<<係咪網戀都實冇幸福?!>>: 3 哈佬!我叫嘉欣 : )

放左學之後，我同菲菲就跟左豬女返屋企。無錯!因為我地竟然聽左豬女講，要開始學點樣上chatroom識男仔!講真呀，呢個年紀既女仔，點都會有啲心思思想識下男朋友架嘛...咁我地學校又無男仔識喎...同埋呀!見豬女今日係學校成日都係到禁電話，仲係咁甜思思咁笑，你都唔好話唔羨慕...咁而家都係上下網姐，又唔係話真係即刻就要見面，識返個男仔都好呀!!

豬女：「拿..我就係用呢個lovelove chatroom識到bb架喇!其實真係好簡單架喳!開個ac，咁就可以係chatroom度同人傾計架喇!你地睇下喇!」
豬女好快手就登入左，我地仲見到佢個名叫做「可愛小豬女>3<」 !
我，菲菲：「嘩!你個名....真係...」

豬女：「咩喎!網名之嘛!其他人個d仲誇張啦!就係要咁人地先會主動搵下你傾計架嘛!」
見到豬女係個chatroom度係咁碌，又係喎!咩「珍系英俊!」、「_靚囡在此_*」、「淨係曖您<3」..仲有好多估都估佢唔到既名，睇黎真係我見識太少!

突然間，我地就聽到「叮!」一聲，然後就係個chatroom既框框度見到..



「最愛小豬女的俊俊<3」悄悄地對「可愛小豬女>3<」說：「bb我好掛住你喔!你有無掛住我呀?」

然後，我地就見到豬女好快手地打字...框框度又彈左...

「可愛小豬女>3<」悄悄地對「最愛小豬女的俊俊<3」說：「bb我都好掛住你呀!啜啜啜>3<」

望住豬女不停甘覆，然後又不停咁「叮!」，跟著豬女又覆，然後又「叮!」...佢好似已經唔記得左我地係坐左係佢隔離...

豬女：「呀!唔好意思呀!我唔記得左我係要教你地點用添!你地等等..等我同bb講聲先!」



然後，我地又見到豬女好快手地打字...框框度又彈左...

「可愛小豬女>3<」悄悄地對「最愛小豬女的俊俊<3」說：「唔好意思呀bb!你要等我一陣喔!我要教我朋友點用個chatroom...我好快會返黎架!你要等我呀!!bb小豬女愛你唷!啜啜啜>3333<」

之後又「叮!」...框框度又彈左...

「最愛小豬女的俊俊<3」悄悄地對「可愛小豬女>3<」說：「bb你要快啲返黎呀!我會好掛住你架!!等你等你>33333<」

就係咁，豬女終於捨得登出自己個ac，然後開始教我地點樣申請ac喇..



首先，當然係要改返個名啦..雖然見到個個都改啲咁有型既名，但我都係叫返自己個名...「嘉欣 : ) 」，而菲菲呢，就改左自己個名做「人見人愛小菲菲.3.」之後就入埋個出生日期啦.「​1993年1月18日」(拿!而家係講緊2006年既事架!)入哂所有野之後，就見到完成兩個字喇! 豬女幫我地整完之後，就叫我地自己返去up埋張相上去，仲話之後就可以係chatroom同人傾計喇喎!!佢一輪咀講完之後，就叫我地快啲返屋企玩喎...其實係因為我地阻住左佢同佢個「最愛小豬女的俊俊<3」講電話之嘛!咁我地都好識做既，都係自己返屋企慢慢摸索下點用啦!

返到屋企，就照住豬女教我地既方法，up左一張我自己都覺得影得唔錯既相上去。然後，就開左個chatroom望下，睇下有無啲咩人可以傾下計!

但踏出第一步永遠都係好難...望左好耐都唔敢禁落去...

突然間...「叮!」...然後我就係個框框度見到..

「呀寶 ! 」悄悄地對「嘉欣 : )」說：「哈佬! 我叫呀寶!」

我望住個框框..呆左一陣..真係估唔到..有人會主動同我講野!!之後，我就好認真咁覆左一句....


「嘉欣 : )」悄悄地對「呀寶 ! 」說：「哈佬! 我叫嘉欣 : )」