90後的初戀——五十年後嘅我，叫我向佢表白。: 【一】

炎炎夏日，操場周圍都充滿住蟬嘅叫聲，學生數住「一﹑二﹑一﹑二」嘅聲音響遍全校，而我就係身穿體育服嘅學生群入面。我叫陳世杰，好普通嘅中五生，係學校入面屬於只有普通成績﹑普通外表同普通體能嘅普通人。今年已經中五，恐怕升上預科之前，我嘅中學生涯都會普普通通咁過——溝唔到女，考唔到狀元，入唔到校隊，但同時亦做唔到臭名遠播嘅MK仔。


「跑唔郁啦……抖下先！」每年呢個時候，都係體育堂考體能試嘅時候。

「陳世杰，跑埋佢啦，仲差兩個圈就及格架啦！」我好朋友啊俊拉住我隻手，想拉我繼續跑。

「由佢肥佬囉，PE科咋嘛！我去飲啖水先。」我耍住手咁行開，行到埋去水機個陣，突然聽到附近嘅女同學大叫。

「睇波啊！」話口未完，就一大個排球車埋嚟我個頭頂度。本身跑咗十一個圈嘅我，已經熱到暈暈地就快中暑，呢下成個排球車過嚟，簡單可以話係一下就KO咗我。我成個人企唔穩，跌咗落地。





「大鑊啦！喂，你有冇事啊？」有個紥住馬尾、身材矮小嘅女仔跑過嚟，彎腰望住我。佢寬鬆嘅運動服內，隱約見到好似係白色嘅……

「喂！變態！」佢發現我視線望緊啲唔應該見到嘅嘢，一腳踢埋嚟。

「妳黐線架……好痛啊！」我捂住個肚，成條蟲咁係地下度碌。

「係喎，唔記得頭先我個排球打親你添，真係唔好意思！你點啊？」佢蹲低，一手伸過嚟，揭開我額前嘅劉海。

我目不轉睛咁望住佢個樣，原來我哋級有個咁可愛嘅女仔，點解我之前一直冇留意到架呢？





「有冇見暈啊？作嘔之類？」

「冇事……」我望佢粉紅色嘅咀唇，睇到目定口呆。

「喂，啊杰，你做咩瞓咗係度啊？」啊俊跑完圈，走咗過嚟睇我咩事。

「啊俊？佢係你朋友？頭先我個波打中佢個頭，佢就暈咗係度。你哋識嘅就好啦，鄭Sir叫我過去打波啦，你幫我照顧佢先，有咩事你哋再搵我啦。」馬尾妹執起個排球，就小跑離開咗。

「點啊你，死得未啊？」啊俊一手扶起我，兩個人慢慢一齊行去水機。





「冇咩事，頭先企唔穩姐。咦，個女仔你識架？我未見過嘅？」

「黃子霖喎！你居然唔識佢？」啊俊一臉驚訝咁望住我。

「唔識。咩人嚟架？都幾可愛啊。」

「梗係可愛啦，文科班嘅班花！我同佢一齊補習嘅，叫做識識地囉。」

「哦，都幾得意啊。」

「死仔，對人起痰啊？想溝女啊？」啊俊一拳打過嚟。

「黐線啦，都唔熟。」我哋飲完水，就行翻去更衣室沖涼換衫，準備一陣上堂。





「咁就好啦，子霖好多人追架，我哋學校嘅游水港隊，文學班個才子，仲有風紀委員長，你有排都唔係佢哋對手。」

「諗咗去邊啊你……一陣仲有數學test，我上課室溫書先，唔得閒理你。」



換好衫之後，我拎住個袋，從操場跑翻上課室。翻埋位之後，我第一時間就拎本筆記出嚟，睇翻之前上堂抄低嘅定理。

「圓形……」我急速地揭開本筆記，終於俾我搵到今日要考嗰個chapter。

正當我溫得入神，唔知係咪因為頭先被個波打親，突然眼前一黑，成個人差啲跌落地。我捽一捽對眼，慢慢坐低，執翻頭先鬆手跌落地本筆記。奇怪嘅係，我再次打開本筆記嘅時候，居然唔見咗三角形同圓形個chapter。環顧四周都係空位，應該冇人可以係我暈個剎那，將我本筆記偷龍轉鳳，或者撕走幾頁。於是我坐翻好，飛快咁向前向後翻本筆記，點知都係搵唔到三角形同圓形嘅筆記。

