呀妹點解要留返我部手機呢?我同佢之間既信息記錄,佢部手機都有啦!佢咁樣做究竟意義何在,我唔明!唔通佢之前既所謂彈俾我聽,就係將段錄音send去我部手機到?為咗證明我既想法,我決定用我既方法去hack返自己部手機,去睇部機收到啲咩訊息。我前世既一個做電腦軟件既朋友曾經教過我點樣hack 人部手機,話佢就係咁樣check 住自己女友。當時既我不以為然,亦冇用過,因為我都冇需要用到。我憑自己既記憶,又上網查下,好快就知道要點做,而且做好準備。
而家萬事俱備,只欠東風。只需要呀妹用「我部手機」禁開我send去既個條link,我部手機就可以同「我部手機」連接,我可以睇到所有「我部手機」收到既信息,仲可以以「我部手機」既名義發送信息出去。但點樣先可以令呀妹無緣無故咁禁開一個陌生人send出嚟既link 呢!
我諗返起以前既一件往事,決定用個個方法搏一搏。呀妹以前曾經好沉迷一個手機遊戲,個個遊戲要靠贏分數先可以繼續玩,或者係群組入面share都可以攞小小分,但佢就成日輸到冇曬分。因為想繼續玩呢個遊戲,佢竟然醒到突登開個3人群組,入面有我,佢同埋媽咪。然後佢就不停咁係入面share 個遊戲去攞分。真係傻到我而家諗起都想笑。我用手機search 咗下個game,估唔到隔咗咁多年,個個game 仲有更新,依然有人玩。於是我借同學部手機向「我部手機」發出遊戲邀請。個日,我成日都係到留意住自己部手機,好想呀妹佢「中計」。終於,佢中計啦!我收到第一個「我手機」收到既訊息係呀妹send 俾「我手機」既表情符號。
又係表情符號。
又係表情符號。
冇錯,以前我做嘢忙,成日都懶得覆呀妹send 俾我既訊息,我都知道佢send 嘢俾我都只係想知道我仲「尚在」。於是我地彼此之間都有默契,我會求其send 啲表情符號向佢表達我仲「尚在」。因此佢間中都會send 啲冇意義既表情符號嚟!我地就咁樣無意義咁用表情符號去交流。我估唔到,直到我死咗咁多年,呀妹仲保留住呢個習慣。見到佢send 落「我手機」既訊息,我個心就有一絲既心疼。呀妹佢係咪好寂寞呢?如果我當初知道自己咁早就會不在人世,我就唔會每次呀妹搵我,我都敷衍了事,我會好好地咁覆佢。我好想透過呢個手機去覆返佢,但我知道我唔可以,我唔可以咁樣去影響佢,依家既我咩都俾唔到佢。之後,佢都間中都會發啲文字訊息分享下佢既生活瑣碎事,好似以前咁,但永遠都唔會得到回應。依家,我希望藉睇佢既信息會更了解佢,更明白佢!

----------
小鏡:「點解人類總去記掛個啲錯過咗既人同事,明明做咩都係於是無補。」
~「正如你所講,人類就係愚蠢至極既生物。」




----------
係之後一次既補習入面,我係呀妹面前做練習,但我feel 到張枱搖搖下,我望落枱下面想睇下張枱攪咩!呀妹見到我望,就同我講:「唔好意思!張枱爛爛地,用住先!」
「唔緊要!」我禮貌性回應。
但我亦都醒起呢張枱已經整過一次,好好好好多年前我地「父母」鬧交反枱,反到張枱個腳位裂開咗!張枱搖下搖下,後尾有個親戚幫我地整返先冇事。
我嘆左一口氣,心諗唔知佢地係咪又反枱呢?不過張枱用左咁多年,勞損都好正常啫!都要換張新架啦!呀妹見我嘆氣,好似覺得唔係幾好意思咁,又提返起之前我借鋼琴俾佢彈,佢話要請我食飯個件事。
「咦!係喎!詩賢,我之前話要請你食飯多謝你借個鋼琴俾我彈,到而家都未食餐飯。你想幾時呀?」
「我都得,你想呢?」
「咁下下禮拜六啦!個日補完習既夜晚,好冇?」
「好呀!」
「咁你記得同你父母講聲,你想食咩呀?」




