《咁我俾你揸，你揸唔揸？》: 6. 牛眼事件 2
到咗圖書館之後
圖書館長兼凱倫嘅導師林sir聯同miss Lam喺小息一齊去到圖書館，而男科長就同2位老師解釋晒成件事，加上後來及至嘅miss Ling嘅後語，老師們同男科長都建議凱倫去急症室求診，但凱倫拒絕：「我唔去，廢鬼事我啊媽又喊多次。」，「但係你唔去，又點會快D好返喎，乖啦，去急症室啦」映童一路氹住凱倫，「就算你唔去，我哋都會通知你媽咪，所以去急症室啦！」林sir不斷遊說凱倫。凱倫為免佢哋一輪咀係咁哦，就應承咗去急症室。
「林sir，我可唔可以跟埋去啊？件事我都有小小責任。」映童不斷求助林sir，而林sir最終亦比佢跟住去急症室，之後一行人坐上的士前往急症室。
「學生哥，你食錯嘢定食物中毒啊？」的士佬問，「唔係囉，佢比同學窩咗一拳落去囉。」，「咁大檸樂？咁我揸快D啦！」，「司機大哥，揸慢D都OK㗎，最重要空全啊」凱倫怕死地講。
到咗急症室
隨即將凱倫送入x ray房同照超星波，睇吓有冇傷及肋骨或內臟。
另一方面
「李社安，由於你今次所造成嘅暴力事件，令到同學受傷入院，本校依加決定將你即時停學而作懲戒，直至另行通知，你依加返班房執好所有你嘅物品，包括書包、課本等，然後落返嚟會議室。另外，我已經叫咗你班主任司徒sir通知你屋企人嚟接你。」總訓導主任楚sir嚴厲訓斥李社安，當然李社安呢條死肥仔唔會承認自己有錯啦，畢竟活喺自我中心嘅人，就彷彿某國抖M人民般，生活喺牆內，任由獨裁者鞭打都唔會叫痛，而會話呢D係恩賜。
17分鐘後
「李太，對唔住，麻煩你趕過嚟。令郎社安平時對同學蝦蝦霸霸都算啦，每逢阿sir miss投訴極，我都幫佢冚住，因為我覺得仍有教化可能，就好比今次受害嘅同學，佢即使逃過學，我哋仍然覺得可以將佢拉返入正軌，經過我哋不斷嘅安撫同遊說佢，佢亦同意以留級方式去繼續努力。但社安卻不斷以「重讀」而羞辱該位同學不突止，仲要喺課堂上搶奪同學做緊實驗嘅解剖刀，更加一度將刀捅向該位同學。萬幸嘅係，該位同學本身私下有練習開自衛術，先至可抵擋社安嘅攻擊，以及將佢制止，比著其他同學，可能已經留喺深切治療部。當該同學制止完，亦曾好聲好氣叫社安冷靜，但社安仍然以拳頭擊向該同嘅肚部位置，依加亦喺急症室求診當中。不過你放心，我哋仲未報警，我覺得仲可以比機會社安喺停學嘅呢段時間好好反省一下自己，同寫好悔過書，當然該同學仍然保留控告嘅權利，如果真係控告社安嘅話，社安嘅前途就變得相當唔明朗，最後希望社安可以由衷咁向該同學道歉同保證唔會再發生類似事件，我希望咁嘅做法可以令該同學比多次機會社安重新做人。但依加麻煩一吓李太喺停學通知書上簽名同萬社安返屋企先，我哋會睇睇該同學嘅意願如何至再通知社安返學。」楚sir軟硬兼施地向李社安同李媽媽講解同建議。
「叮叮叮叮叮叮」
「好啦，收爹啦，坐返自己個位！」，「李sir，凱倫佢依加點啊？」達龍擔心地問李sir，其他同學亦一輪咀咁問有關牛眼事件嘅結果，彷彿食住戲睇花生般。「據林sir嘅消息話，莊凱倫冇乜大礙，幸好仲有半肥瘦嘅腹肌抵擋住嗰拳，只不過造成肌肉組織受傷，要食一排止痛藥同消炎藥。而且佢有隔離B班嘅羅映童幫手鎊住，佢又點會有事呢。」，「有個同區倩怡相似嘅靚女相伴，難怪冇事啦！」呂嘉希說畢就惹來各同學嘅哄堂大笑，但只有一個人冇笑到，或者根本係笑唔出，因為擔心緊佢嘅凱倫哥哥。
急症室
「莊凱倫，請入3號房見醫生。莊凱倫，請入3號房見醫生。」林sir同映童扶住凱倫入房見醫生。
「莊凱倫，喺我講Report之前，希望你可以先行驗一驗傷，畢竟呢D係校園欺凌，唔能夠容忍㗎，我諗你呢位啊sir都認同你有驗傷需要。」醫生由衷地建議凱倫 ，「我唔會告任何人，亦無需驗傷，件事我都有錯，如果我當刻識婉轉D同佢理論，或者唔會搞成咁。不過都算好彩，係我瀨嘢，而唔係傷及無辜，亦好彩我身邊呢位同學兼組員冇受到傷，如果唔係，我仲內疚。」凱倫一邊講解，一邊指住企喺身後面嘅映童。「咁好啦，既然你決定咗，咁我哋就講返Report啦，由於冇傷及肋骨同內臟，只有腹部嘅肌肉受傷，我會開半年嘅止痛同消炎藥比你。」，「半年？」凱倫同映童異口同聲地問，「冇叫你食足半年，你食一個月睇吓點先，其餘淨返做後備。另外，我建議你休息返2個星期先返學」，「唔使啦，我聽日照返學㗎啦，正如你所講，我又唔係咩重傷，何況休息咁耐，一定追唔上D課堂。」，「咁我都照出張醫生紙比你，你有需要就請假啦。」，「不如你開張僅限今個月用嘅醫生紙過我，我有需要就寫返日子上去，反正啊sir喺度，可以幫我作證我唔係濫用醫生紙。」
當出咗醫生房後，一行人就見到莊媽媽，莊媽媽即刻擁抱住凱倫，一邊流淚一邊問佢有冇事，當然，凱倫為咗唔比佢媽咪繼續流淚同所謂嘅過份關心而講冇事啦。之後林sir同映童解釋比莊媽媽知發生咗咩事，一輪安撫過後，莊媽媽幫凱倫去攞藥，同搭車返屋企。
喺去搭小巴之際，被林sir截停：「你哋不如直接搭的士啦，快D返去食藥休息，唔使係咁轉車同等車」，講完之際就截咗㗎的士比凱倫同莊媽媽上車，然後攞咗張$500比的士佬。
之後林sir同映童亦搭的士返學校。