「做咩事騰曬雞？」呢個時候啊俊翻到嚟，見到我勁慌張咁揭本筆記，走嚟問我咩事。

「變曬空白頁嘅？冇理由架，頭先明明有……」仲有五分鐘就上堂，我緊張地左揭右揭本筆記。





「係咪你記錯咗啊？會唔會抄咗係第二本筆記度？」

「冇可能！頭先我先至睇完……」正當我拎住本筆記，好激動咁企起身想同啊俊解釋時，突然間個人再次眼前一黑，成個人暈咗係地下。


朦朧間，我見到凌空飛起嘅筆記簿，發緊光。



「喂，你醒啦？嚇死我啦，你頭先又話冇事嘅。」再次睜大眼嘅時候，又係黃子霖出現係我眼前。

「又係妳？」我慢慢坐起身，先發現原來我係保健室。

「你暈咗成個下午啊！啊俊話我知，你一定係被我個排球打暈咗，所以叫我嚟探你。」





我暈咗？我依稀仲記得，暈之前，我本筆記簿唔見曬三角形同圓形嘅定理，變曬做白紙。

「我本筆記簿呢？！」我慌張咁摷我身邊個書包。

「你係咪搵緊呢本啊？」黃子霖遞咗本筆記俾我。

我心急到一下搶走本筆記 揭開入面睇，果然，全本筆記簿都變成空白。

「你冇嘢啊嘛？一日都係我唔好，冇見到有人行過，先打到你個頭咁樣……不如我幫你call白車，入院照下個腦，需唔需要啊？」

我大惑不解咁反復揭本筆記，點知睇翻筆記簿第一頁嘅時候，第一頁竟然慢慢咁、一筆一劃咁出現啲字。

「妳……睇唔睇到啊？」我好驚恐咁拉住黃子霖隻手臂。





「睇咩啊？」黃子霖哄個頭埋嚟，「玩我啊？咪空白頁囉。」

「本簿寫緊字啊！」我用力搖佢隻手，佢一臉疑惑咁望住我。「妳真係睇唔到咩？」

我轉過頭，先發現黃子霖塊面哄得好埋，同我塊面只差8cm嘅距離。兩人同時呆咗一陣，我先意識到我隻手拉得佢太埋。

「Sorry……」我即刻鬆手。

「唔……唔緊要。你睇嚟真係有需要call白車喎，我去同老師講一講先，你休息下先。」黃子霖紅都面曬咁跑出去，而我就尷尬到手心都出埋汗，合上筆記，好好地瞓低休息下。


「冇事啊，你個腦一切正常。」

「唔係呢，醫生，我今日見到我本筆記識得自己寫字啊！」我好緊張咁拎本筆記出嚟。

「咁睇嚟你需要我轉介去睇精神科……」

「得！冇事！我講笑姐！我冇咩事，就翻屋企啦……」我即刻拎翻本筆記同埋書包，光速逃離病房。

我行出醫院大堂個陣，仍然諗唔明今日發生咩事。唔通真係我黐咗線？於是，我打開本筆記，睇下筆記寫咗咩出嚟。


「啊杰，你好。我是五十年後的你。」

五十年後？！唔通我真係有幻覺？我抬起頭，環顧四周一切如常，只得我本筆記簿有異常。

「今早，你應該會被一個排球打中頭，數學測驗的時候會暈倒。這時候你一定會想，是否有人惡作劇把你的簿寫花了，你可以放心，我真的是十年後的你。當你離開醫院的時候，天會突然下起大雨來，而你媽媽會提著藍色雨傘在門外等你。」

我慢慢行近門口，果然出面落緊大雨。

「啊杰！呢邊啊！」一把女人聲大叫過嚟，我望真啲，發現我媽拎住藍色雨傘係門口向我招手。

「這個時候，你一定會很驚慌，為甚麼十年後的自己會出現在筆記簿上。請你冷靜一點，讓我說下去，我找你的目的只有一個，這個星期內，請你一定要向黃子霖表白。」

吓？表白？今個星期？但我今日先識佢咋喎。


「你做咩傻咗咁望住本空白簿啊？快啲走啦，今晚打風啊。」啊媽走咗入嚟，睇我做咩。

「啊媽，連妳都睇唔到？」我O曬咀望住啊媽。

「傻咗啊？走啦，一陣地鐵多人啊。」啊媽急急腳咁拉住我走，我唯有一邊行，一邊合上本簿。


我普普通通嘅中學人生，從此改變。