抑鬱陰霾下的戀愛: 脫節

「唰」我運球疾步前行，鳳凰哥張開雙手緊追不放，誓要守住這一球，但我還是一個急停跳射擺脫鳳凰哥，把球射進來結束這場比賽。

「嗄...嗄...Roy哥仔冇見一排好波咗喎。」鳳凰哥喘著氣說。「幾時入校隊虐殺其他學校先。」

「痴線啦，我唔會入到校隊啦。你哋暑假去咗美國冇打先退步咗少少啫。」平常作為那樂團一份子的我們都會相約在周末打球，而這次就是自暑假後的第一次。

「咁你冇去到美國就真係可惜喇。你錯過太多嘢啦，哈哈。」波友L說道。說起這個波友L，今天還是第一次會面，想必是在美國混熟的吧。

「準備定中四嘛，過兩年要考會考啦。」我嘗試著解釋道，以掩飾自己的可惜。「波友A都無去啦。」



「大佬呀，我大你一年，就真係要準備會考。」波友A反駁道，然後就跟其餘的波友到小賣部買飲料，只剩下我和鳳凰哥留在球場休息。

「Roy哥仔，開咗學都就快一個月，有冇識到咩新朋友呀。」

「都係咁上下啦，有幾個比較熟啲，隔離位嗰個好似幾啱傾，都幾多共同興趣架，哈哈。」

「有冇我咁好先。」鳳凰哥望著我奸笑道，我也報以一個鄙視的眼神。

「好心你男人老狗就唔好成個港女咁呷醋啦。溝女溝得多自己都變埋港女呀？」



「仲好講，啱啱先同條女鬧交，應該都散架啦。」

我只好無奈苦笑。鳳凰哥做什麼事都是來去如風的，來得快，完得更快。這個女朋友只追了3日，關係只維持了2個月。

「唔好講我啦，你幾時都搵個女朋友呀，咁多年都一個人你唔悶架咩。你之前同我講過補習社識嗰個Candy點呀而家？」

「都唔算識嘅，連嘢都冇講過一句。不過我諗我而家都未準備好拍拖。遲啲先算啦。」

「有啲嘢無咗就會後悔架啦，做男人就俾啲勇氣識女仔啦。」



「隨緣啦，我對而家都好滿意，有鳳凰哥你，仲有樂團其他朋友，呢啲真係唔急。」

「係呢，去完美國我哋個朋友群又壯大咗啦哈哈。睇下入面你有無啱囉。」

我笑了一笑，對這班新朋友既期待又感到害怕。一方面很想去結識更多的朋友，另一方面又很怕他們不會接納我。事實是，我想太多了。

很快，又到了要到樂團排練的日子。甫入到排練室，肥蓮就撲過來抱緊我。說起肥蓮，她並不太肥，只是胸部比一般香港女孩子都大，就被人說笑。她對任何人都非常熱情，而這一撲亦令我感受到某部位被擠壓的尷尬。

「好耐冇見啦Roy！！」肥蓮興奮地說著。

「嘩！蓮姐，美國已經周圍攬我哋，一番嚟又攬實Roy。」波友L走過來調侃肥蓮。

「你唔好咁多野講，唔好唔記得你上次喺美國麥當勞做過啲咩。」肥蓮語帶諷刺地還擊。

眾人都笑了，只有我呆了一會，不知何事的我微微陪笑了一下以掩飾心裡的失落，幸好的是縱使跟他們有些微脫節，他們還是沒忘記我。這時候，我望到肥蓮身後躲著一個嬌滴滴的女孩，也是微微的笑著，架著一副眼鏡的她增添了一份可愛的天然呆。她談不上漂亮，但卻很令我心動。正當我想走過去跟她說聲好，指揮也來到了，我只好回到自己的座位好好準備。



排練完後，我們一夥都照常一起乘搭火車歸家，當中包括我、鳳凰哥、肥蓮、張兄、張妹、還有那女孩。沿路他們都在憶述於美國發生的趣事，只有我一個在發呆。『原來佢都係搭火車嘅，咁我都應該有唔少機會同佢相處。』我心中暗暗竊喜，畢竟她可能就是我喜歡的類型。正當我還在想著何時能跟她打開對話的匣子，機會在轉瞬間就到了。

就在之後的某一次排練，鳳凰哥、肥蓮、張氏兩兄妹都分別因要事而缺席了，這就意味著這次只有那女孩跟我單獨回家。正準備跟另一夥不乘搭火車的朋友們道別時，那女孩好像被他們戲耍了。那女孩尷尬的走過來，輕輕跟我說：「可以行喇。」

「頭先發生咩事，你好似俾人蝦咁嘅。」我疑惑地問。

「無咩，玩下啫。」她面微微一紅，低著頭答道。

接著，就是一陣沉默。一路走到火車站，我才按捺不住跟她談天。

「係呢，都算識咗一段時間，你知道我叫Roy啫，我好似仲未知你叫咩名，哈哈。」我尷尬的問著。

「你叫我思詩就可以。」



「思詩...個名幾好聽吖，幾襯你，不過都好少聽到你個名嘅。你平時太靜喇，如果唔係鳳凰哥同肥蓮喺美國同你熟咗，我都無機會識你。」

「咁我唔似阿Roy你音樂咁叻，無人識我都正常嘅。」說完，思詩又尷尬得低下頭來。

「唔好講呢啲啦。不過話時話我冇去到美國真係好似好多嘢都唔知，成個人脫晒節咁。」

「哈哈，係呀，喺美國真係發生咗好多事。如果你都有去，一定會再好玩啲。」

「下次先啦，你有機會再同我講番美國發生咩事啦。我差唔多要落車啦。」

「嗯，好啦掰掰。」

我有點可惜的走出車廂，當我回頭時好像還看到思詩跟我揮手。也許，我真的有點喜歡上她。『弊，竟然唔記得問佢攞電話。』我驚覺，眼看火車都駛遠，我唯有苦笑著回家。

思詩－我第一個真正喜歡上的女孩，而她也成為了我人生中舉足輕重的一個。