投胎之後害死全家人: 3.小姐姐的逆襲
3歳既我已經去左上幼稚園，日覆日，月覆月咁跟住老師唱埋啲低B兒歌，學埋啲3歳細路都識既野，真係悶到我抽筋。但為免暴露我既身份，同為免俾父母發現我係「資優」，然後好似啲怪獸家長咁chur到我變人乾，我就冇係學校到表現到好優秀，我表現到同其他同學一樣。而以後既路就邊行邊諗，我唔求今生大富大貴，只求可以安穩平靜咁度過。放學返到屋企我就睇下電視，再陪下細佬玩下咁！而媽咪可能想培養我愛鍚細佬既習慣，成日都叫我讓細佬，佢咁細個都未開口叫我讓佢，媽咪就幫佢叫定先。
「咦！細佬好似想要你手上架車車喎！」
「咦！細佬好似想飲水水喎！」
「咦！細佬好似睇超人台喎！」
呢啲都只係一啲小事，我無咩所謂，我聽到都會順從媽咪既意思去做！畢竟佢係我呀媽，我得個3 ,4 歳，我並唔想因為呢啲小事而得罪佢，俾佢鬧！每次我順從咗佢既意思之後，佢都會咁讚我：「乖啦！」我聽完都會笑一笑，大概媽咪會認為我係俾佢讚覺得開心，但真係唔係！我只係覺得可笑。原來對於佢嚟講，乖既定義就係我無條件咁讓細佬。兄弟之情唔係咁樣培養出嚟架！好似我同我細妹咁，唔讓對方唔代表唔重視對方，唔讓對方唔代表唔愛對方。難怪之前會成日係facebook 見到啲育兒專家話：「兄弟姊妹之間既關係往往係由父母親手破壞。」原來就係因為有我媽咪啲咁既媽咪。係細佬都未識講野既時候，就幫定佢騎係我頭上。係唔平等既關係下，兄弟之間又如何建立至親既關係呢？
同樣既培訓做咗十，二十次，再去到一百次都冇問題。但一直到我4 歳、5歳、6歳都係咁，而且越嚟越密，越嚟越無理，我既心情都真係受到唔小影響！即使我每次都順佢意，但未必每次都可以做好表情管理，未必每次都可以笑住咁讓細佬！
到我6歳既一日，媽咪又「培訓」我，個次我真係忍得好勢利，差啲粗口都講埋出嚟！亦令我覺得我唔可以再咁落去，俾人舞嚟舞去！
話說個日，我一個人係到玩緊積木，媽咪拎咗個公仔俾我玩，其實我並唔係好大興趣，但見佢拎俾我玩，我都扮下嘢咁將個公仔放左喺啲積木上面，再繼續玩。但我玩唔夠我1分鐘，佢又走嚟同我講：「細佬好似想玩呢個公仔喎！可唔可以讓俾佢呀！」我心諗你呢個女人又玩九我，明明係你拎俾我玩，而家又話要拎返，佢試完又試，試完又試，究竟佢玩夠未呀？佢係咪真係當我係低能架！
當下我忍住左咗，將個公仔遞咗俾佢，但我真係再笑唔出，我盡量令自己唔好表現到咁不屑，只係目無表情咁。但佢似乎見到我目無表情咁又有啲不滿咁！
「你唔開心呀？」
「冇呀！」但我心諗：試下你俾人舞嚟舞去咁多次，唔嬲就假啦！
「細佬細過你，你要讓佢至得架！唔好唔開心，笑下啦！」
「嗯！」我冇笑到，只係低頭應咗一聲。（os: 真係夠啦！你條仆街知唔知自己係到講緊咩呀！咁寛容咁笑住讓野俾人，大人都未必做到，你逼我一個6歳既小朋友咁做！你逼我讓野俾細佬，又唔俾我唔開心，又要我笑，你係咪有病呀！）
媽咪又輕聲講：「知道錯未？」
「知道！」我扮有悔意咁答佢，但我感覺我腦入面啲血管就嚟爆曬咁制！（os: 錯你條命，我錯係邊呀？錯係冇笑住咁讓細佬？你咁做既目的究竟係啲咩？想培訓到我成為疼鍚細佬既家姐？sorry！真係徹底失敗，我而家仲已經有啲憎佢。如果係想將細佬培訓成一個自以為細就有人讓既仆街的話，keep going，指日可待。）
29歳既我生活係一個6歳既身體入面，無力反抗，但再咁樣俾呀媽咁迫法，我真係感覺自己就癲！我決定要做啲嘢去停止媽咪既壓迫。之後個幾日放學媽咪接我返到屋企，佢檢查我既書包，都發覺我有啲文具唔見咗。
未等佢問我，我就問佢：「媽咪！我好餓，有冇咩嘢可以食？」
「唔係帶咗好多點心返學校食咩？」
「我呢幾日都冇食到點心！」
「吓！點解呀？」
「因為有個年紀細過我既同學仔話想食，所以我呢幾日都俾曬我自己啲點心俾佢食。」我見到媽咪聽完之後面有難色，我就知道自己已經成功咗一半！
「咁你啲文具呢？呢排成日都唔見啲文具既？」
「唔係唔見呀！係有啲年紀比我細既同學話想要，所以我讓咗俾佢。媽咪！我係咪好乖呀？讓細過我既人！」
「em…...女呀！唔係咁讓法呀！」
「點解呀？大讓細，你教我既！」
「係可以讓，但唔係冇條件咁讓，你俾曬啲點心俾人，咁你自己咪冇得食囉！你俾啲文具俾人，咁你自己咪冇得用囉！你咪會唔開心囉，係咪？」
之後我扮曬疑惑咁問：「但係你叫我要冇條件咁讓細佬個既！就算唔開心都好，自己冇得玩都好！」
媽咪聽完之後O曬咀咁望住我，我就知道我得咗啦！成功問到佢口啞啞，大概佢都好驚訝我年紀輕輕竟竟駁佢駁得咁有邏輯。雖然我眼前呢個媽咪31歳，比我大2年，但想同我鬥有邏輯，都係太年輕啦！而且佢根本就成個人都冇邏輯。佢而家係咪終於明白佢之前同我講既嘢係幾咁無理，幾咁無邏輯可言。而家既我真係好想笑，好想為咗我既勝利哈哈大笑眼前呢個人，但我唔可以，我要忍住，我要扮曬疑惑咁「虛心受教」至得！
之後，之後，佢竟然講到冇嘢好講，唔再理邏輯呢件事，同我講：「總之你咩都唔使理！你只需要讓你細佬得啦！因為佢係你細佬，其他人唔係！」佢當我傻都唔係第一日既事，又係到敷衍我。
忍住！忍住！我一定要忍住！係佢眼中，我只係一個6歳既細路女，當我傻都好正常啫！但我又點會咁易放棄，之後發生既事可想而知！過咗幾日，班主任係佢接我放學既時候同佢傾我既情況，話我同同學相處既時候，對同學寸步不讓，攪到同同學關係非常差！
終於，佢冇再培訓我讓細佬。見住佢好想培訓我但又無從入手個樣，我心入面真係好爽呀！
哇哈哈！
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/