第三十七章

經過了好幾日的努力,我終於都可以令到自己的手指及手腕能夠郁動。物理治療師說如果按照呢一個進度,我下一步就是開始訓練其他動作。

而時間亦來到 十二月三十一日,阿康一大早就走過來探病,條仆街仔同我講打機,佢話隻mh出左之後冇耐我就受左傷,佢宜家同埋一班同學仔組團去屠龍,宜家變左三缺一,叫我拿拿臨好返一齊打機。

「打你個死人頭咩,臨近公開試,你要去溫書而唔係去打機。我宜家受傷冇得打既時候,你同我講咩野打機。」如果我可以起身,我一定會追住阿康打佢一身。

「你有所不知,我呢家係激發你既求生慾望,令到你一個目標去積極做康復訓練。」





「我又未死,你講咩野求生慾望呀!」我用盡全身既氣力,向阿康舉起了中指。

「你睇下,我既一句話輕易激發你既潛力,你能夠舉起中指,呢一個就係只有我能夠引發既神蹟。」

「蹟你個死人頭,呢個係我辛辛苦苦訓練得到既成果。」講完之後我收返起向阿康舉起既中指

「郁得返就有希望,我信你可以好得返,好返之後除左屠龍,隊波重等緊你去做龍門守龍,有你守龍我先冇任何後顧之憂,可以放心去攻門。」

「到時候再講啦!我宜家只係可以郁手指同埋手腕,我連拎起碗飯都冇力,我重要等人餵我食飯。我重邊有力氣去做運動。」





「妖,你之前連手指都郁唔到,宜家短短幾日咪又郁得返,係兄弟既就聽我講,唔好再自怨自艾成個怨婦咁,俾心機做康復訓練,好快就會好返。重有,我聽Auntie講你條死仔呢幾日都避緊Ashley。咁做有咩野意思?佢都係關心你先探你,你係唔係要等到佢既耐性用完,真係唔再探你先安落。」

「兄咩野弟,你試下好似我既情況,全身都郁唔到,你先會知道我既心情,你話我自怨自艾,咁你又有冇諗過宜家我雖然可以郁動到手腕同手指,但係已經用儘左我全身既力氣先可以做到輕微既動作。你講得好輕鬆,努力訓練就可以郁得返,但我宜家唔知道會唔會最儘只可以郁動到手指做呢啲動作。你估我唔想見到Ashley咩,但我宜家成個廢人,我唔想俾佢見到我宜家個樣。」我越講越激動,我用接近咆哮既語氣對阿康講呢一番說話,說完我需要深呼吸才能平伏返情緒。

阿康等我講完之後,靜左好一段時間。我從來未試過對佢發咁大既脾氣,我同佢相處一直都係嘻嘻哈哈,所以佢一時三刻都唔知講咩野好。

「對唔住!我唔應該講你自怨自艾,我只係想好好鼓勵一下你,但我用錯左字,我冇諗過你會咁嬲,亦冇諗過你既心情。」阿康打破沉默,第一時間係同我道歉。一直都嘻皮笑臉既阿康,我是第一次見到他咁誠懇既態度向人認錯。

「其實我都有唔啱,我唔應該對你咁大聲,但係最近我既心情真係好差,我就算好努力咁去練習,但係得到既唔係我預期既回報。我嬲我點解要受傷,我嬲我點解撞車撞到咁嚴重,我嬲我亂咁向關 心我既人發脾氣,每一個同我講只要慢慢訓練就會好得返,大家對我既期望越大,我既壓力就變得越大,我唔係要聽安慰同鼓勵既說話呀!」講完之後,我最後忍唔著喊左。





「知道啦!如果喊可以令你舒服啲,即管放心喊,冇人會笑你。」阿康捉住我隻手,再輕輕拍我既手背。

聽完阿康講,我既眼淚更加收唔到,喊到成個豬頭咁,阿康今日所講既野令我崩潰爆喊,同時間我亦因為喊完之後,釋放左呢段期間所承受既巨大壓力。

「原來喊出嚟真係好有用,但我諗我唔會再喊,同埋你講得啱,我唔應該再去逃避Ashley。」

「你諗通左就最好,你係我兄弟呢個事實永遠都唔會變,唔同你傾住啦,尋日我其實冇返過屋企訓,一陣返屋企沖完涼訓陣覺有其他節目。」說完之後,阿康拍拍我既膊頭,然後拎起個袋就轉身離開。

當阿康走左之後,我先醒起今日係除夕,如果我冇受傷的話,唔知可唔可以約到Ashley去倒數呢。

呢一刻,我突然間發覺,之前幾日逃避Ashley既行為好白痴。呢一刻我好想快啲見到佢,如果佢探我,我決定唔會再去逃避佢。
已有 0 人追稿