「嗯!發記啦!」(以前屋企唔煮,我同呀妹成日一齊落呢到食。)
「好。」呀妹有啲奇怪咁答。大概覺得請你食飯竟然只係要求去普通既大排檔。
到咗個日,媽咪知到呀妹要請我食飯,係要買啲生果跟埋我上呀妹屋企到多謝佢。係我地一齊等笠既時候,我聽到幾個一齊等笠既姨姨傾計,我認得佢地係呀妹個層既住戶。
A:「你地聽唔聽到早個幾晚09室又係到噪呀?」
佢地應該講緊呀妹個單位啦。
B:「聽到呀!聽到呀!唔知咩事呢?」
C:「佢個家人成日都係咁!你荒唔係佢個女唔生性咩!激到佢父母咁。」
(入笠)
A:「未必既!聽人講佢做緊社工。」
C:「社工又點呀!你睇佢三十幾歲都未結婚竟知咩料啦!」




B:「吓!仲未結婚,唉!咁實有問題啦!」
聽到呢到我已經無名火起,就好似以前咁,我父母成日鬧交噪到鄰居保安都知,佢地就叫我同呀妹要乖啲,但佢地根本就咩都唔知,就係到指指點點。
之後,我忍唔住加把口,不屑咁話:「你地係佢肚入面個條蟲呀?咩都知。」
C:「梗係知啦!我住佢隔離架!」
我笑左出聲:「哈!我都聽到你同你老公鬧交喎!唔知係咪夫妻關係不和呢?」
C奶聽完之後表情薑咗:「呀妹!你唔好亂講野喎!冇啲咗既事!飯可以亂食,野唔可以亂講。」
我:「咩原來你都知野唔可以亂講呀!咁岩岩又係咁八人地啲私隱,咩都唔知,就講到好似真咁!」
A:「咦!我認得你,你咪係個個社工補習既學生。」
B:「係喎!咁你要小心啲啦!個個人咁有問題。」
呢個時候,我轉向同媽咪講:「媽咪!唉!以前啲女人真係可悲!將自己既成功感建立係婚姻之上都算啦,仲要將呢啲無知既想法強加係人地身上,用黎批評其他人,都唔睇下自己有冇資格。」
個幾個師奶聽得出我係到鬧佢地,C就同我呀媽講:「太太,哇!你個女一定係俾個個社工教到咁冇家教咁冇禮貌啦!我勸你唔好再俾你個女補佢啦!唔係之後都唔知會變成點呀!」
正當我媽咪想因爲我既無禮而話我既時候,我捉住我媽咪既手,殷切咁同佢講:「媽咪!好在你有學歷,有文化,唔似啲人咁膚淺又無知,係人背後說三道四咋!」媽咪聽到我咁講,到嘴邊既說話又吞返落肚。直到出笠,入到呀妹間屋,我都feel到個3個師奶惡狠狠咁望住我。但咁都唔怪得我,只能怪佢地做人冇素質,口不擇言。
見到呀妹之後,基於禮貌媽咪都冇提返起岩岩個件事,到媽咪走左之後,我都冇提到呢件事,唔係因為尷尬,我只係唔想俾佢知道原來有人咁樣批判佢,唔想令佢難受。
補完習之後,我返左屋企,呀妹仲要補埋之後個3個人。我地約好夜晚7點係發記等。





夜晚我去到發記既時候,呀妹已經到咗搵咗位啦!
「詩賢,呢到呀!」呀妹揮手叫我。
我坐底咗之後,佢問我:「你想食啲咩呀?想食咩就叫啦!」
「粉絲蒸鮮魷,韭菜豬紅同埋蜜糖雞翼。」
呀妹先係呆一呆,然後笑咗出黎,講:「竟然!全部都係我中意食既菜,估唔到我地口味咁夾喎!咁你想飲咩呀?」(我得戚咁笑,你既口味我都好了解既)
「唔使!我飲水得啦!」
叫完野食之後,呀妹叫咗兩罐可樂。
我話:「咪話我唔飲囉!」
佢笑講:「兩罐都係我既!我一罐唔夠飲。」隨即佢又拎左粒藥出黎,用可樂餸落肚。我見到之後皺住眉同佢講:「咪講咗唔好用可樂餸藥囉!」
而佢只係淡淡咗應咗句:「哦!」黎敷衍我。

p.p1 {margin: 0.0px 0.0px 0.0px 0.0px; font: 12.0px 'Helvetica Neue'; color: #454545}
p.p2 {margin: 0.0px 0.0px 0.0px 0.0px; font: 12.0px 'Helvetica Neue'; color: #454545; min-height: 14.0px}
span.s1 {font: 12.0px '.PingFang HK'}#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/