90後的初戀——五十年後嘅我，叫我向佢表白。: 【七】

「恭喜妳入到英文系喎。」Reg Day個日，我同羅佩思一齊翻咗學校，睇下有咩Soc入，又睇下冇咩Hall啱。
 
「你會唔會住Hall啊？」羅佩思語氣依然冷冰冰咁問。雖然佢講嘢個陣仍然係維持Poker Face表情，但我知道，其實佢只係不擅長表達自己，心入面係個好女仔嚟。
 
「唔會啦，我過海好快姐，你呢？」
 
「你唔住嘅話，我都唔住啦。」羅佩思細細聲咁講，然後扮曬望其他攤位咁行開去。
 

「靚女，入唔入我哋Hall啊？」身後有啲大學生係度積極派傳單招人，由於人來人往，我唯有企埋一邊等羅佩思翻嚟。




 
「靚咩女啊？你想撩我條女啊？照鏡啦！」
 
嗯？把聲咁熟嘅？我轉身望過去，果然係曹大志同黃子霖。於是我襯住佢哋冇留意，就稍微地轉身，用收到嘅小冊子遮住塊面，唔想被佢哋見到我。
 
「大志啊！今日講好咗，要開開心心咁同我慶祝Reg Day架嘛，做咩事鬧人姐。」
 
「挑，大學生好把閉啊？就可以周圍撩人條女啊？讀屎片架你哋？」曹大
 
無讀過書嘅MK仔就真係MK仔，入到嚟大學，真係相當失禮。




 
「原來傻嘅……」一班Year2嘅學生廢事理曹大志，就行開咗。
 
「大志！你唔好咁樣話人啦，好失禮啊……」黃子霖拉住曹大志講。
 
「妳咁講，都係嫌我影衰你咋嘛！咁就咪叫我嚟啦！」曹大志一手用力甩開黃子霖。
 
「我唔係咁嘅意思啊……喂！」曹大志嬲爆爆咁走，而黃子霖就追上去，一邊仲回頭對住班Year2嘅學生點頭講唔好意思。
 
 




「世杰？做咩呆咗企係度？我哋行埋個邊睇囉。」羅佩思拉住我，行去第二個攤位睇。
 
我望住羅佩思拉住我嘅手，愈來愈唔清楚，到底我哋係咩關係。佩思對我好好，我亦唔想傷害佢，而黃子霖已經有男朋友，或者，我可以考慮一下佩思呢？正當我思考緊呢個問題嘅時候，行到半路，佩思突然向後暈一暈，我立即扶住佢坐埋一邊。
 
「妳又貧血啦？冇食夠早餐？」
 
「今朝趕住見你啊嘛……」佩思有啲唔好意思咁低頭講。
 
「傻瓜，我有朱古力，妳食住先啦。」
 
「我真係好冇用啊……」佢楚楚可憐咁咬住舊朱古力講。
 
「邊係呢，妳份人就係咁，成日都咁自卑，由中學開始就已經係咁。對自己多啲自信啊，妳諗下，妳以前做足七年班長，依家入埋港大，妳好叻女架。」
 
我哋望住人來人往嘅港大，果然，入大學後，先發現，原來世界好大，有好多比我哋更活潑、更英俊嘅人存在。




 
「如果妳想住hall嘅，我陪妳住啦。不過講明，我只住啲好摺好毒嘅hall，唔Social架！」如果因為我，而令佩思唔敢走出安舒區，只會令佢更加自卑。
 
「真嘅？」冰山居住都會識得瞪大對眼，好興奮咁望住我。
 
「係啊，怕咗妳一陣又唔食飯就去上堂，見暈啊。」
 
「多謝你……」佢好高興咁咬住條朱古力講。
 
如果我心入面嘅人，係羅佩思，咁你話幾好呢。