90後的初戀——五十年後嘅我，叫我向佢表白。: 【二】
我落到地鐵，仍然嚇到呆咗，望住本筆記。
「我來自你平行世界的未來，所以即使你的世界被我改寫了，也影響不了我的世界。這本筆記是單向輸出的，你在這裡寫的回應，我也無法看見。這個技術在五十年後才被科學家發明和普及，我能改寫你的未來，並且監察著你世界的變化。但法律規定，只能用作改寫私人的人生遺憾，不能使用在有關金錢利益的事上，或是影響世界大局的事，這是為要防止再次出現希特拉之類的人物。
抱歉，有關更多的事，我不能一一在此陳述，而且每次我都被規定，不得提供大量的信息去改變你的未來。五十年後的你，孤單一人，並且已經因病而白髮蒼蒼的坐在輪椅上了。請你切要按著我寫的事去行，我想讓中五的你，不要抱有遺憾的走下去。」
我望住本筆記，睇到眼濕濕，如果呢個係惡作劇，確實係一個好成功嘅惡作劇。我揭後睇，發現剩低嘅都係空白頁。
「唔通未show到出嚟？」我左翻右揭本筆記咁喃喃自語。
「做咩成程車係度望住本筆記？咩都冇寫嘅？但呢本簿你唔係用咗大半年啦咩？」
「新買嘅……」我合上本簿，急忙放入書包。
「本迷彩簿咁肉酸，你居然會買多本新嘅。」我媽最憎迷彩花紋，一臉嫌棄咁望住我。
翻到屋企之後，我爸已經係屋企睇緊電視。
「咁早翻嘅？我去煮飯先。」啊媽見到我爸已經坐係客廳，就急急腳去咗廚房。
「我同同事食咗啦，妳唔駛預我個份啦。」啊爸向住廚房大叫，之後望向我：「啊杰你點啊？個頭有冇事？」
「醫生話冇咩事，我入房做功課先。」我成個腦都係諗住筆記嘅事，冇心機同我爸講落去，就翻咗入房開電腦。
莫非呢幾年將會出現我人生最大嘅遺憾？莫非我係未來會鍾意黃子霖？所以五十年後會叫我向佢表白？但，我今日先至識得佢，無端端向佢表白，佢一定會以為我係痴漢。
「Hi！」我開咗電腦之後，有個唔識嘅人係MSN度Hi我。
「你係？」
「我係黃子霖啊！你個頭冇咩事啊嘛？」
睇嚟命運嘅安排真係注定我同佢係有緣……我諗咗去邊啊？人哋都係擔心我有冇事姐。
「冇咩事啦，唔駛擔心。」
「咁就好啦。你大後日Lunch Time得唔得閒啊？」
「Yes.」
「我聽日請你食飯補數啦，今日搞成你咁樣，我都唔好意思。」咁好？居然有文科班班花請我食飯，我梗係卻之不恭。
點知第二日，佢居然帶我去學校Canteen，自然好多人望過嚟。
「係子霖BB啊！」一旁嘅男同學望過嚟，用一種明顯唔想你聽到，但又可惜令你聽到嘅聲線講，搞到我成餐飯都如坐針氈咁。
「啊……黃同學，妳都幾出名架喎，個個都望住我地。」
「係咩？我冇留意添。不過我都冇做過咩，點解呢？」黃子霖瞪大對眼咁望住我，之後一邊咬住筷子咁望向四周。
原來係個天然呆，果然係班花，好可愛啊……
「係呢，妳又會有我MSN嘅？」
「啊俊俾我嘅，你介意我冇問過你就拎咗你email啊？」佢一臉驚慌咁問。
「唔係，我隨口問下姐。我冇咩事架啦，妳真係有心。」我講完之後，佢就鬆一口氣咁繼續食飯。
唔擅長展開話題嘅我，之後足足Dead air咗十分鐘。突然間，我醒起筆記叫我去表白，嚇到我連橙汁都就快噴出嚟。
「冇事啊嘛？」佢即刻拎咗張紙巾出嚟俾我。
「冇……」我接過紙巾，忽然諗到，話唔埋呢次食飯係我鋪墊去表白嘅良機呢。點知我都未抹咀，就響起上堂嘅鐘聲。
「下次再一齊食Lunch啦，我上翻去先。」
「咪住！」我一時衝口而出，叫住黃子霖。
「嗯？」佢轉過身嚟望住我。
「妳信唔信……有平行世界？例如有另一個世界嘅妳，叫妳唔好做啲咩……」一時間諗唔到講咩好，我唯有講呢樣。
「吓？」佢呆咗望住我。
「呃……冇咩事啦，我講下姐。」
