女兵?定係朋友?: 第七章

（Sorry可能同前嗰幾章唔係太夾，不過請容許我呢一篇用全口語寫）
（阿泳視覺）
好好彩咁，經過呢件事之後，我同阿安嘅關係都冇任何變化同影響。不過佢都係每日叫我send功課...而家佢除咗偖功課之外，已經演變到其他嘢咩都唔會再同我講，好似我喺佢心目中嘅存在，只係一個借佢抄功課嘅機器， 又或者係一隻卑微嘅兵......
「我一早問咗鄭凱琪喇，唔使你啦」whatsapp傳黎一段訊息，係阿安send過嚟嘅...係喎，我啱啱影完功課畀佢喎......唔得，今次我一定要問清楚佢一件事。
「我想問清楚你一件事，點解你當初要問我借功課抄呀？明明有咁多個同學可以問，我D功課基本上係全錯...點解偏偏一開始要問我呀？」
好快，佢就讀取咗條信息，而且「輸入中...」
「因為淨係得你會咁乖我一問就send囉！順帶講埋一件事呀，其實每一次我問完你功課之後，我都冇一次會抄嘅」
咁乖...你當我係狗呀？仲有，你每一次都唔會抄，咁你問我影嚟做乜*呀？
突然覺得自己好似俾人fing*咗咁，心入面好無言同惱怒。
呢個時候，佢嘅狀態入面仲顯示輸入中...




「仲有呢，你啲功課真係做得好差呀...每次都要我搵番D錯處講返畀你聽嘅...我仲幫你對埋答案添呀，多謝我啦！」
係...我係認自己成績唔好，功課又做得差，咁你咪唔好問我囉？幫我對埋答案？你咁好人呀？哇真係多謝曬你呀！
「多謝曬你喎，咁以後係咪唔使我影功課畀你呀？」
「Ok，不過你要隨傳隨到，唔好洗完板都唔應我呀」
最後上線於今天18：43...
呢個時候，我腦中突然浮現出一個諗法
究竟我對於佢嚟講只係一個抄功課嘅機器呀，一隻女兵呀，定係一個朋友呢...？
隨傳隨到，完全服從主人嘅命令，講乜就做到乜？
咁...兵或者機械人係唔應該對主人有任何感情嘅。
「...唉，我喺度諗緊啲乜嘢呀，黐黐哋線嘅。」我大力咁搞咗一下自己個頭，想將嗰啲亂七八糟嘅思緒全部拋開，但睇嚟係完全冇用。




就係因為一個咁嘅男仔，我完全迷失咗自己......
第二日朝早，我返到學校嗰陣時又望向左邊個位，佢又去咗儲物櫃度攞嘢...明明位之間嘅距離係咁近，但係要得到佢嘅心係幾咁嘅困難同遙遠，甚至可以講係非分之想......
而家可以藉住功課呢樣嘢繼續同佢聯繫住，已經算好好啦...係咪...？我都唔確定......
但好似而家咁淨係要功課嗰陣時先嚟搵我，有陣時又會對我特別親密同親切...好似畀緊甜頭我咁繼續俾功課佢抄，其實...我係咪已經不知不覺間咁做咗人哋隻兵？
好亂...個腦好亂好亂...唔想再諗咁多嘢......我另反去前面望住黑板。呢個時候，佢走過嚟拍咗一下我個膊頭：.
「做咩呀？今朝好似混混噩噩咁嘅？」用住微微挑逗嘅語氣好似講緊笑咁同我講嘢，佢面上面嘅笑容，肯定同佢對住佢鍾意個女仔唔同......

就好似...嘲笑緊我一樣。

突然之間，佔有慾同妒忌係一瞬間瘋長起黎，好想唔理任何嘢一下子霸道咁抱住佢...只要一下...一下就好...要承擔任何後果都冇所謂...腦入面全部都係幻想緊佢身體嘅質感同餘溫......




「喂...喂！阿泳！」
呢個時候，我嘅理智全部返返曬嚟，先發現原來啱啱自己個樣同諗法係幾咁痴根同不顧後果。
唉，掛仔掛到癡咗線呀，
我，真係變咗好多。
「...咩...咩事呀？」
「冇...我唔記得抄歷史啲筆記呀，諗住問你借黎抄姐。」
「哦...我一陣間攞畀你呀...亅
我扮係櫃桶入面搵筆記，查實係偷偷地咁望住佢返埋位坐，只求可以望多佢幾眼......而家嘅我已經演變到如果有一刻唔望住佢就會死咁。
正當我仲喺度偷偷咁窺望佢嗰陣時，突然間有個身軀走到嚟我前面停低咗，阻住左我既視線。「 咩事呀你又......」本身仲以為係鄧梓喬，點知一岳高頭就發現劉煒賢企喺自己前面。
「你做咩呀？坐返埋位啦。」
「我有嘢要問下你同同你講。」呢個時候係班務時間，佢襯住課室一片混亂，一野咁拉住我隻手臂拖咗我出課室......