌笑容。
  「車!邊個怕邊個阿，你唔好又扮AI過人跌波就得，成日以為自己好型。」
  「喂喂喂，講到明呢D黑歷史唔再講架啵!」
  我再次同朗賢著住同一隊既制服，又可以一齊打波。
  係呢個時候，我好慶幸弗雷比左佢既神力比我，令我既日常生活可以回復色彩，但冇耐之後，呢個神力又為我帶黎極大既麻煩。