「如果有平行世界，我諗，我會講六合彩number俾自己聽，咁我就打跛腳唔駛憂啦。」佢笑住講，之後揮揮手小跑走咗。
唉，如果有咁簡單就好啦。
翻到課室之後，我好順手咁打開本筆記，好似以前咁樣準備上堂。
「你表白了嗎？」筆記簿再次一筆一劃咁浮現啲字出嚟。玩我咩，邊有咁易表白啊？況且呢一刻嘅我，根本就唔鍾意佢。
「喂，聽講你頭先同文科班班花食飯喎，有咩傾啊？」啊俊走過嚟，大大力咁拍我背脊。
「噓！咪咁大聲啦……」
「車，怕咩姐，頭先canteen大把人見到，仲影曬相……」
「吓？」我嚇到好大聲咁叫出聲，全班嘅人望咗過嚟，我唯有壓低翻把聲。「傾鬼傾馬咩，都唔熟，你知我又唔識開展話題，成程dead air啊。」
「哎啊，真係可惜啦。不過人哋係女神，係娘娘，同你唔啱咀型都正常嘅……」
「頂你啦，咁樣講嘢……」我輕力批手肘同佢講。
「邊個講頂！」突然，教中文嘅Miss Lee行入嚟，聽到坐近門口嘅我同啊俊嘅對話。「邊個唔認，就全班都抄一千次頂字！」
Miss Lee出名兇狠，我扮曬嘢咁眈天望地，唔敢直視Miss Lee。
「我數三聲！三、二……」
我視線慢慢望去書檯上面嘅筆記簿，慢慢浮現出「要承認是你說的……」幾個字
「其實係……」正當啊俊想幫我頂罪嘅時候，我嚇到成個人企咗起身。
「陳世杰，你企起身做咩啊？係你講架？」
「吓？唔係……啊，係我講嘅。」點解我真係會跟住本筆記講嘅咁樣做架？！
「你知唔你我哋學校百年嘅純樸校風係點樣維繫架？全靠我哋師生都保持一顆清潔的心，謹言慎行……」
「哈……」
突然，課室後排傳出一聲笑聲。
「邊個笑？！聽唔到我教訓緊同學架咩？企起身！」
「Sorry囉。」我哋班入面嘅MK仔曹大志慢慢企起身，一邊R住頭一邊講。
「你啊！件裇衫又飛曬出嚟，校服儀容不整！」Miss Lee指住佢，大動肝火咁講。「你兩個都同我出去走廊罰企！」
「吓？」曹大志叫咗出聲，「但我哋中五架啦喎……」
「就係因為你哋中五，都冇中五嘅樣，所以……」
「得！唔好嬲！我帶佢出去。」我立即安撫Miss Lee嘅怒吼，向曹大志打眼色。
「摺——」曹大志一臉唔耐煩咁跟住我出去企。
「嘩你睇，隔離班有兩個人要罰企喎！咁大個人，哈哈……」其他班嘅人望過嚟，搞到我哋一齊勁尷尬咁面向牆壁。曹大志好唔高興咁係度踢地面嘅石仔，一腳向後踢出去。
「哎啊！」我哋身後傳嚟一把女仔聲尖叫，嚇到轉身望過去，原來係黃子霖被頭先舊石仔絆倒，連人帶佢手上嘅一大疊簿跌咗落地。
「喂，妳冇事啊嘛？」頭髮長過耳仔嘅曹大志彎腰，向黃子霖伸出手。
我明白啦！原來係因為會見到黃子霖，所以筆記簿先會叫我承認係自己講嘅……我立即衝過去，扶起黃子霖，曹大志就好冇癮咁縮翻埋隻手。
「陳世杰？你哋做咩企起度嘅？呢位係……」
「罰企囉……我係曹大志。」曹大志好尷尬咁講。
「又會咁大個人都要罰企嘅……頭先舊石係你踢出嚟架？你唔知會整親人架咩？」黃子霖谷起翻面，氣沖沖咁走埋去問曹大志。
我立即走上前，拉開黃子霖。
「唔好嬲啦，意外嚟姐！拿，堆簿我幫你執翻好啦，bye bye！」
「陳世杰，你都唔好同呢啲人玩咁埋啦！你睇佢，衣衫不整咁……」黃子霖接過疊簿，一臉鄙視咁從上而下打量曹大志，然後走咗。
黃子霖矮小嘅身軀同佢嚴厲嘅語氣形成強烈對比，走個陣拎住一大疊簿，就好似成隻倉鼠咁。我轉過身，只見曹大志望住黃子霖嘅背影偷笑咗下。
「佢都幾得意啊。」曹大志笑住同我講。
莫非……小息嘅時候，我即刻衝入課室，拎起筆記簿一睇，果然……
「今天，黃子霖會碰到她將會喜歡的人——曹大志。」