愛是恆久忍耐: 第三十八章

第三十八章

Ashley今日亦有過嚟搵我探病,如同朝早同阿康講既一樣,呢一日我終於冇再逃避同佢見面。

「對唔住,我最近一直都避緊你,我唔想你見到我好似一個廢人,所以先唔想同你見面。」護士小姐幫我坐調整坐姿並離開後,我與Ashley終於再次傾偈。

「我冇怪你喎!出左意外,俾著係我,我都未必可以咁快接受得到,你冇自暴自棄,我已經覺得你好勇敢啦!」Ashley在病床旁邊一邊切蘋果一邊對我講。

「今日係十二月三十一日,如果當日沒有意外.你估下我會唔會約到你今晚出去除夕倒數呢!」我說完之後,望向病房掛起的時鐘,現在是晚上時間的7:15分。





「唔知架!我有好多朋友等住我約,如果你冇意外既話,我應該會同朋友出街食飯,之後到尖沙咀海旁倒數,可能你呢一刻未必會見得到我都未定。」Ashley用叉子拮了一塊蘋果然後餵我食。

「照你咁講既話,我係唔係要慶幸俾架車撞到入廠,咁樣先有機會佔用到你既時間。」我一邊咬爛個頻果一邊笑笑口地答。

「你今日都唔會佔用到我好多時間,一陣探病時間完左,我就會返屋企,出面太迫我都係決定唔倒數,返屋企食完晚飯我會睇下書靜靜咁過。」

「講起書,我都好耐冇去圖書館了,未認識你之前,我一到放學就會去圖書館借書。認識你之後,我就好少再去圖書館了。」提起書,我又諗返起初次在圖書館電梯遇見既場景。

「你好返之後,我可以陪你一齊去呀!但我好好奇點解關認識我之後,會去少左圖書館?」





「因為認識左你之後,你比起去圖書館睇書更加有趣,所以就少左去圖書館了。」

「有趣?我竟然比起圖書館有趣?咁我點有趣法?」Ashley講完之後塊面有少少紅,可能覺得尷尬既關係,佢托一托眼鏡,唔等我開口,然後將一塊蘋果塞入我口。

幾經辛苦之下,我終於咬爛佢餵俾我既蘋果再吞落肚。

「唔知呢!我都唔太清楚到底點有趣法,我只係覺得同你一齊既時候,我就會覺得好開心,但點解會開心,我又唔知點解。」見到Ashley岩岩面紅尷尬既樣,我開始語無論次,睇落講左一大堆野
,但完全講左咩野,我諗連我都未必清楚,更何況係Ashley。

「其實你知唔知自己講緊咩?我完全覺得你講左等於冇講。」





「哈哈!我唔識得去形容,總之就有趣啦!」呢一刻既我,冇理由同佢講,我鐘意你,你就算咩野都唔做,只係坐在我面前,我望住你個樣,都會好開心。

「你都幾無聊,講到好有趣又講唔出點有趣法。」

「唔好再講呢個話題啦!話說我可以郁得返,我示範俾你睇,我宜家可以郁動到手腕同手指。」其實我覺得岩岩呢個問題,同個女仔問你點解鐘意我一樣,當被問到既時候,冇辦法可以解答得到。所以為左避免呢個尷尬既話題再繼續,我刻意轉換話題。

見到我能夠郁動手指,Ashley總算流出真正的笑容,意外之後她探望我的時候雖然有時都會有對我微笑,但總覺得她的表情感覺總是帶有一絲絲的內疚。

說真的,她不希望她帶著內疚的感情面對我,這一個意外並不是她導致,我不希望她背負著一絲一點的內疚去面對我。

「你咁樣笑咪幾好,我鐘意你呢個笑容,我同你保證我會努力去做康復的練習。我其實知道你對於意外好自責,亦面對好大壓力,但呢件事係意外,真係唔關你事,唔洗太放在心上。」

Ashley聽我講完之後擰轉身.我呢個角度之下,完全睇唔到佢既表情,但係我見到佢膊頭有輕微既上下起伏,我諗佢應該係喊緊都未定。





「我突然之間有少少唔舒服,我都係返土企休息先,我會再探你。再見!」我聽到Ashley的聲音顫抖地說。

「哦!再見,祝你新年快樂。」我唔太明白,我到底邊一句說話講錯左,令到佢有咁既反應。

Ashley最終離開左病房,而我則靜靜等候除夕的來臨。