90後的初戀——五十年後嘅我，叫我向佢表白。: 【五】
唔知係咪松記冷氣唔夠勁，定係店舖太多人，一入去冇耐我就已經出曬汗。
「畀你用嘅。」我揚緊件T Shirt個陣，黃子霖就遞咗條藍色間條紋嘅手巾仔畀我抹汗。
呢個年代居然仲有人會帶手巾仔出街，我有點驚訝咁接過，但唔捨得用。
「唔駛介意喎，你用完之後洗翻乾淨畀我咪得囉。」佢發現我唔好意思用，就輕力推我隻手，等我唔好畀翻佢。「叫嘢食囉！不如一齊點『森麻』？」
「吓？咩嚟架？」
「Summer喎！你居然未食過？」佢瞪大對眼望住我，之後佢就叫咗兩份甜品。
其實份甜品好唔好食，我已經唔記得了，因為成餐飯，我都係只注意到眼前嘅黃子霖。
睇戲之後，我同黃子霖每晚keep住MSN，關係開始變得有啲曖昧，但大家都冇講更進一步嘅嘢。目前睇嚟，我冇係限期前表白，都唔係有好大影響姐？所以我決定等我哋關係再熟啲，瞭解深啲先再向佢表白。
「八婆！望咩呀望？」第二日小息嘅時候，身為園藝學會會員嘅我，落咗去操場附近嘅花叢淋水施肥，聽到大樓後樓梯傳嚟女人鬧交嘅聲音。
「學……學校……唔可以食煙……」另一把女仔把聲有啲膽怯咁支支吾吾講道。
「收皮啦，羅Pussy！知你係女班長好威啦，扮曬好學生，真係睇見都嘔心。」我慢慢行埋去，見到一班MK妹圍住羅佩思鬧。
「唔教訓下佢都唔得，咁寸啊拿？」班女MK一下推咗羅佩思落地，然後仲想一腳踢埋去。
「喂！你哋做咩啊？」我立即衝過去。
「玩大咗，有人，快啲走啦！」其他女MK見到我行埋去，即刻拉走成班朋友。
「妳點啊？冇受傷啊嘛？好彩佢哋冇帶刀仔係身咋，呢個年頭啲MK妹，好狼死架，妳咪由得佢哋食煙囉，食死自己係佢哋嘅事啦。」
我慢慢扶起羅佩思，佢果然好瘦，對手仲好凍，成個人好似林黛玉一樣，弱不禁風。
「唔該曬你，我冇咩事。」羅佩思冷冰冰咁講，睇嚟佢份人同佢膚色一樣，都係一個冰山美人。
我望真啲先見到佢隻手臂跌落地個陣擦傷，流緊血。情急之下，我拎咗尋晚洗乾淨嘅手巾仔出嚟畀佢止血。之後我為免班MK妹又想報復，就扶住送羅佩思翻課室。
「送到呢度得啦，我廢事課室入面啲同學見到會亂講啦，畢竟你有黃子……啊，冇事。」羅佩思有啲尷尬咁講。
「吓？我同黃子霖唔係個種關係喎，不過妳唔想嘅話，我都唔勉強妳。咁妳自己小心啲啦。」
「我……」突然間，羅佩思拉住我衣袖，「我份人係咪好煩好多事，所以大家都唔鍾意我，就快畢業都識唔到朋友……」佢有啲感慨咁講。
「邊係呢！妳只係盡責咋嘛，唔好咁諗自己！」我拍一拍佢膊頭講道，據我觀察，羅佩思應該都係啲比較文靜嘅人，講嘢好真誠，擔屎唔偷食，唔太識睇人眉頭眼額，難怪老師會揀佢做班長。
「多謝你……你係第一個會咁樣講嘅同學。」佢有些少眼泛淚光咁同我講。羅佩思向我點頭表示謝意，然後就轉身離開。
望住佢高高瘦瘦﹑弱不禁風嘅身軀，簡直係同陽光可愛嘅黃子霖有著強烈對比。
我翻到自己課室嘅時候，先醒起自己好耐都冇睇過本筆記。當我再打開嘅時候，先發現多咗一行字。
「請不要獨自去花叢淋花，多找一個朋友和你去。」
嗯？即係話頭先我做錯咗？但諗落都只係救咗羅佩思姐，應該冇咩大問題掛。
點知第二日翻到學校嘅時候，全班男仔都望住我。
「啊俊，咩事大家都望我？」我拉埋啊俊去一二邊。
「估唔到原來你鍾意嗰Type喎，我仲以為你追緊黃子霖添。」啊俊苦笑住講。
「唔明，發生咩事？」
「尋日MSN group個個都share緊啦，你唔知咩？你同文科班女班長拖曬手臂咁上樓梯。」
「吓？羅佩思？誤會啊！」我大叫咗出聲，而其他人都望住我偷笑。
「陳世杰，原來你癖好係鍾意畀女班長篤住個頭嚟鬧！」班入面比較曳嘅男同學笑住講。
「快啲懲罰我啦～女班長～」另一個男仔用好淫蕩嘅語氣講。
呢個時候，我先諗到，件事可能已經傳到入黃子霖耳中，於是跑出去搵佢。
點知我跑到去佢課室門口，只見黃子霖拎張紙巾喊到七彩，而曹大志摸住佢個頭，就好似摸狗仔咁摸佢個頭，叫佢唔好喊。
「你仲有面過嚟嘅？對人冇意思，就唔好玩人感情啦！」曹大志見到我行過去，就衝嚟一下揪住我件衫。
「喂！唔好啊！」黃子霖衝過嚟，矮小嘅身軀試圖拉住高大嘅曹大志隻手臂。
「咁你敢唔敢向黃子霖講，你唔鍾意羅佩思？」曹大志鬆手，後退兩步之後問。
正當我想講我唔鍾意女班長嘅時候，羅佩思剛好路過，佢拎住條手巾仔，似乎想還翻畀我，行近兩步嘅時候，先發現周遭氣氛唔對路，之後就眼定定咁望住我。如果呢個時候我講落去，又可能好傷佢心，以為連我都嫌棄佢。
就係遲疑嘅呢一瞬間，黃子霖誤會咗我意思。佢好失望咁轉身，見到拎住佢條手巾仔嘅羅佩思。而羅佩思唔知道條手巾嘅真正主人，仲呆呆咁同黃子霖對視。
「你又話，唔會對其他女仔都咁溫柔嘅……你呃我！」黃子霖好低聲咁講咗呢句，就流住眼淚衝翻入課室，而曹大志亦放開咗我，追咗上去。
我呆望住佢哋嘅背影，曹大志一邊追，一邊回頭望住我笑，右手做咗下按快門嘅手勢。結果即使有筆記嘅提醒，我仍然係錯過咗黃子霖。
「做咩個人佝佝瞀瞀咁啊？食菜啦。」啊媽夜晚見我成個人失魂魚咁，就喝住我。
「係喎，未食菜。」我強顏歡笑咁樣食飯，而啊媽就望住同事三分親係度笑。「咦，啊爸呢？今日又唔翻屋企食飯啊？」
「係啊，佢公司忙啊嘛。」啊媽講完，又繼續望住王祖藍係度笑。其實我成個腦都係黃子霖，啊媽講啲咩，啊爸翻唔翻嚟食飯，我都唔在意。
我同黃子霖，由個日起就冇再係MSN同SMS上聯絡過。每一晚，我就望住佢上線下線，到底佢搵緊咩人呢？係咪同緊曹大志傾謁呢？個日之後，我本筆記簿就冇再更新過，而我就專心應付會考。