抑鬱陰霾下的戀愛: 妙計
中學時期談戀愛總是令每位中學生既期待又興奮的。不少人都在中學時期奉獻了自己的第一次談戀愛，有人能一直走到永遠，但絕大部分的都會分開。但姑勿論死亡率有多高，還是有不少人投進了這個大坑，期望能得到甜蜜又羞澀的戀愛，為枯燥的學習生涯增添一些色彩。當然，我也不例外。
自那天第一次動了喜歡人的感覺，整個人都心不在焉，不停地想著思詩。平日還可以找鳳凰哥談談，但在學校就不能了，畢竟跟鳳凰哥並不是同校；順帶一提，鳳凰哥也是今年要會考的，很快也沒太多時間應酬我。幸好，在學校還有我的鄰座，他是石進。
「喂，Roy，做咩好似有嘢諗緊咁。」石進一邊望著物理老師在黑板授課，一邊問我。
「唉...你咁都知。你信唔信我諗緊女。」聽到他一問，我就無力地伏在桌面上答道。
「你咁講實信嘅，不過之前都無聽你講過嘅。」
「係呀，好似啱啱鐘意咗個女仔。佢叫思詩，我覺得佢好可愛，好似幾啱傾，可能咁就鍾意咗佢。」
「咁搞笑，你識咗佢幾耐。」
「幾個禮拜咋，可能真係一見鍾情。」
「哈哈，乜你信呢啲嘢架？」石進諷刺地笑著。
「呃...」
「石進、Roy，STAND」物理老師的命令把我們喚回到課堂上。
「都怪你，笑得咁大聲...小息再講啦。」我無奈的說著，石進忍著笑比了一個OK手勢。以前的我可能真的不太相信一見鍾情，到現在我都不太願意去相信，我情願說服自己思詩的確是適合我的女孩子。對，要確定跟她並不是話不投機，首先要得到她的電話號碼，好好的跟她拉近關係。畢竟自己一直都只是一個毒男，實在沒太大信心去貿然問一個女孩拿號碼，要拿就一定要想一個好方法。
很快又到了下一次的排練，中五的團友們亦要開始準備會考而沒去排練了。而這次也只有我、肥蓮、思詩、還有平常並不乘搭火車的呂明一同走上前往火車站的路上。
「咦？呂明，今晚搭火車返屋企嘅？」肥蓮率先問道。
「係呀，今晚屋企約咗去沙田食飯呀。」
「啱啦，思詩住沙田，你哋可以一齊落車。」肥蓮不經意地說著，然後看了我一眼，好像是衝著我而說的。
「係喎，我哋都就嚟表演，有冇緊張呀？」我嘗試岔開話題，問在場的其餘三位團友。
「我哋就無喇，問問思詩啦，佢始終算係啱啱加入。」肥蓮又搶住答道。
「都OK嘅。雖然我啱啱入嚟，但係都去過美國表演，都唔算第一次登台啦。」
「都唔使太緊張嘅，盡自己能力就得。」我安慰著說。「係呢，通常我哋臨表演前都會約埋一齊食午餐。思詩，你會一齊啦？」
「嗯...要問問媽咪先，不過應該都得。」
「呂明，你都會去架啦。不過呢，我好似冇咗你電話。思詩，你都俾埋你電話號碼我啦。」其實我由始至終都沒有呂明電話，但為了拿到思詩電話，順道一問好像比較自然。我這一問，只見思詩的面紅得像個蘋果一樣，而肥蓮也在一旁偷笑。拿到電話的同時，我也要下車了，而肥蓮跟我說再見時仍是在偷笑著。
『登登登』MSN的訊息提示音在我吃過晚飯後隨即響起，是肥蓮。
「喂，好橋喎阿Roy，咁輕易就攞到人電話。哈哈」
「...蓮姐，你係咪知道啲咩。」
「我一開始都係估嘅啫，不過見你今晚應該都真架喇。鐘意人地咩啫，思詩好女仔嚟，你唔好諗住蝦佢，如果唔係我唔會放過你。」肥蓮打字的速度跟她說話一樣，機關槍式的連珠炮發令我完全無法接上對話。「做咩唔出聲呀。」
「你打得咁快都唔俾我講…鐘意佢都係近排嘅事啫，覺得佢幾可愛好似幾啱傾咁。同埋唔知點解吹長笛嘅女仔我覺得好吸引。」
「唓…我都吹長笛啦，又唔見你鐘意我。」
「唔好玩啦蓮姐，識咗你咁耐，都當你係好好朋友啦。一係咁啦，如果思詩拒絕咗我你再做後備啦，哈哈。」
「痴線，我先唔要做後備。係咁嘅，其實思詩間唔中都提起你，我諗你都有啲機會嘅，你有需要我幫就出聲啦。你既然攞到人電話，就不如試吓打電話去同人傾吓偈，直接啲同佢拉近關係啦。」
「你唔講我都諗住咁做架啦。放心，我會努力。」
「加油呀，其實你哋幾襯。」
我很清楚這只是打氣的說話，並不一定出自真心。但的確，這為我接下來的行動注入了一支強心針。過了一段時間，好好安穩自己的情緒後，我拿起電話，找到思詩的聯絡人名稱，撥了過去。
『嘟嘟嘟...嘟嘟嘟...嘟嘟嘟』每一下電話的響聲對我來說都是煎熬，心急如焚的我開始在想思詩是否已睡了呢？還是她根本討厭我，想避開我的來電呢?
「喂？」她接了，語氣很平靜，好像一早有預感我會跟她通電話。
「喂喂…係我呀，啊Roy呀。」相反我顯得好緊張。
「噗哧…」思詩失笑了一聲，就接著問：「我知道，咁夜搵我做咩事呀？」
這一問真的令我有點不知所措，但我故作鎮定地解釋：「冇呀，睇吓你訓未、做緊咩，想同你傾吓偈啫。」等待著思詩的答案，就像場邊的觀眾屏息注視著場中球員執行比賽最後的一個十二碼。
「未訓，仲做緊功課。」操刀的球員跣腳了，恐怕要失望而回之際，思詩接著說：「不過都可以傾嘅。」啊，球還是進了，場外的觀眾都在歡呼；而我也興奮得揮舞著拳頭，第一步總算成功了。
「喂喂？還在嗎Roy？」只顧著興奮，都忘了還在通話。
「喺度，有啲冇諗到會同你傾到偈啫哈哈。唔阻住你做功課咩。」
「都做到有啲攰，休息下先啦。」
「都夜啦，我寧願你快啲做完早啲訓會好啲。」
「哈哈，我個字典入面係無快同早架。」
「你今年好似中三喎，要選科一定再忙啲啦。」
「係呀，好多嘢做呀，成日都搞到晚晚三四點先訓。」
「你咁樣會捱壞身子架，你有咩唔識或者需要幫助，可以搵我架。我諗我都幫到你啲理科嘢同數學嘅。」
「好吖，多謝你先，嘻嘻。」
第一次的通話都維持著這個良好氣氛，就這樣談了差不多一個小時，思詩才回到她的功課上，而我則躺在床上回味。