90後的初戀——五十年後嘅我，叫我向佢表白。: 【三】
第二日一早，我就跑咗去黃子霖課室門外等佢翻學。
「你搵人啊？」一個平陰劉海嘅女仔走咗埋嚟問。
「呃……算係啦。」個女仔雖然唔算好靚，但白到反曬光。
「我係羅佩思，係呢班嘅班長，你駛唔駛我幫你轉達？」
羅佩思個人好瘦，好似一陣風就吹得走佢咁，但佢又生得好高，高到只矮我半個頭。
「你過嚟搵我做咩啊？」突然，黃子霖係我身後篤咗我一下背脊，「哦？原來係搵班長啊？咁我走啦。」
羅佩思聽見我哋對話，就好識趣咁走咗。
「唔係啊，我搵妳啊。妳嬲完未啊？我一陣請你食飯啊？」
「咁又唔駛，尋晚我媽叫我熄電腦溫書姐，我冇嬲。打開手掌啦。」佢一下捉住我隻手，係裙袋度拎咗枝筆出嚟，係我手掌上面寫字。
「妳寫咩啊？」
「拿，呢個係我電話，我用人仔台嘅，如果你MSN搵我唔到，而且又同台嘅，就SMS搵我啦。」
「同！梗係同台啦，個個都用人仔台嘅。我今晚搵妳啦咁！」
「隨便你啦～都要睇我得唔得閒應你機嘅！」黃子霖好傲嬌咁藐咗下咀，就揹住佢嘅Gregory書包走咗入課室。
個日放學，我即刻去人仔台開多張電話咭，諗住用嚟搵黃子霖。
個晚，我哋傾咗一晚謁，由陳奕迅講到容祖兒，由Twins講到去新人女團Hotcha。原來黃子霖中文好好，拎咗好多作文獎，平時仲會係Xanga寫日記同埋寫故事。我上佢Xanga睇，佢平時主要都係post佢同屋企人嘅合照多，搞笑嘅係，成隻倉鼠咁嘅佢，屋企居然養咗隻白貓。
「我想去整容啊……」第二日，佢突然send咗個sms俾我。
「點解啊？」
「我覺得Stephy好靚啊，我都想好似佢咁靚。」
「唔駛啦，你都夠靚啦。」我一時手快，send咗出去。弊，會唔會太急進呢？我好彷徨咁拎住部手機走嚟走去，都係等唔到佢覆我。死啦，我一定被佢認為係痴漢啦。
呢個時候，啊媽拍門走咗入嚟。
「啊仔，陪我去飲茶……」啊媽講完，就拎住手袋準備出去，「老公，起行啦。」
「我唔去啦，約咗人。」啊爸突然好急忙咁著鞋出門。
「約咗人？今日星期六，邊個搵你？」
「呃，啊李囉，佢話佢老婆肚痛，唔知係咪生得呢，我去幫佢手先。」啊爸講完，就急急腳走咗出去。
我屋企一家三口，小康之家，住係居屋，平時啊爸翻工好忙，而啊媽就係慈善團體做文職工作，一家人都過住風平浪靜嘅日子。閒時啊爸啊媽最開心就係一齊睇TVB金曲之夜，而我就通常呢埋係房入面打機，好少出客廳。
「咁我哋仲食唔食啊？」我問。
「得兩個人仲飲咩茶啊，唯有轉食茶記啦。」啊媽有少少失望咁講，我哋就去咗附近嘅茶餐廳食飯。
成餐飯，我都掛住望住部Sony Ericsson，等緊黃子霖嘅sms。
「……黑暗已在空中盤旋 該往哪我看不見
也許愛在夢的另一端 無法存活在真實的空間
想回到過去 試著抱妳在懷裡 羞怯的臉帶有一點稚氣
想看妳看的世界 想在妳夢的畫面 只要靠在一起就能感覺甜蜜
想回到過去 試著讓故事繼續 至少不再讓妳離我而去
分散時間的注意 這次會抱得更緊
這樣挽留不知還來不來得及 想回到過去……」
茶餐聽播起呢首歌，令我諗起筆記簿嘅事，陷入沉思中。呢一刻，我都唔肯定自己係咪鍾意黃子霖，貿然同佢表白，會唔會好奇怪呢？但萬一第時我真係後悔嘅話，點算呢？
「喂！食飯就唔好痴痴呆呆咁望住部電話啦！你老竇平時係咁，你又係咁，真係唔好大教壞細。」啊媽講完，轉身望向收銀放住嘅喇叭，「咩歌嚟架，念經咁聲，依家真係咩狗屎垃圾都做得歌手，世界變曬。」
「係呢，啊媽，妳有冇咩遺憾嘅事啊？」
「邊得嚟咁多遺憾吖，咪又係咁過，做人嘅嘢見步行步，邊有咁多嘢係輪到自己揀？冇得揀，咁就即係冇嘢好遺憾啦。」啊媽一邊食牛河一邊講。
「咁……如果，未來嘅妳同妳講，有啲嘢妳依家唔做，就會後悔一世，妳會點？」
「啊仔，你今年中五啦，就快考會考啦。」啊媽放低筷子，「唔該你認真啲讀書，唔好成日天馬行空，諗咩回到未來啦。」
「知喇，我問下姐。」
呢個時候，手機一震，我望過去，黃子霖終於覆我啦。
「Sorry，頭先發生咗啲事，冇睇到手機。」
「冇咩事啊嘛？」
「冇啊，我頭先係屋企樓下撞到一個人，你估下係邊個咁巧合住我附近？」
「吓？邊個啊？」
「我撞到曹大志啊，佢仲主動同我say hello啊！」
我望住手機，心裡一沉。難怪五十年後嘅我，會叫我今個星期內表白，因為我嘅對手就住係佢附近，近水樓臺。
「可能我之前有啲誤會咗佢，原來佢份人都幾nice啊。」
「係咩？你哋傾咗咩啊？」
「冇啊，都係閒話家常咁囉，佢住我樓下架。唔傾住啦，我食飯先。」
如果呢個時候表白，會唔會太唐突呢？但如果再唔表白嘅話，今個星期可能就冇機會……
「陳太？帶埋個仔嚟食飯啊？」突然有把男人聲叫過嚟，叫醒咗沉思緊嘅我。
「啊李？咦，李太都係度啊？」鄰居李生同佢頂住個大肚嘅老婆過咗嚟食飯。
「李叔叔？頭先你太太個肚唔係……」我都未問完，啊媽就係檯下踢咗我一腳。
「係啊，食晏啊。唔阻你哋，我哋食完架啦，上翻去先。」啊媽講完，係銀包拎咗張五十蚊紙出嚟，之後扯咗我走。
又會咁奇怪嘅，啊爸頭先又話李太肚痛，但啊李依家仲係度。
「小朋友咪咁多事啦，你爸多應酬，廢事我問長問短，先至唔講姐。」我媽拉住我講，我哦咗聲，就跟住佢身後走。